In s’ispidale de Chieti est bistadu fattu un’interventu istravanadu e delicadu meda, chi at giuttu a che bogare unu bugnu de grandesa desamplada, de 30kilos, da una femina de 75 annos.

Sa femina, chi bistat in sa provintza de Chieti, ma benit dae un’istadu de s’Unione Europea, fit andata a su Prontu Succursu de s’ispidale, ca teniat dolores mannos a sa entre e una creschida manna de su volumene de sa entre, cosa chi aiat fattu divennere netetzessariu unu controllu lestru. Sos esamenes appena fattos, aiant giai evidentziadu sa presentzia de una massula in s’ala de su bassu entre, ma solu a su momentu de s’interventu sos silugianos ant pottidu biere canto su bugnu fit mannu.

S’interventu est bistadu fattu dae su ginecologu Alessandro Lucidi e dae sos duttores de Ginecologia e Ostetricia de s’ispidale de Chieti. Bida sa mannaria de sa massula, si est teppidu faghere un’interventu abberinde sa entre, lassande sa tennica cun su Robot Da Vinci, chi si impittat cando si operat po sos bugnos. Sa massula occupaiat una parte manna de sa entre e poniat problemas po sos movimentos in su mentre de s’operassione, faghinde divennere s’operassione delicada e meda cumplicada, mescamente po a’arriscu de faghere dannos a sos organos chi bi sunt a lacana. In pius de che aere bogadu sa massula, sos duttores li che ant bogadu s’urba e sas ovajas e ant leadu fintzas campiones chi serbint po chircare de cumprendere de calu bugnu si trattat e a bitte puntu fit sa maladia.

S’operassione est un’ esempru de eccellentzia de sa sanidade e de s’azzudu de sos divressos campos, in d’unu tzentru chi dae annos si dedicat a sa ghia in daenanti de sos casos de bugnos in sa ginecologia. S’equipe de Ginecologia e Ostetricia de Chieti, cun s’azzudu de sos ispidales de Ortona e Chieti, in sos urtimos 12 meses ant acciappidu e curadu pius de 60 casos de bugnos a sa entre, una de sas maladias pius fittianas de s’inginnu femininu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Casteddu abberit una domo de accasazu nova po feminas chidrinas: logu fintzas a sette istranzas cun azzudu educativu.

Casteddu dat su benennidu a unu logu novu dedicadu a s’accasazu e accottu de feminas chidrinas. Sa domo nova de accasazu, abberta dae pagu, at a podere accasazzare fintzas a sette pessonas, apparande pro issas unu logu siguru e diffendidu in su cale bivere donzi die cun s’azzudu de personale qualifficadu.

Donzi istranza at essere accostada dae abbessiadoras ispecializzadas, chi ant a garantire accumpanzamentu personale e azzudu in sas attividades de donzi die, cun s’intentu de favoressere s’autonomia personale, sa creschida emotiva e s’incluisione sotziale. Sa domo naschet dae su contribbudu intre entes locales, assotzios de su terzu campu e proffessionistas de su sotziale, cun s’intentu de rispondere a sos bisonzos beros e a s’ispissu delicados, comente problemas accolomicos, isolamentu, situatziones de violentia o difficultades familiares.

Sa domo nova de accasazu non est solu unu logu de cuberiu: cheret essere puru unu puntu de relata po caminos de recuida sotziale e de su tribagliu, gratzias a buttegas, attividades educativas e mamentos de azzudu psicologicu. Donzi assione est pensada po rispettare sa dignidade de sas istranzas e po creare unu logu de iscurtu, cunfrontu e siguresa.

Sas attividades de donzi die, s’accostamentu custante e sos mamentos de socializzatzione azzuant sas feminas a accattare sa cunfiantza in issas ettottu e a fraigare afficos novos de vida, binchinde soledade,fertas e dilighesa. Sas istitutziones locales ant evidentziadu s’importantzia de cosas commente custa, capatzes de dare rispostas beras a sas dilighesas de sas feminas e de affortigare sa retza de sos servitzios sotziales in tzittade. Sa domo nova est duncas unu passu de signifficu po sa comunidade casteddaja, apparande opportunidades de recuberu, autonomia e azzudu a sas feminas chi nde tenent prus bisonzu.

Addià de su beneffissiu lestru po sas istranzas, custa domo de accasazu, imbidat puru a unu cunsideru prus mannu supra sa sotziedade: cantu est importante creare retzas de azzudu  e logos amparados pro chie bivet mamentos de difficultade?

Attività realizzata col contributo della Regione Sardegna — IMPRENTAS 2024-2025. LR 22/2018, art. 22