Lunis, 18 de Sant’Andria, sa Sardigna si frimat po cummemorare sos mortos de sa prena drammatiga po more de su mumujone Cleopatra, chi undighi annos faghet, at giuttu morte e bisestru, corpande cun violentzia sa Gaddura e atteros logos de s’Isula.

Sas comunidades de Terranoa e Arzachena, sinzadas in manera funguda dae s’abbenimentu, faghent tzerimonias po ammentare sos deghennoe mortos e po arremazzare s’impignu de no ismentigare. Su 18 de Sant’Andria 2013, su mumujone Cleopatra aiat imboladu supra sa Sardigna una cantidade de abba chi non si podet contare, cun casi 440 millimetros in pagas oras. Sas figuras de sas carrelas sutta de s’abba, domos derruttadas e pontes imbolados ant sinnadu un’ingendra intrea.

Deghennoe pessonas funt mortas: Frantziscu Mazzoccu e su fizu Enrico, de solu tres annos, sunt bistados trabentados a s’essida de Terranoa, mentres Anna Ragnedda, 83 annos, e Maria Massa, 88 annos, sunt bistadas acciappadas affogadas in sos lettos insoro. Un’ingurtidoriu supra sa carrela provinciale numeru 38 chi dae Terranoa che leat a Tempio, aiat ingullidu Bruno Fiore, Sebastiana Brundu e Maria Loriga.

In Arzachena, una familia Italo-brasiliana- Isabel Passoni, Cleide Maria Rodriguez e sos fizos insoro- fint abbarrados aggorrados in d’unu fundagu. In mesu de sos mortos, si contant puru su poliziotto Luca Tanzi, chi che fit ruttu cun sa macchina sua in su Cedrino, e atteras pessonas dae Torpè a Uras, passande po su Mediu Campidanu. In Orosei, su disisperu po sa distrussione totale de sa ditta sua, aiat ispintu Pasqualino Contu a si bocchire.

Sos dannos sunt bistados de casi 660 miliones de euros, chentza contare tottu su chi bi cheriat po ponnere in siguresa s’iscrocca. A distantzia de 11 annos, Terranoa e Arzachena si preparant a tzelebrare sos mortos cun duas tzerimonias de signifficu. Pustis sa proiezione de su documentariu chi at a faghere biere cun immagines e testimonias sas oras tragicas de cussu die, in manera chi sa memoria de cantu est sutzessu adduret biva e potat serbire comente ammunimentu po su tempus benidore.

Custos abbenimentos de cummemorassione non solu serbint a tzelebrare sos mortos, ma evidentziant s’importantzia de affortigare sas mesuras po prevennere e diffendere, po evitare chi atteras disgratzias commente cussa potant torrare a capitare.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

S’istoria de su Casteddu Fubbalu, s’isquadra simbulu de sa Sardigna.

Sa sotziedade fundada in su 1920 in sa tzittade de Casteddu. Dae prus de chentu annos est unu puntu de relata po s’isport sardu e po medas appassionados de fubbalu. In sos primos annos de s’istoria sua, s’iquadra giogaiat mescamente in sos campionados regionales e minores de su fubbalu italianu. In cussu tempus su Casteddu non fuit ancora intre sas isquadras prus fortes de s’Italia, ma cun su passare de su tempus est creschida e at incumintzadu a mezzorare sos risurtados suos.

Una bortada importante arribat in sos annos Sessanta,cando su Casteddu resessit a arribare in Serie A, su campionadu prus importante de su fubbalu italianu. Dae cussu mamentu s’isquadra incumintzat a si faghere connoschere semper de prus fintzas a livellu naztionale. Su mamentu prus importante de s’istoria de su club arribat in s’istajone 1969-1970. In cuss’annu su Casteddu resessit a binchere s’iscudetto, su campionadu italianu. Est unu risurtadu istoricu pro itte est s’unicu iscudetto binchidu dae un’isquadra de sa Sardigna.

In cussos annos s’isquadra fuit ghiada dae s’allenadore Manlio Scopigno e intre sos giogadores prus importantes bi fuit Gigi Riva. Riva est cussideradu unu de sos attaccantes prus mannos de s’istoria de su fubbalu italianu. Gratzias a sos goals suos est divennidu su simbulu de su Casteddu e fintzas unu de sos giogadores prus amados dae sos tiffosos sardos.

Sa binchida de s’iscudetto est bistada una festa manna po totta sa Sardigna. Fintzas oe cussu sutzessu est ammentadu cun galabera manna e d’est unu de sos mamentos prus importantes in s’istoria de s’isport italianu. Pustis de cussos annos su Casteddu at sighidu a giogare po meda tempus in Serie A, ma at tentu fintzas mamentos diffitziles. S’isquadra at tentu simanas positivas e atteras prus cumplicadas, cun carchi masqada in sas categorias prus bassas. In sos annos Noranta su Casteddu est torradu a tennere resurtados bonos e at partetzipadu fintzas a cumpetissiones europeas, accomettande isquadras de atteros Paisos. Ets bistadu unu periodu importante po sa sotziedade e sos tiffosos.

In sos urtimos annos s’isquadra est bistada in serie A e in serie B.Mancari custu, su Casteddu sighit a essere un’isquadra sighida meda e d’est fintzas oe unu simbulu po totta sa Sardigna.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22