In sa mesa de progettatzione de s’iscrocca, ordimizzada dae su Tzentru de servitziu de su Cacip, est bistadu trassadu su camminu po sa costitussione de sa Prima Comunidade de Arrancu de annoamentu in su campu industriale de s’isula.

In s’addobiu, ordimizzadu dae sa Camera de Cummerciu de Casteddu e Aristanis, su mundu de sas dittas, at addobbiadu sos chi tribagliant in cussu campu, po connoschere tottu sos vantaggios che sas CER apparant a sos chi intrant a nde faghere parte.

In su mentres de s’addobiu, de prusu, est bistadu fattu su puntu supra de su disignu pilotu de su Cacip, chi est faghinde in d’unu magasinu idustriale de propriedade in Macchiareddu, un’impiantu de 50 Kw, chi at essere su coro de sa prima Comunidade de Arrancu chi at a incastrare sas dittas de cussu logu.

Su disignu est fadadu a s’ immanniare po ponnere a pare tottus sas dittas chi ant a tennere interessiu a sa partezipatzione a sa de Arrancu de su Cacip. Po Cristiano Erriu, segretariu generale de sa Camera de Cummerciu, po mesu de sa CER, si podent alcansare prusu iscopos: si trattat de istrumentos bonos, chi non solu permittint a chie nde faghet parte de abbassare sas ispesas, ma puru de tennere acchittos po s’ambiente e sa sotziedade.

Creo chi in d’una Regione commente sa nostra, inue s’84% de sos comunes tenent pius pagu de 5.000 tzittadinos, creare organissassiones po barattare s’arrancu siat una cosa fundamentale.

Tenimos s’intentzione de de partetzipare a su disignu de su Cacip, po azzuare sas dittas a collire sas opportunidades
de sas CER, e po dare unu cuntribbutu po assebertare modellos de arrancu differentziados po sas iscroccas. Barbara Porru, chi est presidente de su Cacip, ispiegat commente, dae su mese de Cabidanni passadu, cu Cunsorziu eppat fattu partire su meccanismu po faghere naschere una o pius comunidades de arrancu.

Sas dittas sunt una parte faghidora de custu disignu, e in custos meses ammos tribagliadu mescamente po isparghere sa cultura de s’arrancu cundivisu, creande unu portellu intro de su Cunsorziu, po connoschere itte serbit e sas esigentzias de sas dittas, e po ispiegare commente isfruttare sos acchittos de sas regulas.

Importante, in custu camminu, est bistadu su pattu fattu cun su mundu accademicu chi, attraessu s’azzudu de su professore Emilio Ghiani, de sa divisione de Inzenieria elettriga de s’Universidade de Casteddu, at permittidu de creare sa prima CER. Po su tempus benidore, peroe, at essere de fundamentu faghere partire una mesa tecnica cun Enel e Terna, po accolumare sa distantzia de sos impiantos de s’elettritzidade.

Massimo Carbone, espertu de Dintec, su cunsortziu po su rennobamentu tecnologicu de Unioncamere, ispiegat commente su barattu de arrancu de sos privados, siat sa solussione po sighire unu modellu de arrancu pius sustenibbile e de economia: sas CER cussentini de produere s’arrancu chi nos serbit, inue e cando, si tratta de unu sistema chi podet dare medas vantaggios, po custu penso chi siat doverosu andare in sas iscolas e promovere sa cultura de sas comunidades de s’arrancu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Nugoro,un’ambulatoriu novu po s’iscoperta de sa maladia de su tunnel carpale.

Sa setzione de Neurochirurgia de Nugoro at attivadu un’ambulatoriu novu dedicadu a s’iscoperta de sa maladia de su tunnel carpale, una de sas neuropatias pius presentes e chi inbalidant. Su disignu est bistadu possibile gratzias a s’arrivu de unu elettromiografu de urtima ingendra, comporadu cun fundos regionales, chi permittit de faghere esamenes de pretzisione manna supra sa velocidade de condussione motoria e de attibiscione.

S’istrumentu permittit de ottennere datos fidantziosos e lestros, mezzorande sa calidade de s’iscoperta de sa maladia e sa lestresa de s’interventu po la curare.

Donzi mercuris benint fattos otto esamenes cumpletos , cun su mattessi numeru de malaidos. In su mattessi mamentu de sa balutazione de cunfirma,su duttore ispecialista aberguadat si serbit un’operassione. In casu de risposta affirmadiva, su malaidu benit postu derettu in sa lista de sas operassiones, minimande sos tempos de isettu e faghinde divennere pius simple su caminu sanidariu.

Sinitziativa, naschet cun s’intentu de minimare sas listas de isettu non solu po s’iscrocca nugoresa, ma fintzas po tottu su cadinu de su tzentru-nord Sardigna.Su servitziu novu offerrit a sos malaidos una resposta lestra e cualifficada a una maladia isparta, chi si no benit curada, podet cumpromittire in manera importante sa calidade de sa vida.

Intro de s’ambuladoriu est fintzas possibile de iscoperrere atteras maladias chi appisturant su sistema de sos nerbios foranu,comente sas maladias de ingorramentu de su nerbiu ulnare, accreschinde sa possibilidade de l’iscoperrere a sa lestra e de essere controlladu dae s’ispecialista. Sos malaidos si podent accostare a su servitziu prenotande po mesu de su Cup, presentande s’impegnativa de su duttore insoro. Cun custa attvidade nova,sa Neurochirurgia de Nugoro si cunfirmat unu logu de relata po s’assistentzia ispecialistica e su mezzoramentu sanidariu,auninde tennologia avantzada e attentzione bera a sos bisonzos de sos tzittadinos.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”