In Orroli si cuat una prenda de sa coghina chi unit cun sapientzia su connottu e s’annoamentu: Su Coccoi Pintau cun Sou. Custu pane, chi at binchidu sa medaglia de arghentu a sos campionados italianos de panitzada de su 2024, affigurada un’estremadia de sos mastros, fruttu de sa passione de Simona Prasciolu, una giovana panitzadora sarda.

Su segretu de custu pane ispantosu, est in sa cumposissione perfetta sua.

Fattu tottu cun simula de ranu tostu “Senatore Cappelli” biologicu, chi arrivat solu dae sa filera sarda, e cun matriche naturale e cussinnadu dae sa famiglia de Simona dae pius de tres seculos, Su Coccoi Pintau cun Sou
est su risurtadu de una produssione de mastros artigianos fatta cun cura e passione.

Sa partetzipatzione de Simona Prasciolu a sa bogada a campu de sa Federazione FIPGC, at mustradu unu momentu importante meda po sa panitzada sarda. In d’una cumpetissione allutta meda, Simona at brilladu in mesu de atteros 21 mastros de s’arte bianca chi sunt arrivados dae tottu s’Italia, mustrande, non solu sa calidade de su pane sou, ma puru s’abilidade sua in s’annoamentu e in sa cura de sos particulares.

Su chi rendet unicu su Coccoi Pintau cun Sou est s’impittu de su ranu antigu meda “Senatore Cappelli”, e de sa matriche, chi donat a su pane unu sabore e una fortesa chi non si podent cunfundere. Su seberu de usare solu sustantzias biologicas chi arrivant dae una filera sarda est unu elementu fundamentale in sa produssione de custu pane de eccessione.

Kentos si impegnat a mantennere regulas artas de calidade in tottu sa filera de su ranu tostu “Senatore Cappelli”, poninde a pare pius de 35 massajos, tottu sotzios de Coldiretti,in s’approvistamentu de sas sustantzias.

S’accadessidu de Simona Prasciolu e de su “Coccoi Pintau cun Sou” no est solu una binchida personale, ma puru unu riconnoschimentu de s’importantzia de sa filera de su ranu tostu de sa Sardigna a livellu natzionale. Po mesu de s’impignu e de s’abilidade sua,Simona at contribbuidu a promovera sa tradissione manna de sa panitzada isulana,
apparande in su mattessi tempus una foghe fundamentale po sos talentos zovanos de su logu.

Coldiretti Nugoro-Ozzastra, po mesu de sas paraulas de su Presidente Leonardo Salis e de su direttore Alessandro Serra, tzelebrant su sutzessu de Simona Prasciolu e de Kentos, commente unu motivu de arroddu po s’iscrocca de sa Sardigna. Custos risurtados sunt un’ispinta po sighire a imbestire in sas fileras locales,preservande in su mattessi tempus sas tradissione antigas e favorressende s’annoamentu.

Su “Coccoi Pintau cun Sou” est pius de unu simple pane: est unu simbulu de passione,tradissione e calidade, chi mustrat a su menzus s’estremadìa de sa panitzada sarda.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Botulino, lunis sa lotomia de s’urtima morta in Casteddu.

Esamene a su Policlinico de Monserrato, po accrarare sos motivos de sa morte de Valeria Sollai, secunda morta in Sardigna pustis Roberta Pitzalis. At a essere fatta lunis 25 de austu in s’ispidale de Monserrato sa lotomia dimandada dae sa Procura de Casteddu po connoschere sos motivos
de sa morte de Valeria Sollai, sa cochinera de 62 annos morta po su botulino pustis de aere pappadu mandicu cun guacamole in su mentres de sa Festa Latina chi si est tenta a sa fine de triulas in Monserrato.

Sa femina fuit cuberrada dae chidas in s’ispidale Universitariu, inube fuit arribada in cundissiones giai graves. In sas prima dies, pustis sos interventos de urgentzia, pariat chi esseret mezzorada, ma sas dies passadas est arrivadu unu peoramentu chi che l’at leada a sa morte. Cussa de Sollai est sa secunda morte ligada a su botulino registrada in Sardigna in pagas chidas. S’8 de austu fuit morta, semper in Monserrato, Roberta Pitzalis, 38 annos, issa puru corpada dae su batterio killer pustis de aere partetzipadu a su mattessi abbenimentu. Custa pagina de cronaca sarda at abbolottadu e preoccupadu meda zente.

S’esame de sa lotomia, chi at essere fattu dae sos duttores de s’Universidade de Casteddu, at a serbire po accrarare in manera deffinitiva si bi potat essere unu ligamene intre sa cosa pappada e sa morte de sa femina, addia de dare elementos chi serbant a sas iscruccullas de sos zuighes po accrarare responsabilidades e manera de s’impestadura de sa cosa de pappare.

Sa muda at creadu preoccupatzione meda e attentzione dae parte de sas autoridades sanidarias, chi ant accreschidu sos controllos supra sa filera alimentare e cunfirmadu s’importantzia de cunservare bene sa cosa de pappare, mescamente in occasione de abbenimentos e manifestassiones pubbricas, chi in istiu sunt medas abberu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22