Su 25 de Sant’Andria, Die Internatzionale po che bogare sa violentzia contra sas feminas, nos ammentat cantu siat galu apprettosu accomettare cust’apprettu sotziale. In Sardigna, su fenomenu de sa violentzia de casta leat inghirios graves meda, cun d’unu accreschimentu de casos chi preoccupat e unu cuntestu culturale chi a s’ispissu mandat a daenanti abesos chi faghent dannu.

Sa violentzia contra sas feminas bessit a pizu in paritzas formas: fisiga, psicologica, sessuale e de s’accolomia. Sos mortorios contra sas feminas, chi sunt sa pius urtimas e drammatigas conseguentzias de sa violentzia de casta, sunt creschinde in manera drammatiga in s’isula. In sos urtimos sette annos, 28 feminas sunt bistadas bocchidas, sinnu de una problematica chi dimandat attentzione derettu derettu, e misuras pretzisas.

Non si tratta solu de numeros. Sa violentzia de casta est una chistione abbarbada in isviluppos de podere e controllu, agguantadas dae una cultura de sos omines chi medas bortas zustifigat o irmenguat sas responsabilidades de sos affraccadores. In Sardigna, abesos e cunvintziones farsas ligadas a su rolu de casta sighint a essere ispartos.

Una pertzentuale de signifficu de sa populatzione pensat chi sa femina potat essere, in carchi manera, responsabbile de sa violentzia patida. Atteros creent chi, in situassiones de difficultade economica, si depat dare prioridade a sos omines in su tribagliu. Custos tremesos faghent andare a daenanti unu tempus de discriminassione chi impedit sa paridade prena e su riconnoschimentu de sos dirittos de sas feminas.

Mancari esistant istrumentos po azzuare comente su numeru birde 1522, medas feminas no acciappant su corazu oppuru sas possibilidades po denuntziare. Sa timoria de no essere crettidas oppuru de patire atteras violentzias las ispinghet a suffrire a sa muda. In su 2022, su 74% de sas feminas chi at giammadu su servitziu, posca no at denuntziadu. Est de fundamentu affortigare custos istrumentos e indilighire sa populatzione supra s’importantzia de denuntziare sas violentzias.

Cumbattare sa violentzia de casta no cheret narrere solu de castigare sos faltosos, ma puru educare sa sotziedade a su rispettu e a sa paridade. Serbit un’impignu de tottus po isderenare sos abesos, favoressere s’agualidade de casta e fraigare una cultura chi siat fundada supra su rispettu pare-pare.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa torrada de s’ora legale intre vantazos praticos e discumbenios pitticcos a s’incumintzu.

Cun s’arrivu de su beranu torrat fintzas una de sas mudas prus nodidas de s’annu. In sa notte intre sapadu 28 e dominica 29 martu sas lantzittas de sos relozos ant devere essere movidas a daenantis de un’ora. Custu determinat una notte prus curza e duncas un’ora de sonnu in mancus, mancari pro chie impittat telefoneddos e computer su coladorzu at essere in automaticu chenza deppere intervennere.

S’ora legale bi est in Italia dae su 1966. Est bistada fatta po irfruttare menzus sa lughe de su sole in sos meses de beranu e istiu, cando sas dies si allonghiant. Poninde a daenantis s’orariu si tenet prus lughe in sas oras de su sero, minimande gai sa netzessidade de impittare sa lughe artifitziale. Custa cosa battit beneffissios importantes.

Su primu est pro su risparmiu de energia, pro itte si azzendent prus pagu sas lughes in sas domos e sas tzittades, minimande gai sa netzessidade. Ma no est s’unica cosa positiva. Sas dies parent prus longas e custu cambiat fintzas sos imbitzos de sas pessonas. Si tenet prus tempus po istare in fora, po faghere attividade fisica oppuru pro si abbambiai pustis de su tribagliu o s’iscola. Fintzas sa vida sotziale nde tenet unu vantazu.

Non bisonzat peroe de s’ismentigare sas cosa prus pagu positivas. Sa muda de s’orariu podet creare carchi difficultade in sas primas dies. Carchi pessona s’intendet prus istracca,faghet fadiga a s’indischidare su manzanu o tenet problemas a si drommire su sero. Podent apparessire fintzas alteriosidade e difficultade a si cuncentrare. Sas pessonas prus sensibiles sunt a s’ispissu sos pitzinnos, sas pessones giai istraccas e chie tenet problemas de sonnu.

Pro issos, s’abesare dimandat carchi die in prus. Mancari custos problemas a s’incumintzu, s’ora legale sighit a essere impittada pro itte sos benefissios totales sunt cussiderados prus mannos. Pustis de pagas dies su numeru prus mannu de pessones si abbituat a s’orariu novu e torrat a incumintzare sas attividades chena problemas particulares.

Pro congruire, su coladorzu a s’ora legale est unu cambiu pitticcu chi dimandat unu tempus curtzu pro si adattare, ma chi apparat acchittos beros in sa vida de donzi die. Seros prus longos,impittu prus mannu de sa lughe naturale e sas opportunidades de bistare in fora faghent de custu tempus unu de sos prus appretziados de s’annu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22