Gratzias a una delibera de sa Giunta de pagu tempus faghede, approvada su 28 de lampadas, ammos introduidu una misura de accottu importante meda po sa mobilidade aerea de sos tzittadinos chi bistant in Sardigna.

Custa detzisione, solu po s’annu 2024, tenet una dodassione de dinari in su cumplessu de 5 miliones de euros, commente at nadu s’assessora de sos trazos Barbara Manca.

In custu tempus, sunt bistadas presentadas dimandas de rimborsu po casi 50.000 euros. Sas summas chi bi sunt sunu 500.000 euros po su 2023 e 4.965.406 a cuminzare dae su 2024. Sa misura serbit po unu contribbudu supra su pretziu de su billette de s’aereo, cumprendinde tottu sas impostas e ispesas chi su trazzeri at fattu pagare a su biazadore.

Custu poned in mesu sos servitzios chi dant in pius, commente badalcios extra e sa pigada prima de sos atteros, in sos collegamentos dae sos aeroportos de sa Sardigna a sos aeroportos de s’Europa. Mancari custu, sos bolos in continuidade sunt escludidos dae custu azzudu.

Una de sas novidades printzipales de custa proposta est cussa de dare su contribbudu a tottu sos tzittadinos chi bistant in Sardigna, chentza nissuna distintzione de edade. Fintzas a commo, cos contribbudos potiant essere dimandados solu dae sos zovanos fintzas a sos 26 annos de edade e dae sos chi nde tenent pius de 65.

S’illascamentu de sa platea est puru po su passadu: tottu sos bolos fattos dae su 14 de nadale de su 2023 nde ant podere gosare, mancari s’importu de su contribbudu at essere calculadu cun sa misura nova solu po sos bolos fattos dae su 1° de triulas de su 2024.

In pius, puru sos collegamentos fattos cun d’unu iscalu in mesu de su percursu de su trettu europeu, ant essere cunsiderados bonos po retzire s’azzudu sotziale po su trazzu aereu. Custu balet puru si s’iscalu in mesu de su trettu ,cando est in d’unu de sos aeroportos de Roma Fiumicino o Milano Linate, chi commo sunt faghinde servitziu pubbricu po su fil’appare de s’iscrocca, bastet chi su percursu siat comporadu cun d’unu billette unicu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa Grutta de sa Pipera de Casteddu, intre istoria e paristoria.

A pagos passos dae su tzentru de Casteddu, accanta a sa carrela chi che leat a su campusantu de Tuvixeddu, si agattat unu de sos monumentos pius ammaghiantes e prenos de misteru de sa tzittade:sa Grutta de sa Pipera. Est unu sepurcu romanu iscavadu in sa rocca, de su I° seculu d.C., divennidu tzelebre no solu po sa bellesa architettonica sua ma fintzas po sa paristoria chi lu inghiriat.

Sa tumba fuit bistada fatta fraigare dae Lucio Cassio Filippo, nobile romanu chi arribaiat dae Cartagine, po sa muzzere Atilia Pomptilla, morta in Casteddu in su mentres de su disterru de su maridu. Sas iscrissiones intro de su sepurcu contant un’istoria de amore e devossione: secundu su connottu, Pomptilla diat aere donadu sa vida sua a sos deus po sarbare cussa de su maridu, chi si fuit ismalaidadu in su mentres chi fuit in Sardigna. Ma su chi rendet sa Grutta ancora pius enimmatica est sa presentzia, isculpida in sa fatzada, de duos terpentes imboligados.

Dae inoghe naschet su nomene “Grutta de sa Pipera”. In su tempus, a inghiriu de cussas friguras sun bennidos a pizu paritzos contos populares. Bi est chie at interpretadu sos terpentes comente conas de eternidade e protessione de s’anima de sos mortos, atteros bi ant bidu unu zubilu a sos cultos de s’antiga Roma o unu signu magicu capatze de che istesiare sos ispiritos malos.

Oe sa Grutta de sa Pipera est unu de sos logos archeologicos pius bisitados de Casteddu e sighit a esercitare un’ammaju forte supra sos bisitadores. S’aera sua suspesa intre contu e istoria, s’amore eternu chi ligat Pomptilla e Lucio Cassio Filippo e s’aria de misteru de duos terpentes isculpidos in sa pedra faghent de custu logu una cona de sa tzittade, capatze de contare no solu unu picculu de s’istoria romana sua ma fintzas sa fortza chi non morit de sas paristorias chi resistint a su tempus.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22