Sulcis, sos sindacados dimandant detzisiones politicas in presse, po evitare su bisestru sotziale.

Si est fattu oe un’addobiu in su Ministeriu de sas Impresas e de su Made in Italy(Mimit) po accomettare sas condierras deligadas de s’industria chi interessant su Sulcis, in Sardigna. S’accorrada, mancari no siat bistada deffinitiva, est bistada unu primu passu po impostare unu percursu de cunfruntu supra sos afficcos accolomicos e de produssione de su logu, poninde a su tzentru de sa cuntierra su tema importante de su tribagliu.

Secundu cantu est bessidu a pizu dae su cunfruntu, bi diant essere suzettos novos de dittas chi sunt interessados a imbestire in sa produssione industriale de s’iscrocca. Su Ministeriu est tribagliande po permittere a custos imbestidores de bintrare in sos “data room” de sa ditta Portovesme S.r.l., chi est controllada dae sa multinatzionale Glencore. In manera parallela, bi sunt cuntierras cun medas dittas chi diant podere faghere torrare a partire sa produssione de alluminiu primarzu in sa ditta Sider Alloys, chi si acciappat in su sud-ovest de sa Sardigna.

Sos delegados de su sindacadu ant espressadu cun fortza meda sa netzessidade de detzisiones politicas lestras po garantire chi sas attividades potant torrare a partire, evidentziande comente non siant pius bastantes sas decrarassiones de intentu. Sos sindacados ant fintzas evidentziadu s’importantzia de su tempus: donzi atteru ritardu arriscat de peorare sa crisi de s’occubassione e sotziale chi giai bi est, trabentande in pagu tempus, fintzas sos tribagliadores de sa tzentrale Enel, faghinde serrare s’impiantu intre pagu tempus e impittande sas batterias chi prevedit su pianu de transizione energetica.

Po accomettare in manera pius detzisa sa chistione, est bistada siddada una cunvocatzione nova in su Mimit po su 23 de Aprile, un’addobiu in su
cale si at a chistionare de tottu sas condierras abbertas in su polu industriale de su Sulcis. Sa porfia bera est cussa de acciappare solutziones industriales beras po garantire sa produssione de zingu,prumu e alluminiu, campos de fundamentu po s’industria natzionale.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Sa torrada de s’ora legale intre vantazos praticos e discumbenios pitticcos a s’incumintzu.

Cun s’arrivu de su beranu torrat fintzas una de sas mudas prus nodidas de s’annu. In sa notte intre sapadu 28 e dominica 29 martu sas lantzittas de sos relozos ant devere essere movidas a daenantis de un’ora. Custu determinat una notte prus curza e duncas un’ora de sonnu in mancus, mancari pro chie impittat telefoneddos e computer su coladorzu at essere in automaticu chenza deppere intervennere.

S’ora legale bi est in Italia dae su 1966. Est bistada fatta po irfruttare menzus sa lughe de su sole in sos meses de beranu e istiu, cando sas dies si allonghiant. Poninde a daenantis s’orariu si tenet prus lughe in sas oras de su sero, minimande gai sa netzessidade de impittare sa lughe artifitziale. Custa cosa battit beneffissios importantes.

Su primu est pro su risparmiu de energia, pro itte si azzendent prus pagu sas lughes in sas domos e sas tzittades, minimande gai sa netzessidade. Ma no est s’unica cosa positiva. Sas dies parent prus longas e custu cambiat fintzas sos imbitzos de sas pessonas. Si tenet prus tempus po istare in fora, po faghere attividade fisica oppuru pro si abbambiai pustis de su tribagliu o s’iscola. Fintzas sa vida sotziale nde tenet unu vantazu.

Non bisonzat peroe de s’ismentigare sas cosa prus pagu positivas. Sa muda de s’orariu podet creare carchi difficultade in sas primas dies. Carchi pessona s’intendet prus istracca,faghet fadiga a s’indischidare su manzanu o tenet problemas a si drommire su sero. Podent apparessire fintzas alteriosidade e difficultade a si cuncentrare. Sas pessonas prus sensibiles sunt a s’ispissu sos pitzinnos, sas pessones giai istraccas e chie tenet problemas de sonnu.

Pro issos, s’abesare dimandat carchi die in prus. Mancari custos problemas a s’incumintzu, s’ora legale sighit a essere impittada pro itte sos benefissios totales sunt cussiderados prus mannos. Pustis de pagas dies su numeru prus mannu de pessones si abbituat a s’orariu novu e torrat a incumintzare sas attividades chena problemas particulares.

Pro congruire, su coladorzu a s’ora legale est unu cambiu pitticcu chi dimandat unu tempus curtzu pro si adattare, ma chi apparat acchittos beros in sa vida de donzi die. Seros prus longos,impittu prus mannu de sa lughe naturale e sas opportunidades de bistare in fora faghent de custu tempus unu de sos prus appretziados de s’annu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22