Sas marinas sardas sunt logos agradèssidos pro sa depositzione de sos oos pro sos tostinos. In manera reghente, sunt istados individuados tres nidos in diversas localidades costeras, tra custas Tortolì, Cuartu e Badesi. Custu evidèntziat s’importu e s’atrativa de sas marinas de sa Sardigna pro sa testùine caretta caretta.

Unu de sos ùrtimos acatamentos est acontèssidu eris sero in Cuartu Sant’Aleni. A pustis de èssere istada signalada sa presèntzia de una testùine, sas autoridades forestales ant acresuradu a sa lestra un’àrea manna de sa marina pro amparare su nidu. Sa mama testùine, a pustis de àere criadu sos oos, est posca torrada a mare. In sa matessi note est istadu iscobertu unu nidu nou in Cea, in sa regione de s’Ogiastra. In manera pretzedente, est istada signalada fintzas una depositzione in Badesi.

De signalare chi sa testùine caretta caretta at seberadu fintzas sa marina de Costa Rei comente  giassu de nidificatzione, agiunghende·si a Crabonaxa e Capu Malfatano. Sa noa est lòmpida eris cando unu turista, mentras giogaiat cun sos fìgios suos subra in sa marina de Piscina Rei, at fatu un’iscoberta ispantosa: unu nidu de testùine caretta caretta. Custas abbistadas cunfirmant s’importu de preservare e amparare sas marinas sardas comente a habitat naturale pro sas tartarughe marinas. Est essentziale adotare medidas de cunservatzione e sensibilizatzione pro garantire sa supravivèntzia de custa genia e su mantenimentu de custos pretziosos giassos de depositzione de sos oos.

Sos tostoinos marinos chi frecuentant su Mediterràneu sunt ses: sa prus presente est sa Caretta caretta, ma est possìbile abbistare fintzas sa Chelonia mydas (Testùine birde) e sa Dermochelys coriacea (Testùine liutu).

Sa Caretta caretta (Testùine comuna) podet lòmpere a sos 140 kg de pesu e unu metru de longària: possedit unu bicu corneu, naradu ranfoteca, cun oros acutzos a traessu pro si nutrire de crostàtzeos, bivalvos, pisches e medusas. Sa Caretta caretta frecuentat, in su tziclu vitale suo, tres tipos de habitat: terrestre, neritici (abbas bassas, imbenientes a sa costa) e pelàgico (abbas profundas). In s’habitat terrestre acontesset sa depositzione de sos oos e s’isvilupu embrionale: sa fèmina de testùine difatis, a note istupat dae sas abbas cara a su litorale, ue isgavat una chea profunda belle 50 cm acanta deponet una chentina de oos. Acabada sa depositzione, torrat deretu a mare sena s’ocupare prus de su nidu.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Portu Flavia: sa meravizza de s’archeologia industriale sarda.

Accaradu supra su mare cristallinu de sa Sardigna sud-occidentale, Portu Flavia est unu de sos logos pius galanosos e ammaghiantes de s’isula, esempiu istravanadu de archeologia industriale. Postu in sa costa de Masua,fratzione de su comune de Iglesias, Portu Flavia est famadu no solu po sa bellesa de sa bista sua, ma fintzas po s’istoria unica ligada a s’industria  mineraria.

Fattu in sas primas deghinas de annos de su Noighentos, su portu leat su numene dae Flavia, fizza de s’inzenieri Cesare Vecelli,imbentore de custu istravandu disignu. S’opera est bistada fatta po agilitare sa carradura de sos minerales de prumu e zincu chi arribaiant dae sas minieras de sa zura, evitande giros longos in terra e apprettande s’esportassione dae su mare.

Sa particularidade de Portu Flavia est in sa contestura unica sua: su minerale beniat carrigadu direttamente da sos magasinos iscavados in sa rocca supra sas naves arribadas in su mare. Po mesu de unu sistema de gallerias iscavadas in sa montera, su materiale calaiat po gravidade fintzas a sas naves, minimande sos tempos e sos arriscos e diventande una solutzione importante po cussu tempus. Oe sas gallerias e sos silos iscavados in sa rocca addurant tistimonzos de unu addelentu chi aunit funtzionalidade e bellesa.

In pius de su balore istoricu e industriale, Portu Flavia est unu logu de istravanada bellesa naturale, suspesu intre mare e chelu, cun arroccargios a atza e abbas colore ‘aera chi faghent divennere sa zura perfetta po camminadas, trekking e accabussos. S’armudiu intre s’istruttura artifissiale e sa bista a inghiriu faghet in manera chi Portu Flavia benzat cussideradu unu de sos logos pius fottograffados e bisitados de sa Sardigna sud-occidentale.

In sos urtimos annos Portu Flavia est divennidu fintzas cataffale de abbenimentos isportivos e culturales, intre sos cales garas de tuffos dae artarias mannas e initziativas dedicadas a s’archeologia industriale e sa tamburinada iscientifica.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22