In su cursu de un’annu, 8.314 pessones ant abbandonadu sa Sardigna.

S’appitzicu METE de su CREI-ACLI, chi osservat sos fenomenos de tramuda in s’isula, e los cameddat a s’ispopulamentu e s’isviluppu de s’accolomia, evidentziat una situassione demograffiga chi affuscat meda: secundu sa comunicassione de s’ISTAT de su 2024, sa Sardigna est a s’urtimu postu in Italia po sa saliosidade, cun 0,91 fizzos po donzi femina, cumparadu cun sa media natzionale de 1,20. In pius, est sa segunda regione, pustis de sa Basilicata,po reduimentu de sa popolatzione in sos urtimos doighi meses.

In su 2023, sa Sardigna at perdidu 8.314 abitantes, cantu sa populassione de Durgale. Dae su 2016 a su 2024, s’isula at bidu unu calu de sa populassione de 88.000 abitantes, chi si podet cumparare a sa summa de sa populassione de Quartu S.Elena e Sestu.

S’ischittiu naturale po su 2023 addurat negativu: sos mortos (18.563) sunu meda pius de sas naschidas (7.231), cun d’una differentzia negativa de 11.332 in mancus. Puru s’ischittu de sa tramuda intro de s’isula est negativu (-598), faghinde cumprendere chi pius pessones abbandonant sa regione in cunfrontu a sas chi afferent. Intames, s’ischittu de sa tramuda cun su forastigu est torradu positivu (+3.616), marcande unu creschimentu de sos foristeris chi seperant sa Sardigna commente puntu de arrivu.

A su 1° de bennarzu 2024, sa populassione foristera chi istaiat in Sardigna fit de 52.878 pessones, chi sunt su 3,4% de su totale regionale. Sa printzipale comunidade de foristeris afferrint dae sa Romanis, Senegal, Marocco, Cina e Ucraina, cust’urtima in creschida de su 16%, mentres sas comunidades senegalesas e de su Marocco mustrant una minimada pitticca. Puru sa comunidade tedesca est creschinde, cun d’unu creschimentu de su 5% in s’urtimu annu.

Mancari sas comunicassione de sos chi istant in Sardigna, no fettant cumprendere su fenomenu, sa comunidade argentina est creschida de otto bortas dae su 2016. Sa chirca, demografica e sotzioaccolomica, est bistada fatta puru po sas provintzias chi bi sunt como e po sas chi cherent cambiare, e puru po sas regiones istoricas. Custas chircas, evidentziant sa bivesa de su Nord/Est Gaddura dae su puntu de bista demograffigu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa torrada de s’ora legale intre vantazos praticos e discumbenios pitticcos a s’incumintzu.

Cun s’arrivu de su beranu torrat fintzas una de sas mudas prus nodidas de s’annu. In sa notte intre sapadu 28 e dominica 29 martu sas lantzittas de sos relozos ant devere essere movidas a daenantis de un’ora. Custu determinat una notte prus curza e duncas un’ora de sonnu in mancus, mancari pro chie impittat telefoneddos e computer su coladorzu at essere in automaticu chenza deppere intervennere.

S’ora legale bi est in Italia dae su 1966. Est bistada fatta po irfruttare menzus sa lughe de su sole in sos meses de beranu e istiu, cando sas dies si allonghiant. Poninde a daenantis s’orariu si tenet prus lughe in sas oras de su sero, minimande gai sa netzessidade de impittare sa lughe artifitziale. Custa cosa battit beneffissios importantes.

Su primu est pro su risparmiu de energia, pro itte si azzendent prus pagu sas lughes in sas domos e sas tzittades, minimande gai sa netzessidade. Ma no est s’unica cosa positiva. Sas dies parent prus longas e custu cambiat fintzas sos imbitzos de sas pessonas. Si tenet prus tempus po istare in fora, po faghere attividade fisica oppuru pro si abbambiai pustis de su tribagliu o s’iscola. Fintzas sa vida sotziale nde tenet unu vantazu.

Non bisonzat peroe de s’ismentigare sas cosa prus pagu positivas. Sa muda de s’orariu podet creare carchi difficultade in sas primas dies. Carchi pessona s’intendet prus istracca,faghet fadiga a s’indischidare su manzanu o tenet problemas a si drommire su sero. Podent apparessire fintzas alteriosidade e difficultade a si cuncentrare. Sas pessonas prus sensibiles sunt a s’ispissu sos pitzinnos, sas pessones giai istraccas e chie tenet problemas de sonnu.

Pro issos, s’abesare dimandat carchi die in prus. Mancari custos problemas a s’incumintzu, s’ora legale sighit a essere impittada pro itte sos benefissios totales sunt cussiderados prus mannos. Pustis de pagas dies su numeru prus mannu de pessones si abbituat a s’orariu novu e torrat a incumintzare sas attividades chena problemas particulares.

Pro congruire, su coladorzu a s’ora legale est unu cambiu pitticcu chi dimandat unu tempus curtzu pro si adattare, ma chi apparat acchittos beros in sa vida de donzi die. Seros prus longos,impittu prus mannu de sa lughe naturale e sas opportunidades de bistare in fora faghent de custu tempus unu de sos prus appretziados de s’annu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22