Ùndighi fèminas indianas de su Kerala ant bidu cambiare desuncuna sa vida issoro gràtzias a unu billete de sa loteria de  2 èuros ebbia comporadu cun una colleta.  Custas traballadoras de una cooperativa de regorta e ismistamentu de sos refudos  ant otentu su primu prèmiu de sa loteria natzionale durante s’istajone de su monsone.

S’importu de sa bìnchida, de 100 milliones de rupias, est a nàrrere 1.109.154 èuros, est istadu su frutu de su contributu de ùndighi fèminas de su Kerala chi, paris cun sa cooperativa, ant investidu in unu billete de su balore de 250 rupias, overas 2,70 èuros, chi a s’agabbu est resurtadu binchidore. Noe de sas fèminas aiant investidu 25 rupias cada una, mentras duas de issas aiant contribuidu cun 12,5 rupias. Su billete fortunadu est istadu decretadu comente su binchidore de su primu prèmiu de sa loteria natzionale durante s’istajone de su monsone.

S’èsitu ditzosu de custu fatu dimustrat chi su modu de nàrrere “Torra a provare as a èssere prus fortunadu” a sa fine est beru. Sas fèminas indianas aiant giai primu de tandu intentadu sa fortuna pro àteras tres bias , sena bìnchere nudda. Nointames, custa borta s’insistèntzia issoro est istada premiada e cun un’investimentu de duos èuros ebbia sunt resèssidas a coronare su bisu issoro de devènnere millionàrias.

Sas neomilionàrias ant decraradu de tènnere unu programa pro impreare su dinare chi ant bintu: fraigare domos pro sas famìlias issoro, finantziare sos istùdios de sos fìgios issoro e  licuidare sos dèpidos issoro. In prus, est istadu sutaliniadu chi custas fortunadas ant a sighire a traballare a s’internu de sa cooperativa de regorta e ismistamentu de sos refudos, ue si sunt adobiadas duos annos e mesu a oe, dimustrende un’aficu costante in sa comunidade e in su traballu colletivu. S’esperièntzia issoro est un’esèmpiu  de comente a sa determinatzione, sa collaboratzione e sa fortuna potzant agiudare in su cambiamentu e in su megioru significativu de sa vida de indivìduos e de una comunidade.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Portale digitale novu in Nugoro pro mezorare s’impittu de sas meighinas.

Unu sistema digitale novu pro conduire menzus sas meighinas e mezorare sa calidade de sas curas gratzias a un’impittu prus attentu de sos datos. Est custu s’intentu de Duttore Digitale, unu portale creadu pro rendere prus fatzile sa tramuda de informatziones intre dittas sanidarias e duttores e pro minimare sos isperdissios in s’ispesa de sas meighinas.

Sa base permittit de controllare e registrare sas retzettas de sos duttores recoglinde e esaminande sos datos supra de sas meighinas.In custa manera donzi duttore podet biere in manera simple e azzorronada comente faghet sas retzettas e cunfrontare sos datos suos cun cussos de s’Asl. Su disignu est bistadu presentadu in Nugoro in su mentres de unu addobiu ordiminzadu dae s’Asl n.3 imparis a sas zuras sotzio sanidarias. Ant partetzipadu duttores de base, de sos pitzinnos e proffessioneris de sos ambulatorios de s’iscrocca.

Su portale permittit a sos duttores de controllare s’attividade insoro dae su puntu de bista de sos costos e de sas cantidades faghinde sas retzettas cun prus attentzione e bidinde si bi sunt errores o cosas chi no andant bene. Intre sas funtziones printzipales bi sunt bilancios personalizzados e sinnos automaticos chi azzuant a cumprendere si bi sunt differentzias in cunfruntu a sos istandard prevedidos, mezorande su controllu de sas retzettas.

Custu sistema est unu primu passu assa parte de un’impittu prus zustu de sas meighinas cun vantazos siada pro sos malaidos chi podent rezire curas menzus, siada pro su sistema sanidariu chi podet minimare sos affianzos chi si podent evitare e impittare menzus sas disponibilidades. Su portale at azzuare fintzas S’Asl a connoschere in presse meda sos problemas in sas retzettas e intervennere in manera lestra pro garantire un’impittu prus siguru e balidu de sas meighinas.

In afficcu istrumentos comente custos podent dare unu contribbudu a rendere sa sanidade semper prus moderna e accanta a sos bisonzos de sos tzittadinos. S’impittu de sos datos, difattis,permittit de leare detzisiones prus scientes e mezorare s’ordiminzassione de sos servitzios e accottare su tribagliu de sos duttores in su controllu de sos malaidos mescamente in sos casos prus cumplicados. Sa digitalizzassione si cunfirmat gai una leva de fundamentu pro fraigare unu sistema sanidariu prus balidu, agguantabile e capatze de apparare curas de calidade a tottus.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22