A Maimone, Samugheo si preparat po su carrasegare istoricu suo.

Sa die attesa meda est infinis bistada abbisada: dominica 16 de frearzu 2025, su burgu de Samugheo at a diventare su tzentru de su connottu e de sa cultura sarda cun s’edissione numeru 28 de “A Maimone”. Si trattat de una de sas rassignas pius de signifficu dedicadas a sas caratzas de su connottu de su carrasegare sardu, un’abbenimentu chi donzi annu attrait medas appassionados, istudiosos e curiosos chi arribant no solu dae tottu s’isula, ma fintzas dae atteros logos de s’Italia e fora de s’Italia.

Custa bessida a campu est un’occasione uniga po si affundare in sas raighinas fungudas de sa Sardigna, poninde impare elementos de su folklore, relatas cun su tempus passadu e ritos antigos.

In su 2024, si funt giai registrados numeros istravanados, cun d’una partetzipassione manna de pubbricu, gratzias fintzas a s’accottu de sa Regione Sardigna, de sa Fundatzione de Sardigna, s’Unione de sos Comunes de su Barigadu e su Comune de Samugheo. Po s’edissione 2025, peroe, sos isettos sunt fintzas pius artos.

Su 16 de frearzu, sas carrelas de su burgu si ant a revertire in d’unu teatru a chelu abbertu beru e propiu, animadu dae caratzas chi parent omines o animales, costumenes de su connottu in orvaqe e peddes de crapa, marratzos chi sonant e ballos de majinzu. Donzi elementu at essere parte de unu ammaghiante ritu chi muttit istorias antigas e credentzias, apparande a su pubbricu un’esperientzia chi faghet affundare in su connottu.

Non si trattat solu de unu abbenimentu ispettaculare, ma de unu biazu in su tempus e in s’ispiritualidade de unu populu chi dae seculos mandat a daenanti, cun braga e dedissione, sos segretos de s’identidade culturale sua. Donzi caratza, donzi movimentu e donzi sonu contant un’istoria, intritzande su sacru cun su proffanu in d’unu ecchilibriu chi solu sas tradissiones de milli e milli annos comente custa ischint mantennere bias.

Sa situassione de majia si at a faghere intendere fintzas dae su mese de bennarzu. Giovia 16, difattis, Samugheo at accasazzare sa bessida de su connottu de sos Mamutzones po sos fogulones de Sant’Antoni. Custu ritu, chi sinzat s’incumintzu de sas tzelebratziones, est unu momentu carrigu de signifficu ispirituale e culturale, inube su fogu diventat elementu tzentrale de puriffigassione e torrada a bida.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Referendum supra sa zustissia, itte prevedit sa refforma supra sa cale ant a votare sos italianos.

Su 22 e 23 martu sos italianos ant essere giammados a votare pro detzidere si cambiare carchi parte de sa Costituzione in sa parte de su funtzionamentu de sa magistradura.Supra s’ischeda elettorale bi at essere una dimanda meda cumplicada pro itte bi sunt solu sos numeros de sos articulos de sa Costituzione chi ant essere cambiados, chena ispiegare in manera simple cale sunt sas novidades chi si prevedint.

Su referendum no est pro problemas medas chistionados de sa zustissia italiana, comente sos protzessos longos meda o sa mancantzia de pessonale in sos tribbunales. Su votu si cuntzentrat imbetzes supra s’ordiminzassione de sa magistradura e supra sas regulas de su tribagliu de sos magistrados. Sa refforma prevedit tres cambiamentos printzipales e importantes.

Bidimolos. Su primu est s’ispitzigu intre zuighes e pubbricos ministeros. Oe bintrant in sa magistradura cun su mattessi cuncursu e faghent parte de su mattessi assentu. Cun sa refforma sos duos caminos diant essere divididos in manera deffinitiva. Segundu chie agguantat su cambiamentu custa divisione diat faghere divennere su zuighe prus indipendente in su mamentu in su cale devet dezidere si una pessona est innozente o affartada. Chie est contrariu, invetzes, pensat chi su sistema de oe affiantzet giai ecchilibriu e chi ispitzigare de su tottu  sos duos rolos potat creare difficultades novas.

Su segundu puntu est pro su Cunsizzu Superiore de sa Magistradura, s’organu chi si occupat de sas carrieras de sos magistrados. Sa refforma prevedid de lu ispitzigare in duos: unu dedicadu a sos zuighes e unu a sos pubbricos ministeros. Sos partetzipantes diant essere seperados cun d’unu sorteamentu e non prus cun d’una elessione. S’urtimu cambiamentu est pro su sistema chi dezidit pro sas penalidades a sos magistrados. Sa refforma prevedit sa creassione de unu organismu novu chi si diat occupare propriu solu de custos protzedimentos.

Cun su referendum sos tzittadinos ant deppere seperare si mantennere sas regulas de como o faghere custos cambios in su funtzionamentu de sa magistradura italiana. In sas urtimas chidas custas votassiones ant tentu azzesu su cunfruntu politicu e sas animas de sos partidos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22