Dae su 23 a su 26 santandria, Macumere at a acasagiare sa de bintuna editziones de sa Mustra regionale de su libru imprentadu in Sardigna, consolidende·si comente  su tzentru culturale de s’ìsula. Organizadu in collaboratzione intre s’amministratzione comunale de Macumere, s’Assòtziu editores sardos (AES), l’Atzentro servìtzios culturales e sa Biblioteca comunale, s’eventu s’at a acumprire in sos setores Tamuli e Filigosa de sas ex Casermas Mura, unende a pare editores, iscritores e amantiosos de libros.

Su tema ghia de ocannu est “Sardigna Ìsula a s’ispigru”, unu remonu a sa solidariedade, a sa dimensione sotziale e tzivile arraighinada in sos libros, sutaliniende s’importu de sa cultura e de sa literadura sarda. Sa presidenta AES, Simonetta Castia, evidèntziat sa netzessidade de amparare e animare s’editoria regionale sarda, chi rapresentat petzi s’1 pro chentu de sa produtzione natzionale.

Sa letura est cunsiderada unu trastu emblemàticu pro esplorare s’identidade culturale, geogràfica e antropològica istraordinària de s’ìsula. In su matessi tempus, si proponet comente unu limenàrgiu de rugrare pro adobiare s’àteru e fraigare unu mundu nou, inclusivou e creativu.

S’eventu bantat sa partetzipatzione de 34 editores bènnidos dae totu sa Sardigna, chi ant a espònnere sos catàlogos issoro in su Padiglione Tamuli. Su programa de sa mustra includet addòbios cun sos autores, leturas pùblicas, presentadas de òperas editoriales noas in italianu e sardu, laboratòrios pro sas iscolas e su cuntzertu “Il suono dei centenari” de su Trio Megalitico, cun sa partetzipatzione de su mastru de launeddas Luigi Lai.

Sa setzione “Tra isola e mondo” proponet 26 addòbios literàrios, cun tributos ispetziales a figuras comente cussa de Peppino Fiori, giornalista e senadore de sa Manca Indipendente, e Maria Pia Mossa, sa primu regista sarda. Ant a èssere  onorados Francesco Salis, fundadore de su Tzentru de cultura populare de Santu Lussùrgiu, e su poeta nugoresu Pasquale Dessanai.

Sa setzione dedicada a su patrimòniu de sa Sardigna, mutida “Sardegna per  immagini”, proponet sa presentada de volùmenes chi esplorant su patrimòniu archeològicu, istòricu e naturalìsticu de s’ìsula. Sos addòbios cun sos iscritores includent personalidades comente a Alberto Capitta, Nicolò Migheli, Eliano Cau, e medas àteros.

Sa Mustra dèdicat atentzione particulare a sos giòvanos a traessu su progetu “Adotta un libro sardo”, intregadu a sas iscolas primàrias e segundàrias. Prus de 1900 istudiantes ant a partetzipare a sas medas propostas, cun laboratòrios e addòbios, sustentados dae su Tzentru servìtzios culturales e de sa Biblioteca de Macumere. Unu momentu de aprofundimentu subra sas problemàticas de s’editoria est prevìdidu in su merie de domìniga su 26 santandria, abertu siat a sos prepostos a sos traballos siat a su pùblicu.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

‘Fèminas. Casteddu contra sa violèntzia’: unu percursu de ascurtu, caminu e autodefensa

Unu portellu de ascurtu, unu caminu rappresentativu e unu cursu de defensa personale: sunt calicunos de sos apuntamentos de sa rassegna “Fèminas. Casteddu contra sa violèntzia”, ordiminzada in occasione de su 25 de sant’andria, Die internatzionale pro s’iscartu de sa violèntzia contra de sas fèminas. Su tema seberadu pro custa edizione est “Fèminas fraigadoras de paghe”.

Sas initzativas ant a comintzare su 20 de sant’andria e ant a sighire fintzas a su 15 de làmpadas, creande unu caminu chi aunid in manera ideale sas tzerimonias de su 25 de sant’andria, de s’8 de martzu e de su 2 de làmpadas, cun s’intentu de mantènnere bivu su cunfrontu subra de sa violèntzia de gènere in totu s’annu. S’intentu est cussu de apparare continuitade e azzudu, azuande semper prus fèminas a reconnòschere situatziones de arriscu e a pedire azzudu.

Su calendàriu comintzat su 21 de sant’andria cun su Caminu de su filu ruju, dedicadu a su respetu e a sa sensibilizatzione. Dae su 24 a su 28 de sant’andria su portellu Ispàtziu Fèmina de su Tzentru clìnicu Agape at a propònnere dies de ascurtu e chistionadas de orientamentu abertas a chie intendet su bisònzu de unu azzudu ispetzializadu.

Su 25 de sant’andria, a sero bi at a essere unu mamentu istitutzionale de intuvuccamentu subra de su tema de sa violèntzia de gènere. Sa matessi die si at a serrare cun “Fèminas in seguresa”, unu seminàriu cun unu cursu chi no si pagat de defensa personale, cun inditzos subra de s’impreu de s’isprai a su piperoneddu.

Sa manifestatzione est cumprenssiva fintzas de unu “festival literàriu solidale”, pensadu pro inghìriare sa tzitade a mesu de leturas, addobios e testimoniàntzias. Cun “Fèminas”, Casteddu proponet unu impignu po tottus e continu: unu caminu chi aunid ascurtu, formatzione e partetzipatzione pro favoressere coscientzia e prevenzione intro de sa comunidade, in unu mamentu istòricu in ube prus chi mai, a dolu mannu, custu est unu tema chi tocat de giughere a s’atentzione de totus.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”