In su cuartieri Casteddu su Museu Archeologicu Natzionale de Casteddu est su miradore printzipale de sa memoria istorica de sa Sardigna. Postu intro de sa Tzittadella de sos Museos, est su pius importante museu archeologicu de s’isula e unu de sos pius de signifficu de su Mediterraneu po sa ricchesa e  singularidade de sas collessiones suas.

Su museu apparat unu caminu ammaghiante meda peri sas simanas divressas chi ant sinzadu s’istoria sarda: dae sa preistoria a su Evu mesanu, cun attentzione particulare a sa civilidade nuragica, punica e romana. Donzi sala contat unu picculu de sa Sardigna antiga, iscopiande oggettos unicos po balore istoricu, artisticu e ideale.

Unu de sos puntos de fortza de su museu est s’istravanada collessione de brunzittos nuragicos, isculturas votivas pitticcas in brunzu chi
mustrant gherradores, animales, divinidades e iscenas de sa vida de donzi die de s’edade de su brunzu. Si trattat de manivattos de bellesa
rara, chi apparant una bista pretziosa supra sa sotziedade nuragica, una de sas pius  ammaghiantes culturas de su Mediterraneu antigu.

Accanta a sos brunzittos, su museu accasazat puru sas famadas istatuas de sos Tzigantes de Mont’e Prama, desampladas testimonias de s’iscultura nuragica. Artas pius de duos metros, custa friguras – arceris, gherradores,pugiles,- sunt unu unicum in sa bista archeologica de s’Europa e sunt fintzas una de sas conas pius poderosas de s’identidade sarda.

Su caminu de s’apparada alcansat puru oggettos chi arribant dae iscavos in tottu s’isula: isterzos de su neoliticu, prendas fenicias, frunimentos de interru punicos, musaigos e istatuas de su tempu de sos romanos. Donzi cantu est accumpanzadu dae cuadros illustrativos chi ghiant su bisitadore a cumprendere su cuntestu istoricu e culturale de fentomu.

Su museu est puru a s’ispissu logu de mustras de pagu tempus, abbenimentos culturales, buttegas didatticas e attividades po trumbittare chi affortigant su rolu suo tzentrale in sa bista culturale sarda.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Sa bela manna torrat in Sardigna, s’isula at accasazzare una tappa prima de s’Americas Cup n°38.

Sa bela manna internatzionale est pronta a torrare in Sardigna. S’isula at accasazzare difattis sa prima gara de ammaniada de sa 38° Americas Cup, abbenimentu chi at a finire cun s’assignadura de su premiu in Napoli in su mese de Triulas 2027. Sa Regione at accraradu s’accordu chi at a permittere a sa Sardigna de bintrare pro sa prima borta in s’istoria de sa cumpetissione de sa bela prus de archida a su mundu.

Mancari sos particulares organissativos non siant bistados ancora deffinidos de su tottu, su logu prus probabbile de sa gara est Casteddu. Sa tzittade printzipale sarda est dae annos sa base de sas operassiones de Luna Rossa e est cussideradu unu de sos campos de gara ideales pro sas cundissiones de su bentu, calidade de sas abbas e logos de appozzu, elementos de fundamentu po accasazzare abbenimentos de custu livellu.

Pro sa Sardigna si trattat de una ghirada ispettata po meda tempus. Sas World Series de s’Americas Cup aiant giai iffrisadu s’isula in su tempus passadu, ma chentza mai esecutare. Una prima tentada est de su 2020, cando s’abbenimentu fuit bistadu iscancelladu pro su Covid. Una secunda occasione fuit prevedida po su mese de Santuaini 2023, cun garas in disignu dae su 12 a su 15 de su mese, ma fintzas in cussu casu tottu est bistadu annuddadu  meda tempus prima, intre condierros e tesones intre sa Regione e sos ordiminzadores neozelandesos, chi aiant battidu a sa
tramuda de sas garas in Jedda, in Arabia Saudita.

Sa delusione fuit pustis accreschida cun s’assignadura de sa 38° Americas Cup a Napoli, unu seperu chi aiat addescadu fintzas una dibatta importante de sa politica. Sa preparassione  chi si depet faghere in Sardigna est ora una ispecie de riscattu po s’isula, chi at a podere accasazzare sas primas garas uffitziales de su ciclu novu de sa cumpetissione e torrare a su tzentru de su giru belicu internatzionale.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22