Sa Sartiglia 2024 est concruida cun sa magnifficintzia de sas 12 isteddas de sos mastros de linna e sa proa desamplada de sas amasonas aristanesas.

Cust’annu, sa cursa si est tinta de rosa, gratzias a sa desamplada proa de battoro de sas doighi isteddas, supra unu totale de sessantases caladas, tzentradas dae Elisabetta Sechi, Sonia Cadeddu, Antonella Rosa e Ilaria Rosa. Su pubblicu at pottidu assistire a unu ispettaculu beru de destresa, cun d’una porfia, chi at mantesu tottus cun s’alenu suspesu, fintzas a s’urtimu momentu.

Sa tzerimonia de sa bestidura de su Componidori, est bistada unu momentu de accanizzamentu e tradissione mannu. Fabrizio Manca, si est affidadu a sas manos abbiles de sas massajeddas de su Gremiu de Santa Zuseppe, po su bistire de sa tradissione, sighinde onzi colada cun rispettu mannu po s’istoria e sa figura chi ammustrat. Su momentu de s’intrada de su Componidori in Domo Pruneddu,e sa benedissione sua a su pubblicu, ant antitzipadu una cursa chi affaschinat e est carriga de emossiones.

Su iscumbattu den tzentrare s’istedda est bistadu su momentu curumenale de sa die, cun sos menzus cavalleris chi si sunt isfidados cun corazu e determinu. A pustis de undighi iscumbattos in sos cales non sunt resessidos a tzentrare s’istedda, est bistadu Enrico Fiori a segare sa coniura, sighidu dae sas desampladas proas de Elisabetta Sechi, Fabrizio Pomogranato, Alessio Garau e galu atteros.

Sas amasonas aristanesas ant dadu su chi potiant, cun Antonella Rosa e Ilaria Rosa chi ant tzentradu sa deguma e sa de undighi isteddas. S’urtimu tzentru de sa die est bistadu cussu de Andrea Concas, chi at fattu arrivare sa suma de sas isteddas a doighi, agualande su risurtadu de sos massajos de dominica passada.

Mancari sa proa cun s’istoccu non eppat cambiadu su risurtadu finale,su Componidori Fabrizio Manca at saludadu su pubblicu cun d’una remada carriga de ingraenzu e rispettu. S’abbenimentu est congruidu cun sa Cursa de sas parizas, sigillande in custa manera sa fine de una Sartiglia chi non si at podere ismentigare.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Turismu, record novu po sa Sardigna: presentzias meda

Sos datos de s’istajone 2025 mustrados a sa Bit de Milano.

Su 2025 est bistadu un’annu eccetzionale po su turismu in Sardigna, cun numeros de record de bisitadores chi ant cunfirmadu s’isula intre sos logos prus disizados de su Mediterraneu. S’istajone at registradu una creschida custante in sos mesese de istiu e fintzas in s’istajone bassa, mustrande comente semper prus turistas seperent sa Sardigna fintzas in beranu e attonzu,attirados non solu dae sas plajas suas, ma fintzas dae sa ricchesa de cultura, natura e enogastronomia.

Sa capatzidade ritzettiva de s’isula est creschida meda, cun albergos e extra albergos novos, chi ant permittidu de accasazzare bisitadores chi arribant dae tottu s’Italia e dae fora. Intre sos istranzos sunt parizzos sos turistas chi arribant dae Germania, Francia, Svizzera e Regno Unito, mentres in Italia, sa Sardignas addurat unu logu preferridu po chie benit dae Lombardia e Lazio. Fintzas sos aeroportos de s’isula ant registradu una creschida de sos passezzeris, cunfirmande un’accreschimentu custante e s’interessu internatzionale pro sa Sardigna.

Addia de su turismu balneare, est creschinde meda s’offerta ligada a sos abbenimentos culturales, isportivos e a sa balorizzatzione de sos burgos e de sos caminos intre s’isula, chi at permittidu de dividere sos arrivos in atteras istajones e apparare esperientzias divressas. Abbenimentos comente su Giru de Sardigna in bicicretta e s’Americas Cup de bela in Casteddu sunt opportunidades importantes po faghere arribare bisitadores fintzas in sos meses chi benint cussiderados prus calmos, cun recaidas positivas po s’accolomia locale e po sos albergos de s’isula.

Su sutzessu de s’istajone 2025 cuffirmat s’importantzia istrategica de su turismu po s’accolomia sarda. Non si trattat solu de numeros e presentzias, ma de una parte chi dat unu contribbudu a mantennere bivu su connottu, balorizzare su patrimoniu naturale e culturale e creare logos de tribagliu. Sa Sardigna est mustrande de essere capatze de apparare unu turismu sustenibbile, divressu e de calidade, capatze de faghere arrivare bisitadores italianos e istranzos tottu s’annu.

Abbaidande a su tempus benidore, s’isula puntat a affortigare de pius custa creschida, imbestinde in sa promotzione internatzionale, in sa cura de sas iscroccas e in sa balorizzatzione de tottu su chi rendet sa Sardigna unica in sa bista de su mediterraneu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22