Sa Brigada Tattari torrat a domo: concruida sa faina in Libanu.

Pustis de meses de tribagliu cadriu, sacrifitzios e dedissione, sa Brigada Tattari si est preparada a torrare in s’amada Sardigna sua. Si est concruida in manera uffitziale su 1° de frearzu sa faina Unifil, chi at bidu interpretes sos sordados tattarinos, impignados in d’unu de sos iscenarios internatzionales pius cumplicados e deligados de sos urtimos tempos.

Sunt bistados 1.120 sos militares chi ant partetzipadu, omines e feminas cumandados dae su generale Istevene Messina, chi at ghiadu cun frimmesa e determinu sas operassiones in d’unu logu istabbile po sa politica cumplicada, sinzadu dae tesones chi creschiant donzi die cun arriscos tottora. Sa faina est bistada fatta in s’istadu de su Oriente mesanu, cun su compidu de dare su contribbudu a mantennere sa paghe e sa sicuresa in sa regione, unu logu giai fraccadinu e chi fit divennidu meda pius istabbile po more de s’accreschimentu de sa violentzia chi che at trabentadu su Libanu in sos urtimos meses. Sa ghirada de sos Tattarinos at essere a pagu a pagu.

Sa faina appena concruida no est bistada briva de difficultades, cun accadessimentos chi ant postu sos militares italianos daenanti a proas tostas meda, evidentziande sos arriscos ligados a operassiones de paghe in logoso chi sunt istabbiles meda. Unu de sos momentos pius criticos est bistadu su 10 passadu de Santu Aini, cando sas troppas de Israele ant isparadu contra tres bases Unifil. In mesu de custas, sa base de Nagoura, inue bi fint sordados de sa Brigada Tattari, chi est bistada corpada, poninde in perigulu sa sicuresa de su personale.

Un’atteru abbenimentu de tesone manna bi est bistadu dae su 19 a su 22 de Sant’Andria, cando sa base de Shama, un’attera base de sa faina Unifil, est bistada attaccada. In su mentres de custos abbenimentos, battoro sordados de sa Brigada Tattari sunt addurados fertos. Po fortuna, sos dannos non sunt bistados graes, ma s’abbenimentu at evidentziadu sa periculosidade de sas operassiones in d’unu logu inube sa tesone est semper arta e sos arriscos sunt semper in daesegus de su cantone.

Mancari bi siant bistadas difficultades e momentos de perigulu, sa faina Unifil est bistada unu contribbudu importante meda de s’Italia po su protzessu de paghe e po sa firmesa de su Libanu. Sos sordados tattarinos, cun proffessionalidade, corazu e ispiritu de sacrifitziu, ant fattu unu tribagliu chi cheret incomiadu, mustrande cun onore s’Italia in d’unu cuntestu cumplicadu meda.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Un’organissasione criminale abbarbada in su mesudie de sa Sardigna, ma cun coffuzones internatzionales fortes in Belgio e Paesi Bassi, est bistada iscupulada in d’una operassione padria dae parte de sas fortzas de s’ordine chi ant arrestadu tres pessonas e at secuestradu benes po pius de tres miliones de euros. Secundu cantu ant nadu sos de sa politzia, sa truma fit responsabbile de aere battidu in Sardigna una cantidade manna de cocaina, po unu totale de 77 chilos.

Sa droga beniat carrada cuada supra de camions mannos chi partiant dae su nord Europa, passande divressas frunteras fintzas a arribare in s’isula.

Una borta arribada a destinu, sa cocaina beniat bendida in su mercadu locale, cun d’unu balore tantadu intre tres e ses miliones de euros. S’iscrucculla at permittidu de assebertare un’organissasione de otto pessonas, tres de sas cales abbisadas comente fundadores de s’attividade illetzida, mentres atteras chimbe diant aere tentu rolos de azzudu de s’organissasione. Sa truma, mancari esseret discreta meda, fuit istrutturada bene e teniat fintzas cabbales accolomicas de signifficu.

Sas iscruccullas ant difattis battidu a su secuestru de pius de 90 parados, intre domos e terrinos postos a su pius in su mesudie de s’isula, paris a paritzos camions e disponibilidades de dinari. Una parte de su patrimoniu, chi si pensat siat de sas pessonas sutta de iscrucculla, est bistada agattada fintzas in sos Paesi Bassi. In su mentres de sas attividades de iscrucculla sunt bistados secuestrados puru vinti chilos de cocaina sinchera meda, mentres tres curreos incarrigados de che leare sa cocaina sunt bistados arrestados.

S’organissasione impittaiat maneras diligadas, impittande macchinas modificadas po cuare sa droga e chircande de faghere faddire sos controllos po mesu de caminos istudiados in tottu sos particulares.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22