Presones sardas a s’antreccoro: troppa zente e guvernu semper pius diffitzile.

Sas presones de sa Sardigna accomettant una situassione semper pius critiga po more de sa zente meda e de su creschimentu de sos presoneris istranzos, in manera particulare extracomunitarios. Sas istrutturas pius fartadas dae custa emergentzia sunt sa presones de Bancali in Tattari e cussa de Uta in Casteddu, ambas prenas pius de canta zente bi podet bistare.

Sa presentzia de presoneris istranzos in sas presones de s’isula est semper creschinde, pius de sa media natzionale. Custu fenomenu est evidentziadu in manera particulare in sas colonias de Pena, inube pius de sa metade de sos presoneris arribat dae forastigu. Sas resones de custa cuncentratzione sunt pius de una e a s’ispissu, ligadas a tramudas dae atteras regiones de s’Italia, chentza tennere de contu de sa netzessidade de mantennere sos presoneris accanta a sas famiglias insoro e a retzas de accottu.

Su numeru artu de presoneris fittat supra sa calidade de sa vida in sas presones, faghinde divennere pius diffitzile su controllu de donzi die. Sas difficultades de sa limba e de sa cultura de sos presoneris istranzos cumplicant fintzas de pius su tribagliu de sos de sa politzia penitenziaria, chi a s’ispissu teppet operare chentza tennere s’accottu de sos medianeris culturales. Custu faghet bessire a pizu tesones intro de sas presones e impedit sos percursos de recuberu po essere recuberados in sa sotziedade.

A differentzia de sas presones, sas Colonias de Pena dant opportunidades pius mannas a sos presoneris, pro itte lis permittint de tribagliare e imparare unu mestieri. Intames, custa possibilidade pertoccat solu una parte de sa populatzione de sas presones, mentres sa parte pius manna de sos presoneris addurat in presones prenas de zente e cun possibilidades chi no bastant po garantire una presonia chi tenzat dignidade e potat recuberare.

Sa situassione dimandat interventos lestros po mezzorare sas cunditziones de sos presoneris, minimare su numeru de sos presoneris po mesu de mesuras divressas de sa presonia e creschere su personale de sas presones. Chentza chi bi siat un’assione bera, su sistema de sas presones sardu arriscat de antreccorare, cumprumittinde non solu sa
sicuresa, ma puru sa funtzione de curretzione chi prevedit sa legge.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Einstein Telescope, sa Sardigna puntat supra Sos Enattos: un’istrumentu pro istudiare s’univressu.

S’Einstein Telescope est un’istrumento iscientificu addaenantis medas chi at a permittere a sos istudiosos de iscrudignare sas undas gravitatzionales chi arribant dae s’univressu primarzu e de istudiare sos fenomenos de su trettu chi oe non podimos ancora biere.

Si trattat de unu osservadoriu de ingendra nova chi nos at a podere azzuare a cumprendere menzus comente est naschidu e creschidu s’Univressu. Gratzias a sa dilighesa manna sua at essere possibbile iscrudignare abbenimentos cosmicos istravandos comente sa tumbada intre toffos nieddos o intre istellas de neutrones abbeniddos miliardos de annos faghet.

Sa Sardigna at a presentare ambas sas possibbiles formas de s’osservadoriu: cussa a triangulu e cussa cun duas istrutturas a forma de L. Carchi istudiu at mustradu chi sa soluzione cun duas L diat podere dare risurtados iscientifficos menzus e minimare carchi arriscu tennicu. S’idea est cussa de faghere custa solutzione imparis a sa Sassonia, creande una collaborassione intre Istados Europeos divressos supra unu de sos disignos iscientificos prus importantes de sos annos imbenientes.

Pro sos iscientziados su situ de Sos Enattos, in s’iscrocca de Luvula, est unu de sos logos menzus in su mundu pro fraigare custu osservadoriu. Est difattis una zura meda muttiga dae su puntu de bista sos terremotos e casi briva de cale si siat burdellu motivadu dae sas attividades de s’omine. In prus sa rocca presente sutta de terra est adatta meda a sos iscavos netzessarios pro fraigare sas istrutturas chi ant a accasazzare sos istrumentos iscientifficos.

Su fraigu suo diat podere mustrare un’occasione manna po s’iscrocca. Unu disignu comente custu podet battire imbestimentos novos e occasiones meda de formazione. Sa presentzia de s’osservadoriu diat podere favoressere sa creschida de sa chirca iscientifica e apparare possibilidades novas pro istudiantes,chircadores e tennicos chi tribagliant in sas zuras de s’iscientzia e de s’inzennieria.

Unu fraigu iscientificu gai importante diat podere battire beneffissios fintzas a s’accolomia locale. A inghiriu de su disignu diant podere naschere attividades novas ligadas a sa chirca, modernissassione e servitzios chi serbint pro accotzare unu tzentru iscientificu internatzionale mannu meda. In prus diat podere affortigare sa collaborassione intre universidades, tzentros de chirca e istitutziones europeas.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22