S’arte de Mirò addobiat Maria Lai: in mustra 70 operas intre trassados, pinturas e aratzos.

Duos limbazos artisticos, duas bisiones de su mundu, duas poetigas chi si iffrissant e si addobbiant in d’unu faeddu unicu e chi assuprit. Est
custu su coro de sa mustra “Mirò e Maria Lai: filos chi non si bient de s’arte”, chi abberit sas jannas suas a su pubbricu cun d’una selessione de pius de 70 operas intre trassadas, pinturas e aratzos, apparande unu caminu accabussante intre conas, sinzos e tessinzos visivos.

S’ apparada, accasazzada in d’unu logu museale sardu de archida, faghet cunfrontare Joan Mirò, mastru catalanu de su surrealismu, e Maria Lai, artista sarda manna meda, connoschida po sas operas suas chi giunghent arte, tessinzos e contassia. Duas friguras attessu po tempus e cuntestu, ma unidas dae una tesone comuna assa parte de s’arte comente forma de limbazzu universale, chi binchet sa paraula po divennere zestu, colore e signu.

Sa mustra s’isfroscat comente unu biazu intre mundos parallelos, inube sos trassados de Mirò, prenos de conas e figuras chimeristas, s’intritzant cun sas operas trassadas de Maria Lai, fattas de filos, pabilu, liberos cosidos,abbiccì prenos de misteru. Unu filu chi non si podet biere ligat sas operas de sos duos artistas: sa chirca de sa poesia, s’importantzia de su giogu, sa libertade de s’immaginatzione.

Sas pinturas de Mirò, cun sas formas essentziales e sos colores primarzos insoro, paret chi ballent  accanta a sos aratzos de Maria Lai, inube su filu diventat iscrittura, memoria e contu. No una simple esposissione parallela, ma una bera e propia arrejonada artistica, chi cumbidat su bisitadore a iscoperrere affinidades chi no s’ ispettant e annaghiduras fungudas.

Sa mustra disignat fintzas un’atteru balorimentu de s’opera de Maria Lai, figura crae de s’arte de oe italiana, semper pius reconnoschida a livellu internatzionale. Sas operas suas, a s’ispissu ligadas a s’iscrocca de sa Sardigna e a su connottu de su cusidu, sunt divennidas in su tempus conas de un’arte chi aunit, chi contat, chi fraigat ligonzos.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

S’archìviu de Màrio Faticoni divenit digitale e bi podent intrare totus.

S’archìviu de Màrio Faticoni, atore, regista e iscritore protagonista de sa cultura sarda, divenit como digitale e totus b’ant a pòdere intrare. Costòit pius de barant’annos de atividade teatrale e culturale de sa Sardigna. Est istadu irrichidu cun vìdeos, pìculos de ispatàculos e àteru materiale documentàriu, oferinde un’ogriada prena subra de s’istòria de su teatru de s’ìsula nostra dae sos annos Sessanta a oe.

Su sito web nou l’ant resu fruìbile a totus in sa matessi die chi issu at cumpridu sos annos, e ocannu nde faghet 88. Custa die est su 20 de
capidanni. Faticoni est unu de sos fundadores de su Teatru de Sardigna e at regortu in sos annos artìculos, fotografias, documentos e materiales de iscena in cantidade manna. Custu est su primu archìviu teatrale de totu sa Sardigna, chi su Ministèriu de sos Benes Culturales at riconnotu comente de importu mannu. Meda de totu cussu chi b’est in cust’archìviu est istadu donadu in su 2022 dae su Museo archeològicu natzionale de Casteddu. De sas cosas pius de importu, tocat de montovare, in sa banda de su giornalismu, un’intervista fata dae Faticoni a Costantinu Nivòla in Nova York.

Sos documentos de s’archìviu sunt istados campaniados dae Faticoni paris cun s’assistente sua Simona Loddo. Su portale, invetze, est istadu fatu dae s’istùdiu de Afredo Scrivani e regollet cosa meda, chi est de annos e annos de carriera. Faticoni, nàschidu in Verona, si nd’est bènnidu a istare a Sardigna, ube at regortu documentos meda. Custu sito web nos contat s’istòria de su teatru sardu, dae sos primos esperimentos de su Cut- Centro universitàriu teatrale in su 1959 fintzas a cando est nàschidu su Cit.

In s’archìviu b’at testos, regias, betadas de manu e distimonias de sas produssiones pius noas, cun una bisione bene fata de s’atividade artìstica de Faticoni e de su rolu tzivile, sotziale e polìticu chi at tentu su teatru sou in Sardigna.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22