Su Comunu de Baunei sighit a mustrare s’aficu suo pro sa seguresa e su benèssere de sos tzitadinos e de sos visitadores  fatu de sa costa. S’amministratzione comunale at annuntziadu s’achistu de sete defibrilladores, unu est istadu collocadu in sa marina de Santa Maria, mentras sos àteros ses  sunt istados postos in Cala Goloritzé, Cala de Daddai, Cala Mariolu-Ispuligedenie, Cala Biriala, Cala Sisine e Cala Luna.

Su messàgiu de su Comunu at sutaliniadu s’importu de custa initziativa. Sos dipendentes de sa Marina, responsàbiles de sas operatziones in sa costa, sunt istados  formados pro impreare su defibrilladore in casu de apretu. Ogni die, carrant e ponent sos trastos in sas ses marinas indicadas, assegurende·si chi siant semper prontos pro eventuales situatziones de perìgulu. S’amministratzione at chertu espressare gratitudine e reconnoschimentu a sos dipendentes de sa Marina, chi acumprint ogni die custu servìtziu importante cun impinnu e professionalidade. Issos s’òcupant de garantire sa seguridade de sos bagnantes e de sos turistas, dimustrende una passione bera pro su traballu issoro e unu sentidu de responsabilidade in sos cunfrontos de sa comunidade locale e de sos visitadores.

In prus, s’amministratzione at chertu torrare gràtzias  fintzas su personale amministrativu de sa Marina pro su contribuidu pretziosu. Custas persones tenent unu ruolu fundamentale, coordinende totu sas fainas netzessàrias pro garantire s’eficatzidade de s’initziativa e pro suportare sos dipendentes chi òperant diretamente in su campu. S’investimentu fatu dae su Comunu de Baunei comprende sos aparatos mèdicos e in sa formatzione de su personale est una dimustratzione cuncreta de sa prioridade donada a sa seguridade de sas persones e a sa promotzione de un’ambiente prus seguru.

In fines, s’initziativa de su Comunu de Baunei est un’esèmpiu chi diat dèvere èssere pigadu in cunsideru fintzas dae àteras localidades costeras, ca sa seguridade de sos tzitadinos e de sos visitadores diat dèvere èssere semper una prioridade assoluta pro cale si siat amministratzione comunale. Sa preventzione e sa prontesa in s’afrontare situatziones de apretu sunt fundamentales pro creare un’ambiente seguru e pro totus.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Referendum supra sa zustissia, itte prevedit sa refforma supra sa cale ant a votare sos italianos.

Su 22 e 23 martu sos italianos ant essere giammados a votare pro detzidere si cambiare carchi parte de sa Costituzione in sa parte de su funtzionamentu de sa magistradura.Supra s’ischeda elettorale bi at essere una dimanda meda cumplicada pro itte bi sunt solu sos numeros de sos articulos de sa Costituzione chi ant essere cambiados, chena ispiegare in manera simple cale sunt sas novidades chi si prevedint.

Su referendum no est pro problemas medas chistionados de sa zustissia italiana, comente sos protzessos longos meda o sa mancantzia de pessonale in sos tribbunales. Su votu si cuntzentrat imbetzes supra s’ordiminzassione de sa magistradura e supra sas regulas de su tribagliu de sos magistrados. Sa refforma prevedit tres cambiamentos printzipales e importantes.

Bidimolos. Su primu est s’ispitzigu intre zuighes e pubbricos ministeros. Oe bintrant in sa magistradura cun su mattessi cuncursu e faghent parte de su mattessi assentu. Cun sa refforma sos duos caminos diant essere divididos in manera deffinitiva. Segundu chie agguantat su cambiamentu custa divisione diat faghere divennere su zuighe prus indipendente in su mamentu in su cale devet dezidere si una pessona est innozente o affartada. Chie est contrariu, invetzes, pensat chi su sistema de oe affiantzet giai ecchilibriu e chi ispitzigare de su tottu  sos duos rolos potat creare difficultades novas.

Su segundu puntu est pro su Cunsizzu Superiore de sa Magistradura, s’organu chi si occupat de sas carrieras de sos magistrados. Sa refforma prevedid de lu ispitzigare in duos: unu dedicadu a sos zuighes e unu a sos pubbricos ministeros. Sos partetzipantes diant essere seperados cun d’unu sorteamentu e non prus cun d’una elessione. S’urtimu cambiamentu est pro su sistema chi dezidit pro sas penalidades a sos magistrados. Sa refforma prevedit sa creassione de unu organismu novu chi si diat occupare propriu solu de custos protzedimentos.

Cun su referendum sos tzittadinos ant deppere seperare si mantennere sas regulas de como o faghere custos cambios in su funtzionamentu de sa magistradura italiana. In sas urtimas chidas custas votassiones ant tentu azzesu su cunfruntu politicu e sas animas de sos partidos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22