Coldiretti Casteddu, at fattu una proposta apprettosa a sos sindigos de sa Sardigna de su mesudie orientale: dimandare sa utta de calamidade naturale po cajone de s’assuttura grae meda chi est devastande s’iscrocca dae paritzos meses.

Custu appellu est bistadu fattu cun d’una littera mandada a sos primos tzittadinos de 25 Comunes de cussa zura, cun s’intentu de bischidare sas comunidades e alcansare unu accottu praticu. In sa littera mandata, su presidente e su direttore de Coldiretti Casteddu, Giorgio Demurtas e Luca Saba, evidentziant sa drammaticidade de sa situassione chi est imbrinucande sos massajos e sos pastores de sa regione.

Sa mancantzia de s’abba po parizzu tempus at cajonadu una crisi chi non tenet cabidianu, cun dannos mannos meda a sa laurantza e a sas attividades de allevamentu. Addaenantis a custa emergentzia, Coldiretti evidentziat s’importantzia de si interessare a sa lestra e cun detzisione, uninde sas fortzas cun sos sindigos de sos Comunes interessados, po apprettare sa Regione a declarare sa utta de calamidade naturale.

Sigundu Coldiretti, declarare sa utta de calamidade est necessariu po alcansare sos benes chi serbint a su sustentamentu de sas comunidades de sa campagna e sas attividades de produssione insoro, chi sunt bistadas accroppadas meda dae una crisi chi paret non dare asseliu. Sos massajos e sos pastores, chi sunt sos colondos de sas comunidades locales, sunt in d’una situassione critiga meda, cun meda problemas de colomia de oe e de cras.

In manera particularee, sa zura de sa Sardigna de su mesudie Orientale est bivinde una situassione critica, cun meda pastores chi teppent acomettare dannos dae s’assuttura e problemas po comporare sa provenda po cumpensare sa mancantzia de sos appassiadorzos. Custu at cajonadu cunseguentzias chi ant devastadu sos fatturados de sas dittas. Coldiretti, narat de tennere cunfiantza in sa sensibilidade de sos sindigos e dimandat una assione lestra meda dae parte de sas istitussiones po azzuare sas dittas in custa situassione drammatiga meda.

S’organissasione addurat disposta a dare sa collaboratzione sua a tottu sas amministrassiones chi anta a partetzipare po s’interessiu e su benessere de sas comunidades locales. Sos pensamentos po su motivu chi sa situassione potat diventare pius grae, sunt fundadas, tenende in cunsideru puru s’arriscu po sos cultivos de s’istiu e de s’attonzu, pustis de sas difficultades passadas in s’iberru e su beranu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Ballumene de isulas de sa Madalena: paradisu sardu intre abbas gristallinas e nadura innida.

Su ballumene de isulas de sa Madalena, chi si acciappat allargu de sa costa nord-orientale de sa Sardigna, affaccia a palau e a paga distanzia dae sa Corsica, est una vera prenda de su Mediterraneu e unu puntu de arrivu chi aunit bellesa nadurale, istoria e cultura. Cumpostu de pius de 60 isulas mannas e pitticcas, in meda de sas cales non bi istat niunu, faghet parte de su Parcu Natzionale de sa Madalena, una zura marina diffendida fatta po preservare s’ecosistema unicu e sa biodiversidade chi deffinint custas abbas.

Inoghe su mare si abbrandat in medas tonalidades de bleu e bleu-birde, mentres sa macula mediterranea e sas roccas assempiadas dae su bentu creant iscenas ammaghiantes. S’isula printzipale, Sa Madalena, est gameddada a sa Sardigna dae unu ponte chi partit dae Palau, e d’est su puntu de partentzia ideale po iscumbattare su ballumene de isulas. Su tzentru istoricu suo est un’intritzu de carrelas coloradas, pratas ispipillas e buttegas de artesanos inube iscoperrere sas tzeramicas, prendas e istoffas tipicas. Sa carrela panoramica chi l’inghiriat donat bistas chi che bogant s’alenu supra calas abbandadas e plajas de rena fine meda, chi andant bene po una frimmada in su sole o unu tuffu in s’abba gristallina.

Caprera, collegada a sa Madalena dae un’atteru ponte, est unu paradisu nadurale cun buscos carcos de oppinu, caminos de trekking e baias innidas.Intre sas pius famadas bi est Cala Coticcio e su resumene Garibaldinu, chi cunservat sa domo e sas cimerias de s’eroe de sos duos mundos. Spargi, inube non bi istat niunu, est una cofre de nadura innida, tzelebre po sas plajas suas comente Cala Corsara, Cala Soraya e Cala Granara, inube sa rena crara e su mare giaru creant iscenarios de cartolina.

Budelli est famada in tottu su mundu po Sa Plaja Arrosa, sucolore de sa cale est deppidu a picculos de corallu e conchillas. Sas isulas de Santa Maria e Razzoli, pius a norte, accisant cun sas bistas agrestes insoro, sos arroccarzos mannos e su faru chi dominat s’orizonte.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22