Torrana supra de su cataffale de sa musica italiana, po contare su presente, cun sa oghe insoro affilada e s’armudiu chi istrasinada. Sos Istentales, sa truppa etno-pop de sos massajos e pastores pius accramados de sa Sardigna, torrana cun “Zustissia Mala”- Libertade negada” una cantone de Gigi Sanna, su grande capu de sa truppa, chi contat sa dolorosa muda zuditziaria de Beniamino Zuncheddu, chi at passadu 33 annos in presone, po s’istragu de Sinnai de s’8 de bennarzu 1991, in sa cale tres vidas sunt bistadas segadas, e una sola fit iscampada po meraculu, diventande testimonzu crae, de cussa disgrassia, cunfidande de essere bistadu cunbinchidu dae unu de sas fortzas de s’ordine a
reconnoschere issu commente s’assassinu.

Po mesu de sa boghe intrante de Gigi Sanna e sas notas chi abbortigana de Davide Guiso,”Zustissia Mala- Libertade negada” si pesat commente unu affissu appassionadu e unu donu a un’omine chi at pagadu su prezziu pius artu: perdere sa libertade. Sos Istentales, dae sempere accommettana sos temas pius buddidos de sa Sardigna: secuestros de pessones ,emigrassione, vindittas, ingendrande cun arrenegu e cun attuamentu sos dannos mannos chi cajonant a s’immagine de s’isula.

Su nomene Istentales, no est una tradussione a sa littera, ma ammentat sa figura de un’istedda de sa costellazione de sos bastones de sos tres Res, chi unu tempus fit usada dae sos pastores e dae sos massajos, commente ghia po sa semenadura. Est sa prima istedda chi bessidi a su inchinadorzu e s’urtima chi si che andada a s’arbeschida, simbulu de isperantzia e orientamentu.

In 25 annos de attividade, sa truppa nugoresa, at fittadu medas cantones e at giuttu sa musica sua in giru in sas presones in Sardigna e puru in su restu de s’Italia, arribande in logos commente Spoleto ,Casteddu, Milano,
Padova, Volterra, Tattari e Nugoro. Ant puru pubblicadu unu libbru chi chistionat de s’esperienzia de sa presone,trasformande sa musica insoro in d’unu mediu de fughida e de isperantzia.

In sos annos, sos Istentales ant tribagliadu puru cun artistas famados meda,commente Nomadi, Vecchioni, Finardi, Bertoli, Tullio De Piscopo, Modena City Ramblers, Elio delle Storie Tese e Cristiano De Andrè. Sa truppa, cumposta dae Gigi Sanna, Luca Floris a sa batteria, Sandro Canova a sa chiterra basso e Frantzisca Lai a sos cussertos, si est annodittada po sos nuntzos insoro, meda beros chi rifrettene sa vida de onzi die e sas tradissiones de sa Sardigna, chin d’una franchesa e una derettura chi corpant derettu a su coro.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

S’archìviu de Màrio Faticoni divenit digitale e bi podent intrare totus.

S’archìviu de Màrio Faticoni, atore, regista e iscritore protagonista de sa cultura sarda, divenit como digitale e totus b’ant a pòdere intrare. Costòit pius de barant’annos de atividade teatrale e culturale de sa Sardigna. Est istadu irrichidu cun vìdeos, pìculos de ispatàculos e àteru materiale documentàriu, oferinde un’ogriada prena subra de s’istòria de su teatru de s’ìsula nostra dae sos annos Sessanta a oe.

Su sito web nou l’ant resu fruìbile a totus in sa matessi die chi issu at cumpridu sos annos, e ocannu nde faghet 88. Custa die est su 20 de
capidanni. Faticoni est unu de sos fundadores de su Teatru de Sardigna e at regortu in sos annos artìculos, fotografias, documentos e materiales de iscena in cantidade manna. Custu est su primu archìviu teatrale de totu sa Sardigna, chi su Ministèriu de sos Benes Culturales at riconnotu comente de importu mannu. Meda de totu cussu chi b’est in cust’archìviu est istadu donadu in su 2022 dae su Museo archeològicu natzionale de Casteddu. De sas cosas pius de importu, tocat de montovare, in sa banda de su giornalismu, un’intervista fata dae Faticoni a Costantinu Nivòla in Nova York.

Sos documentos de s’archìviu sunt istados campaniados dae Faticoni paris cun s’assistente sua Simona Loddo. Su portale, invetze, est istadu fatu dae s’istùdiu de Afredo Scrivani e regollet cosa meda, chi est de annos e annos de carriera. Faticoni, nàschidu in Verona, si nd’est bènnidu a istare a Sardigna, ube at regortu documentos meda. Custu sito web nos contat s’istòria de su teatru sardu, dae sos primos esperimentos de su Cut- Centro universitàriu teatrale in su 1959 fintzas a cando est nàschidu su Cit.

In s’archìviu b’at testos, regias, betadas de manu e distimonias de sas produssiones pius noas, cun una bisione bene fata de s’atividade artìstica de Faticoni e de su rolu tzivile, sotziale e polìticu chi at tentu su teatru sou in Sardigna.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22