Pasca in Sardigna: 200.000 passizeris e 35.000 zassos in lettu dispostos, est s’antitzipu de s’istiu.

Sa Pasca 2025 at sinzatu unu sutzessu beru e propiu po su turismu in Sardigna. In sas dies de festa, difattis, sos aeroportos de Casteddu,
s’Alighera e Terranoa ant registradu unu traffigu totale de casi 200miza passizeris, cunfirmande s’isula comente unu de sos logos pius disizados
de su Mediterraneu, fintzas fora de s’istagione.

Cun s’azzudu de una Pasca “arta” in su calendariu, sa festividade at presentadu un’antitzipu de s’istiu perfettu: tempus caldumu, collegamentos bonos meda e un’offerta turistica chi s’est isparghinde meda, ant attiradu medas biazadores italianos e istranzos. A si faghere acciappare prontos, sunt bistados sos operadores de custu campu, chi ant respundidu cun d’unu aumentu de s’offerta de signifficu: pius de 35.000 zassos in lettu e casi su doppiu de sos “hotel” abbertos in cunfrontu a s’annu passadu su 2024.

Numeros in manos, su campu ritzettivu at poderadu cun sutzessu s’attumbu de sa dimanda, mustrande capatzidade manna de organissasione. Fintzas s’extra-alberghiero at fattu sa parte sua: istrutturas comente sos B&B, domos de vacantzias e agriturismos ant registradu unu accreschimentu de sas prenotassiones de su 3%, sinzu chi sos biazadores sighint a preferrere espressiones pius moddes e affundadas in s’iscrocca.

Una parte importante de su meridu andat a sos collegamentos cun sos aereos: sos bolos a pagu pretziu ant garantidu una atzessibilidade bona meda, mescamente po sos turistas chi arribant dae su tzentru de s’Europa. Manna sa presentzia de bisitadores dae Germania, Isvizzera e Austria, attirados dae sa possibilidade de godire carchi die de relax intre mare, natura, cultura e cosa de pappare bona meda.

Sas tzittades e sos burgos sardos, dae sud a su nord, ant retzidu mizza e mizza pessonas cun abbenimentos, fieras, bisitas ghiadas e mandigos de Pasca ispirados a su connottu. A nde tennere proe sunt bistadas tottu sas attividades: ristoratzione, artigianadu, carraduras,locales e attividades isperientziales chi ant bividu dies de attividade prena, cun risurtados bonos meda fintzas po s’accolomia.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Sa proposta de leze Pratobello 24 arribat in Cunsizzu regionale:partit s’iter istitutzionale.

Sa proposta de leze de initziativa populare Pratobello 24 bintrat in finis in su caminu istitutzionale de su Cunsizzu regionale de sa Sardigna. Su presidente de su Cunsizzu, Piero Comandini, at accraradu s’imbiada de su testu a sas cummissiones cumpetentes, faghinde partire s’iter de s’esamene chi prevedit su regulamentu de su Cunsizzu e marcande unu coladorzu isettadu dae meses dae sos chi ant poderadu s’initziativa.

Est unu risurtadu importante no solu supra su pianu de sas protzeduras, ma puru politicu e de signifficu. Pratobello 24 naschet, difattis, dae unu appellu populare mannu e partetzipadu: in s’istiu de su 2024 sos obreris fundadores ant regortu 211.000 frimas in tottu s’isula, unu numeru istravanadu chi testimonzat s’interessiu e sa partetzipassione deretta de una parte manna de sa cittadinantzia supra sos temas a su tzentru de sa proposta.

Cun s’assignadura a sas Cummissiones, si aberit como unu mamentu de cunfrontu e devuccamentu. In su mentres de sos tribaglios istruttorios ant essere iscurtados sos delegados de sos comitados chi ant fattu partire s’initziativa, chi ant podere faghere intendere sas resones insoro, e sos intentos de sa proposta de leze, naschida dae s’imbassu e fraigada po mesu de unu percursu de partetzipassione isparta. Sos ascurtos ant essere unu mamentu crae po garantire unu faeddu derettu
intre istitutziones regionales e tzittadinos, in su signu de trasparentzia e cundivisione.

Sas Cummissiones ant aere sa faina de controllare su testu, baludare sas osservatziones o probostas de modifica e faghere sa relatzione po la faghere arribare in Aula. Solu a s’accabbu de custu coladorzu sa proposta at podere essere chistionada e votada dae su Cunsizzu regionale, giammadu a narrere su parrere suo supra de un’initziativa chi at giai mustradu una lezittimassione populare manna meda.

S’intrada formale de Pratobello 24 in Cunsizzu regionale est duncas unu coladorzu importante in su caminu legislativu sou e unu bancu de proa po sos istrumentos de democratzia de intzidida chi prevedint sas lezes regionales. Unu signale importante fintzas supra su rolu de sos tzittadinos in sas detzisiones, giamados no solu a espressare cunsensu, ma fintzas a dare unu contribbudu in manera attiva a su fraigu de sas politicas pubbricas chi appartennent a su tempus benidore de sa Sardigna.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22