Su deppidu mannu de ammendas de 6 miliones de euros, accuccurradu dae s’automobilista iscopertu in su mentres de unu controllu de sa polizia de sas vias in su Limburgo de mesudie, in Belgio, at postu medas interrogos e at attiradu s’attentzione de sas autoridades locales e natzionales.

Custu fattu istravanadu at fattu connoschere su bisonzu de un’appriccu pius rigorosu de sas lezes supra sa sicuresa de sas vias e de sas ammendas po sos chi affaltzant su codice de sas vias. Sa polizia de su Belgio, imparis cun su “Servitziu Pubbricu Federale de sas Finantzias” (SPF), at cunfirmadu sa tzifra manna meda de sas ammendas, bogande a fora interessiu e pensamentos mannos. Intames, mancari sa comunicatzione de sa summa, sunt abbarradas dimandas meda chentz una risposta.

S’identidade de s’automobilista e sos elementos de sas infrassiones chi ant fattu arrivare a custu deppidu mustruosu non sunt bistadas comunicadas, addescande sa curiosidade e sas ispeculatziones supra commente siat bistadu possibile arrivare a un summa gai manna.

S’auto de s’omine esta bistada secuestrada pustis de essere bistadu frimmadu po unu compudu, ma s’incapassidade sua de pagare tottu sa summa, at pesadu atteras dimandas supra sa situassione finantiaria sua e supra sas cunseguentzias legales chi at a teppere affruntare. Custu casu no est unu abbenimentu isoladu. Faghet parte de un’operassione pius manna de sa polizia de su Belgio, po garantire sa sicuresa de sas vias e cumbattare sas macchissias supra de sas vias.

In su mentres de custa operassione, ant incassadu 18.000 euros de ammendas e secuestradas medas autos ghiadas dae pessonas chentza permissu o chi aiant leadu droga. Custu evidentziat su bisonzu de unu controllu custante e de un’applicassione pretzisa de sas lezes supra sa ghia e sa sicuresa de sa via, po garantire sa protessione de tottu sos chi usant sas vias.

Sa comunidade, commo est giammada a meledare supra commente prevennere cosas commente custas in su tempus benidore, aumentande sos controllos e s’educassione de sas vias, e garantinde chi sas ammendas po sas infrassiones de sas vias istorrent abberu. Solu po mesu de s’impignu de tottus e una collaborassione de sas autoridades e sa comunidade, si podet isperare de tennere vias pius seguras e rispettu de sas regulas po tottus.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Casteddu in difficultade: terza derrotta una fattu de s’attera e sa Cremonese si accurtziat.

Su Casteddu est bivinde unu mamentu complicadu meda.S’isquadra at perdidu po sa terza borta una fattu de s’attera e como sa classifica faghet un’attera borta frea. Sas atteras isquadras chi battagliant pro si salvare sunt recuberande puntos, e su vantazu de sos ruju e blau si est minimande semper de prus.

Su peus nuntzu est arrivadu dae Parma, inube sa Cremonese at binchidu.Cun custu risurtadu est arribada a solu tres puntos dae su Casteddu. Custu cheret narrere chi sa battalla po addurare in sa categoria est abberta de su tottu.

Sos numeros de sas urtimas partidas sunt negativos meda. In sas urtimas sette partidas, su Casteddu at leadu solu duos puntos. At perdidu chimbe bortas e pareggiadu duas. Est unu de sos peus risurtados intre sas isquadras chi chircant de si salvare. Eppuru, pagu tempus faghet, sa situsassione pariat divreassa meda: tres binchidas una fattu de s’attera aiant fattu isperare in d’unu finale de istajione prus tranchillu. Pustis de cussu mamentu positivu,peroe, s’isquadra si est frimmada. Fintzas sa sotziedade aiat leadu detzisiones pensande chi su peus esseret passadu, comente sa bendita de Luperto propriu a sa Cremonese, chi como est una cuncurrente diretta.

Sa classifica est ancora intzerta. Fintzas atteras isquadras si podent accostare o binchere su Casteddu. Sa Fiorentina diat podere andare a daenantis, mentres su Lecce podet tennere sos mattessi puntos. Tottu at a dipendere dae sos risurtados de sas partidas imbenientes prima de sa frimmada. Su mese de Aprile at essere importante meda. Su Casteddu at a deppere accomettare su Sassuolo in domo sua e pustis at a giogare in domo contra sa Cremonese. Sunt duas partidas de fundamentu pro cumprendere comente at andare a si accabbare s’istajone.

S’isquadra at a torrare a si allenare martis in Assemini, ma bi ant  essere medas ausentzias. Carchi giogadore est impignadu cun sa natzionale sua, comente Caprile e Palestra cun s’Italia. Fintzas Kilicsoy e Obert non bi ant a essere, gai comente Sulemana e fortzis Litetas, chi no est a su menzus. Unu nuntzu bonu arribat dae Borrelli, chi est recuberande e diat podere giogare dae s’incumintzu de sa prossima partida. Sa torrada sua est importante, pro itte su Casteddu at sinzadu pagu in sas urtimas partidas.

Como su Casteddu non podet prus isbagliare. Serbit una reatzione lestra pro evitare de finire in mesu de sos aggios. Sas partidas imbenientes ant a essere detzisivas pro si salvare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22