Jersu, sa bussa de istùdiu in memòria de Maria Vittoria Orrù est istada intregada a sa neodiplomada Camilla Corona. Sa cooperativa sotziale Zerocento de Faenza, paris cun su Comunu de jersu, at imbentadu custa bussa de istùdiu de su valore de 2.000 èuros pro onorare sa memòria de Maria Vittoria Orrù, una giòvana professionista de sas risursas umanas morta a 44 annos ebbia su 16 austu 2022.

Camilla Corona, in pessu chi diplomada a s’Istitutu Businco e como matrìcula de ingenieria biomèdica in Torinu, at retzidu sa bussa de istùdiu in unu collegamentu vìdeu. Custa initziativa est istada cherta meda dae Zerocento, una cooperativa sotziale de Faenza in ue Maria Vittoria Orrù aiat traballadu  pro 14 annos.

Sos 2.000 èuros de sa bussa de istùdiu ant a èssere destinados a sustentare sa continuidade in sos istùdios universitàrios de sas generatziones noas, in particulare cussos chi  benint dae categorias sotziales isvantagiadas. Custu gestu cheret onorare sa terra nadale de Maria Vittoria Orrù, ue aiat progetadu fintzas su benidore suo.

Sa tzerimònia s’est acumprida su 14 de santugaine in sa sala consiliare de su Comunu de Jersu, a sa presèntzia de sos istudiantes  de s’Istitutu Businco, ue Maria Vittoria Orrù si fiat diplomada. Intre sos presentes bi fiant su Sìndigu Carlo Lai, sa cussigera cun dèlega a sa cultura e a s’istrutzione, Belinda Locci, sos babbos de Maria Vittoria, sos parentes e medas tzitadinos.

Una delegatzione de sa cooperativa sotziale Zerocento fiat presente a s’eventu, ghiada dae su presidente Stefano Damiani. In  sa delegatzione fintzas Roberto Vaccani, dotzente de organizatzione e cumportamentu organizativu de sa SDA Bocconi, cun cale Maria Vittoria aiat collaboradu.

Stefano Damiani, presidente de Zerocento, at ammentadu Maria Vittoria comente una pessone istraordinària, onesta, abbista, curiosa e istimosa. Sas calidades umanas suas e professionales li ant permìtidu de crèschere e de afrontare sos disafios de sa vida e de su traballu cun resurtados mannos. Custu reconnoschimentu onorat sa memòria de Maria Vittoria Orrù e s’aficu chi at dedicadu a sa comunidade sua.

 “Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Sa bela manna torrat in Sardigna, s’isula at accasazzare una tappa prima de s’Americas Cup n°38.

Sa bela manna internatzionale est pronta a torrare in Sardigna. S’isula at accasazzare difattis sa prima gara de ammaniada de sa 38° Americas Cup, abbenimentu chi at a finire cun s’assignadura de su premiu in Napoli in su mese de Triulas 2027. Sa Regione at accraradu s’accordu chi at a permittere a sa Sardigna de bintrare pro sa prima borta in s’istoria de sa cumpetissione de sa bela prus de archida a su mundu.

Mancari sos particulares organissativos non siant bistados ancora deffinidos de su tottu, su logu prus probabbile de sa gara est Casteddu. Sa tzittade printzipale sarda est dae annos sa base de sas operassiones de Luna Rossa e est cussideradu unu de sos campos de gara ideales pro sas cundissiones de su bentu, calidade de sas abbas e logos de appozzu, elementos de fundamentu po accasazzare abbenimentos de custu livellu.

Pro sa Sardigna si trattat de una ghirada ispettata po meda tempus. Sas World Series de s’Americas Cup aiant giai iffrisadu s’isula in su tempus passadu, ma chentza mai esecutare. Una prima tentada est de su 2020, cando s’abbenimentu fuit bistadu iscancelladu pro su Covid. Una secunda occasione fuit prevedida po su mese de Santuaini 2023, cun garas in disignu dae su 12 a su 15 de su mese, ma fintzas in cussu casu tottu est bistadu annuddadu  meda tempus prima, intre condierros e tesones intre sa Regione e sos ordiminzadores neozelandesos, chi aiant battidu a sa
tramuda de sas garas in Jedda, in Arabia Saudita.

Sa delusione fuit pustis accreschida cun s’assignadura de sa 38° Americas Cup a Napoli, unu seperu chi aiat addescadu fintzas una dibatta importante de sa politica. Sa preparassione  chi si depet faghere in Sardigna est ora una ispecie de riscattu po s’isula, chi at a podere accasazzare sas primas garas uffitziales de su ciclu novu de sa cumpetissione e torrare a su tzentru de su giru belicu internatzionale.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22