Una truppa de chircadores de s’Ispagna, at fattu un’iscoperta istravanada: intro de una cassa de campusantu de 2.000 annos faghet, ant acciappidu binu chi fit ancora licuidu, e chi est bistadu cunsideradu su pius anticu iscopertu in su mundu. Sa truppa de s’Universidade de Cordoba, at acciappidu custu binu in d’una tumba romana chi est in sa tzittade andalusa de Carmona.

Sos risurtados precisos de sos controllos, los ant pubbricados supra su periodicu de grandesa “Journal of Archaeological Science:Reports”. Po controllare chi esseret abberu binu e no unu licuidu chi poteret arribare dae perdidas de su terrinu oppuru chi esseret aria callada, sos chircadores ant fattu medas controllos chimicos meda artos.

Custos controllos cumprendiant sa medidura de su pH, sa chirca de materia organica, sa presentzia de sale minerale e atteras sustantzias chi poderant arribare dae sos restos de su mortu o dae sa mattessi cassa de bidru.

Su proffessore Josè Rafael Ruis Arrebola, capu de sa truppa de chirca, at contadu su logu in su cale ca cassa est bistada acciappada. Fuit posta in d’una tumba sutta de s’abba e iscavada in sa rocca, cosa chi at permittidu a sa cassa de addurare deretta e bene serrada po 2.000 annos.

S’iscoperta chi non si podet creere de custa cassa, chi intro teniat restos de un’omine inchisinados e su licuidu colore ruju chi si est cunservadu po 2.000 annos, at dadu sa possibilidade unica de podere esaminare sa chimica de su licuidu e accrarare chi esseret deabberu binu. Sa tumba, chi teniat 8 nitzas de coffu, teniat medas cassas, in mesu de sas cales bi fit cussa chi at custoidu su binu pretziadu meda.

Una borta acclaradu chi su licuidu fit binu, sos chircadores ant chircadu de cumprendere si esserat binu biancu o ruju, Sa mancantzia de acidu siringico, chi si format cando sa colorassione de su binu ruju si isfaghet, mustraiat in manera tzerta chi fit binu biancu.

Su binu iscopertu in Spagna est de su primu seculu pustis de Cristu, beninde cussideradu commente su binu pius antigu de su mundu. A innantis de custa iscoperta, su pius antigu fit de un’ampulla de binu acciappida in su 1867 in Spira, In Germania, chi arribaiat dae su quartu seculu pustis Cristu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa torrada de s’ora legale intre vantazos praticos e discumbenios pitticcos a s’incumintzu.

Cun s’arrivu de su beranu torrat fintzas una de sas mudas prus nodidas de s’annu. In sa notte intre sapadu 28 e dominica 29 martu sas lantzittas de sos relozos ant devere essere movidas a daenantis de un’ora. Custu determinat una notte prus curza e duncas un’ora de sonnu in mancus, mancari pro chie impittat telefoneddos e computer su coladorzu at essere in automaticu chenza deppere intervennere.

S’ora legale bi est in Italia dae su 1966. Est bistada fatta po irfruttare menzus sa lughe de su sole in sos meses de beranu e istiu, cando sas dies si allonghiant. Poninde a daenantis s’orariu si tenet prus lughe in sas oras de su sero, minimande gai sa netzessidade de impittare sa lughe artifitziale. Custa cosa battit beneffissios importantes.

Su primu est pro su risparmiu de energia, pro itte si azzendent prus pagu sas lughes in sas domos e sas tzittades, minimande gai sa netzessidade. Ma no est s’unica cosa positiva. Sas dies parent prus longas e custu cambiat fintzas sos imbitzos de sas pessonas. Si tenet prus tempus po istare in fora, po faghere attividade fisica oppuru pro si abbambiai pustis de su tribagliu o s’iscola. Fintzas sa vida sotziale nde tenet unu vantazu.

Non bisonzat peroe de s’ismentigare sas cosa prus pagu positivas. Sa muda de s’orariu podet creare carchi difficultade in sas primas dies. Carchi pessona s’intendet prus istracca,faghet fadiga a s’indischidare su manzanu o tenet problemas a si drommire su sero. Podent apparessire fintzas alteriosidade e difficultade a si cuncentrare. Sas pessonas prus sensibiles sunt a s’ispissu sos pitzinnos, sas pessones giai istraccas e chie tenet problemas de sonnu.

Pro issos, s’abesare dimandat carchi die in prus. Mancari custos problemas a s’incumintzu, s’ora legale sighit a essere impittada pro itte sos benefissios totales sunt cussiderados prus mannos. Pustis de pagas dies su numeru prus mannu de pessones si abbituat a s’orariu novu e torrat a incumintzare sas attividades chena problemas particulares.

Pro congruire, su coladorzu a s’ora legale est unu cambiu pitticcu chi dimandat unu tempus curtzu pro si adattare, ma chi apparat acchittos beros in sa vida de donzi die. Seros prus longos,impittu prus mannu de sa lughe naturale e sas opportunidades de bistare in fora faghent de custu tempus unu de sos prus appretziados de s’annu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22