S’amore chene cunditziones de una mama e s’ ammentu chi non si podet iscantzellare de Luena, una femina de sa cale sa vida est bistada interrumpida troppu debresse dae unu bugnu a sas ovajas, si bogana a campu po mesu de un’initziativa chi non si podet creere, incumintzada dae sa mama, Maria.

Pustis de sa perdida dolorosa de Luena, a s’edade de solu 37 annos, Maria at detzisu de trasformare su dolore sou, in d’unu gestu de amore e isperantzia: at incuminzadu a contipizare unu giardinu ispantosu de tulipanos, su fiore preferidu dae fizza sua.

Cussu chi est incumintzadu comente una trauda modesta, est diventadu unu simbulu de impignu e deffessa in sa gherra cuntra su bugnu a sas ovajas. Su Giardinu de Lu, chi est in Pimentel, un’angulu galanosu de natura accanta a Casteddu, est diventadu meda pius de unu simple giardinu: est diventadu una cresia de bellesa e azzudu.

A gratzias a sa dedissione chi non s’ istraccat mai de Maria, su giardinu at bidu creschere e ocrire pius de 200.000 tulipanos. Donzi annu, cando arrivat beranu, su parcu abberit sas giannas suas, accollinde cun gioia tottu sos chi arrivant dae donzi parte de s’isula. Donzi tulipanu, ammiradu e comporadu, diventat unu attu pitticcu de su accottu in sa battalla cuntra su bugnu a sas ovajas.

S’assotziatzione “Su Giardinu de Lu” at fattu de sa missione sua, cussa de usare su dinari de sa bendida de sos tulipanos, po sustennere sa chirca e tottu sas initziativas po prevennere su bugnu a sas ovajas. Donzi mese de
Martu, cando abberit su giardinu, bi est unu abbenimentu distintu, cust’annu si prenettat po sapadu 16 martu, in su cale sas pessones tenent s’occasione de comporare prantas e de dare unu contribbudu a sa cajone.

Ma s’impignu de s’assotziatzione no est solu po bendere tulipanos. Apparat puru sa possibilidade de agguantare su disignu cun donassiones de cale si siat tzifra, incumintzande dae solu 10 euros. In pius, sas pessones podent adottare commente simbulu, unu picculu de terra in su Giardinu de Lu, cun differentes isseberos de donassione, chi cuncurdant a picculos semper pius mannos de su mattessi giardinu.

A gratzias a sa generosidade de cussos chi intzidint a custa initziativa, s’assotziatzione, podet sighire a finantziare sa chirca e incumintzare cun atteras initziativas po agguantare sas feminas corpadas dae su bugnu a sas ovajas
,mantenninde bia s’isperantzia e su determinu de Luena po mesu de donzi fiore chi ocrit in su giardinu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Botulino, lunis sa lotomia de s’urtima morta in Casteddu.

Esamene a su Policlinico de Monserrato, po accrarare sos motivos de sa morte de Valeria Sollai, secunda morta in Sardigna pustis Roberta Pitzalis. At a essere fatta lunis 25 de austu in s’ispidale de Monserrato sa lotomia dimandada dae sa Procura de Casteddu po connoschere sos motivos
de sa morte de Valeria Sollai, sa cochinera de 62 annos morta po su botulino pustis de aere pappadu mandicu cun guacamole in su mentres de sa Festa Latina chi si est tenta a sa fine de triulas in Monserrato.

Sa femina fuit cuberrada dae chidas in s’ispidale Universitariu, inube fuit arribada in cundissiones giai graves. In sas prima dies, pustis sos interventos de urgentzia, pariat chi esseret mezzorada, ma sas dies passadas est arrivadu unu peoramentu chi che l’at leada a sa morte. Cussa de Sollai est sa secunda morte ligada a su botulino registrada in Sardigna in pagas chidas. S’8 de austu fuit morta, semper in Monserrato, Roberta Pitzalis, 38 annos, issa puru corpada dae su batterio killer pustis de aere partetzipadu a su mattessi abbenimentu. Custa pagina de cronaca sarda at abbolottadu e preoccupadu meda zente.

S’esame de sa lotomia, chi at essere fattu dae sos duttores de s’Universidade de Casteddu, at a serbire po accrarare in manera deffinitiva si bi potat essere unu ligamene intre sa cosa pappada e sa morte de sa femina, addia de dare elementos chi serbant a sas iscruccullas de sos zuighes po accrarare responsabilidades e manera de s’impestadura de sa cosa de pappare.

Sa muda at creadu preoccupatzione meda e attentzione dae parte de sas autoridades sanidarias, chi ant accreschidu sos controllos supra sa filera alimentare e cunfirmadu s’importantzia de cunservare bene sa cosa de pappare, mescamente in occasione de abbenimentos e manifestassiones pubbricas, chi in istiu sunt medas abberu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22