Trovato mortu in s’istàinu de Cabras un’àteru mengone mortu positivu a su virus. A pustis de sos episòdios de aviària chi in sas chidas coladas ant pertocadu su parcu de Monte Urpinu de Casteddu, cun sas protestas de sos animalistas pro s’abbatimentu de paritzos aes, immoe est istadu agatadu peri unu mangone mortu chi est resurtadu positivu a s’aviària. Custa borta si tratat de unu mangone agatadu mortu in un’istàinu a presu de sa marina de Mari Ermi, in sa zona de Crabas, in s’Aristanesu. Sa tzertesa chi si tratet de aviària l’at cunfirmadu s’Istitutu zooprofilàticu isperimentale de sa Sardigna: su refertu est arribbadu eris e estadu in deretura donadu s’avisu pro protzedire a àteros controllos subra sa fàuna de su logu.  Como sos biòlogos e sos tècnicos de laboratòriu de s’istitutu de profilassi sunt sighende a fàghere àteros esàmenes ma at a tocare a isetare sos resurtados prus pretzisos de su Tzentru referenza natzionale delle Venezie in Pàdua, chi aiat giai pigadu in esàmene e cunfirmadu sas positividade de Casteddu.

Su casu de su mangone de Crabas diat pòdere èssere un’episòdiu isoladu, acapiadu a sa faina migratòria de s’esemplare. Su virus diat pòdere èssere naschidu in calicunu tzentru  a largu de sa Sardigna: sunt medas sos casos compidados in totu s’Europa. Un’ispia chi s’allet e chi, a pustis de su casu de Monte Urpinu, at fatu artziare su livellu de atentzione. Ma segundu sos espertos sa situatzione paret èssere suta controllu e non tocat a si fòghere leare dae sa timòria. S’importante est a donare cura. A diferèntzia de su cni est acontèssidu in Casteddu, pro parare fronte a custa positividade noa no est prevìdidu s’abbatimentu de àteros mangones. B’at a àere imbetzes unu bardiamentu passivu, cun su campionamentu de sos esemplares una bia mortos o agatados in dificultade. Sa zonas de controllu ant a èssere dispostas in unu raju de 10 chilòmetros dae su logu de s’acatamentu, pro cumprèndere si s’infetzione est firma a sa zona de Crabas ebbia.

 “Progetu finantziadu cun s’Avisu Pùblicu IMPRENTAS annualidade 2021-2022”

Nùgoro, ghia de su limbàzu incluisivu in s’amministratzione pùbbriga

Nùgoro faghet unu passu istòrigu cara a s’inclusione e a sa paridade: sa Provìntzia de Nùgoro est divènnida su primu ènte pùbbrigu de sa Sardigna a adotare in manera formale s’impreu de su limbàzu de zenia incluisivu in sas normas e sos regolamentos internos suos.

Sa detzisione, approada a s’unanimidade dae su Cunsìzzu provintziale subra propòsta de sa cunsizzera Lisetta Bidoni e cun s’accotzu de su presidente Giuseppe Ciccolini, punnat a prettare discriminatziones grammatigas e culturales, donande prus visibilidade e reconnoschimentu non solu a sas fèminas, ma fintzas a sas personas LGBTIQ+ e a sas identidades de zenia non cufformes a su binàrismu de su connottu.

S’approatzione de sas normas e de su regolamentu cun limbàzu incluisivu est solu su primu passu: sa Provìntzia at annuntziadu chi s’intentu imbeniente est a ispainare s’impreu de su limbàzu de zenia a totu sos atos amministrativos e a sas comunicatziones istituzionales uffitziales. S’impreu de unu limbàzu incluisivu no est solu simbòligu: refletit e influentzat sas relatziones sotziales, sos appitzigos de podere e sas bogadas a campu in intro de una comunidade, dande unu contribbudu a minimare eleghias e prevensiones cuadas e a favoressere prus sensibilidade culturale e respetu pare-pare.

Cun custa iniziativa, Nùgoro si ponet commente abberipista in Sardigna e fortzis unu mòdellu de sighire pro àteros comunos e provìntzias italianas chi cherent sighire polìticas de sa limba e comunicativas incluisivas.

Est a bìdere comente s’adossione operativa s’at a tradùere in sos atos amministrativos benidores e in sa comunicatzione de donzi die cun sa tzittadinàntzia, ma sa mustra rapresentat unu sinnu beru de atentzione cara a sa diversidade e identidade istituzionale in una iscrocca in ue temas de zenia, deretos tziviles e incluisione sunt in su tzentru de meda de sas chistiones sotziales de oe.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”