In sa tzitadina de Cabuderra, una òpera noa de Manu Invisible si podet ammirare in su muru de un’iscola, rapresentende unu donu a unu de sos sìmbulos prus pretziosos pro totu sa comunidade: “Speranza”, dedicadu a sa figura de Maria Montessori, pedagogista istòrica chi at introduidu su mètodu disciplinare pro sos pipios basadu subra su printzìpiu fundamentale de sa “libertade de su dischente”.

Segundu s’artista sardu, “Cando una persone abbandonat su corpus pròpiu durante sa morte, lassat comente si siat unu sinnu indelèbile in su coro e in sa sotziedade in ue at bìvidu; unos cantos non si lìmitant a fàghere petzi custu, ma torrant a bìvere in sos sèberos, in su lìberu arbìtriu, in sas batallas personales de ognunu de nois”.

Custas persones- sighit s’artista- faghent s’Istòria e agatant unu modu umanu de abarrare in calicunu modu immortales. “Isperu-Speranza” est unu memoriale realizadu cun su contributu de diversas classes de sas iscolas de bia de Caprera, ue sa memòria de Maria Montessori no est petzi un’icona, ma assumet unu significadu profundu, trasmìtidu pro mèsdiu de su pensamentu de una pitzinna imberta in sa memòria esperienziale sua.

Si tratat de unu donu ispetziale a s’iscientziada chi at isvilupadu su mètodu Montessori, basadu subra sa libertade. Segundu su pensamentu suo, su pipiu est un’èssere cumpletu, capatzu de isvilupare energias creativas e dotadu de disponimentos morales. Petzi a traessu sa libertade, su pipiu podet espressare sa creatividade sua, giai presente in sa natura sua. Dae sa libertade nde devet istupare a foras sa disciplina, chi benit  dae su “traballu lìberu”. Cando su pipiu sèberat sena impedimentos una faina chi rispondet a s’istintu suo e chi li permitet de cròmpere a un’istadu de cuntzentratzione profunda, tando si manifestat sa disciplina. S’insegnante tenet su dovere de traballare pro mantènnere custu istadu a traessu de s’annestru a su movimentu, in ue su giogu tenet unu ruolu tzentrale. Cando su pipiu imparat a si mòvere sighende una fine chi est collegadu a sa faina mentale e chi li permitet de ghiare sa voluntade pròpia, tando podet èssere cunsideradu disciplinadu.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Lunis 27 de maju, Elmas at accasazzare sa mustra “5Chentu bortas Chentu”, unu accadessimentu chi promittit de essere una emossionante e unica tzelebrassione de sa vida longa sarda. S’addobiu est in su Teatru Comunale Maria Carta, cumintzande dae sas 18.00. Inoche ant essere esponnidas 500 fotograffias, fruttu de su tribagliu de medas annos de su connoschidu “Fotograffu de sos chentenarzos”, Pierino Vargiu.

Pierino Vargiu, paris cun sa muzzere Angela Mereu, at dedicadu annos a viazzare po tottu s’isula, acciappande cun sa macchina fotograffica sua sas caras e sas istorias de sos pius betzos abitantes de sa Sardigna. Custas fotograffias, non solu documentant sa betzesa chi non si podet creere de sas personas, ma apparant puru un’intima mirada supra sa vida, sa cultura e sas traditziones chi annodittant custa regione.

Sa mustra at essere un’occasione po si affundare in custu ammaghiante biazzu visivu in su tempus, gratzias a sas figuras chi contant sa vida e sas esperientzias de pessonas chi sunt arrivadas e ant passadu su accabbu de sos chentu annos. S’accadessimentu no at essere solu una simple apparada fotograffica, ma puru un’occasione po iscurtare istorias e cosas curiosas derettu dae sos attores e dae sas pessonas chi ant tribagliadu accanta a issos.

S’addobiu de su 27 de maju, at essere medradu dae s’iscrittora Alessandra Sorcinelli, chi at a ghiare sos presentes in mesu a custa istravanada abbentura, contande sas esperientzias e sas porfias accomettadas dae Pierino Vargiu e Angela Mereu in sos biazzos insoro e de sas accorradas fotografficas. Sorcinelli cun sa sensibilidade e cumpetentzia sua, at ischire dare attera fundaria e cuntestu a sas figuras apparadas, arrendinde sa serana puru pius ammaghiante e de signifficu.

In pius, sa mustra “5chentu bortas Chentu” est unu donu non solu a sos suggettos retrattos, ma puru a s’iscansabbile tribagliu de Vargiu e Mereu, chi cun passione e dedissione ant datu unu contribbudu po preservare e balorizzare sa memoria istorica e culturale de sa Sardigna. Sas fotograffias esponnidas non sunt simple ritrattos, ma beros e proprios contos chi si bient e trasmittini emossiones sapiesa e bellesa de sa vida.

Custa apparada est duncas un’occasione chi non si podet perdere po chie cherzat connoschere pius dae accurzu s’ammaghiante fenomenu de sa bezzesa sarda, po mesu de sos oggios de chie at ischidu collire e eternare s’essentzia de custas istravanadas bidas chentenarzas. Non bos perdides s’occasione de partetzipare a custu abbenimentu unicu e de bos dassare incantare dae sas istorias e dae sas caras chi ant fattu s’istoria de sa Sardigna.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22