Triulas passadu est bistadu su secundu mese pius cardu chi si siat mai registradu in tottu su mundu, cun d’una temperadura mèdia de s’aera de 17 grados Celsius, binchinde de 0,68 grados sa mèdia de sa sumana intra su 1991 e su 2020.

Custu datu, frunidu dae su Copernicus Climate Change Service, incluidit sos calculos de tottu su mundu e est solu pius pagu bassu de su record de su mese de triulas 2023, cun d’una differentzia de 0,04 grados.

Custos numeros mustrant comente semus bivinde temperaduras chi sunt in mèdia pius artas in cunfruntu de su tempus passadu e simanas de istiu cun attas de calura chi non bi sunt mai bistadas apprimu.

In Sardigna, su mese de triulas de s’annu passadu est bistadu meda distintu po sas eccessiones de sa temperadura, cun massimas chi ant binchidu de pius de 3 grados sa normalidade. Sunt bistadas medas sas dies in sas cales si est arrivadu a pius de 40°C. Su mese est bistadu marcadu dae passadas de cardu fortes meda, chi ant fattu registrare sas temperaduras pius artas chi si siant mai bidas in s’isula, arrivande a un’atta de 48,2 °C, commente narat s’Arpas, in d’unu documentu pubbricadu dae pagu supra Sardegnambiente.it.

Custu cardu urtimu non che accabbat nemmancu cando si che andat su sole, puitte su fenomenu de sas nottes tropicales, cussas in sas cales sa temperadura non che calat mai sutta de sos 20 grados, est diventadu semper pius cumune. Un’atteru fattore chi influentzat in manera manna supra su bennessere umanu e de sos animales, est s’umidesa, chi faghet intenderede de pius su calore chi si intendet e tenet unu rolu de fundamentu in su mundu de
su pesamentu, puitte permittit de connoschere sas cunditzione de stress po su bestiamene.

Sa sumana intra lampadas e capidanni 2023 at tentu valores de umidesa supra sa mèdia, cun cunseguentzias chi si podent biere supra sa salude de sos animales de pesamentu. Sas temperaduras artas de s’istiu, postas impare a s’umidesa arta, ant creadu un’ambiente meda pius diffitzile de controllare, evidentziande sa necessidade de mesuras agualadas po diffendere sos omines e sos animales dae sos istallidos de su furriu de su clima.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

S’arte de su tessinzu in Sardigna: filos de istoria, identidade e bellesa chentza tempus.

Sa tessidura in Sardigna est un’arte millenaria, abbarbada in fundaria in s’istoria e in sa vida de donzi die de s’isula. Unu sapere antigu, passadu dae mama a fiza, chi in sos seculos at revertidu materiales simples comente lana,linu e cotone in manivattos unicos,fattos po mesu de telarzos a manu orizontales o ritzos.

Intre sas eccellentzias regionales prus de signifficu bi sunt sos tappettos sardos, nodidos po sa calidade de sos tribaglios e sa ricchesa de sas decoraduras. Meda isparta est sa tennica de su pibiones, giammada gai pro itte ammentat sos pupujones de s’aghina. Custu tribagliu, chi creat disignos tridimensionales supra sos pannos, est una de sas prus cumplessas e ammaghiantes e acciappat s’espressione massima sua in tzentros comente Samugheo, Nule e Mogoro.

Accanta a sos pibiones, un’attera tennica de su connottu, isparta meda est cussa a lizzos, chi permitit de faghere motivos geometricos cadrios e chi si repitint. Non mancana tribaglios prus antigos e reffinados comente su puntu a traccu, impittadu mescamente po decoraduras essentziales e ideales, e sa produssione de s’arbaxi, unu pannu de lana chi no est tribagliada, cumpattu e chi non faghet passare s’abba, chi a s’ispissu fuit impittadu po bistires de su connottu e manteddos.

Sa Sardigna mustrat una variedade istravanada de tzentros de produssione, donzunu cun d’una forma chi si reconnoschet. Samugheo, in su coro de s’Aristanesu, est cussideradu su logu printzipale de s’artesanadu tessile sardu e accasazzat unu connottu bivu, chi fintzas oe est capatze de si mezzorare chentza perdere sas raighinas suas. Nule, in sa costera, est tzelebre po sos tappettos in lana dae sos colores cadrios e dae sos motivos geometricos detzisos, mentres Aggius, in Gaddura, si annodittat po cosas fattas a manu dae sas tonalidades prus cardas e naturales,ispiradas a sa bista granitica de s’iscrocca.

Unu rolu de primu pianu ispettat fintzas a Mogoro, nodidu po sa produssione de tappettos e aratzos e po s’istorica viera de s’artesanadu, chi donzi annu faghet arribare bisitadores dae tottu s’isula. Atteros tzentros importantes sunt Isili e Busachi, inube sa tessidura sighit a essere pratigada secundu tennicas de su connottu, manteninde biva una cultura de su “faghere” chi resistit a su tempus.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22