S’astronàuta italiana at publicadu in Twitter una fotografia de s’Ìsula. “Salude Sardigna! Mare e montes, padentes, pranos, costas e marinas… Pro sa grandu variedade de sos paesàgios bellos suos  e ecosistemas b’at chie cunsìderat sa Sardigna unu ‘micro-continente’ “.

In custa manera in Twitter Samantha Cristoforetti at saludadu sa Sardigna publichende una fotografia tirada dae s’Istatzione ispatziale internatzionale de cale cras at a devènnere cumandante pighende su postu de su cumandante Oleg Artemyev.

Sa Sardigna est bella fintzas dae s’ispàtziu. E sa Missione Minerva est una bona ocasione pro promòvere s’ìsula e sas bellesas suas. Nch’at pessadu s’astronàuta italiana Samantha Cristoforetti, chi at tiradu unas cantas fotografias dae s’Istatzione ispatziale internatzionale e las at  postadas in su profilu cosa sua de Twitter, sighidu dae prus de unu millione de persones.

“Salude Sardigna! Mare e montes, padentes, pranos, costas e marinas… Pro sa grandu variedade de sos paesàgios bellos suos  e ecosistemas b’at chie cunsìderat sa Sardigna unu ‘micro-continente’ “.

E, ancora, un’iscatu de Casteddu bita dae s’artu. “Cabulogu de sa Sardigna e tzitade prus manna de s’ìsula”, at iscritu s’astronàuta lombarda, “est incantadora siat a de die, siat a de note. Sos antigos batzinos salinos de sa zona de Molentàrgius oe sunt un’òasi naturale pro sos mangones!”.

Ma non finit inoghe: b’at tretu fintzas pro sa Gaddura e sa costa sud-otzidentale de s’ìsula. “Unu giru de sas costas e de sas ìsulas de sa Sardigna”, at iscritu ancora Cristoforetti, “de s’Arcipelagu de sa Maddalena a sa tzitade costera de Terranoa cun sa Costa Smeralda e sas ìsulas de Santu Pedru e Santu Antiogu in s’Arcipelagu de su Sulcis”.

Samantha Cristoforetti, apanigiada dae totus AstroSamantha, dae cras at a pigare su cumandu de s’Istatzione ispatziale internatzionale. Su coladòrgiu de testimòngiu – o mègius de sa crae de s’Istatzione ispatziale – dae s’atuale cumandante e cumpàngiu de echipàgiu Oleg Artemyev, at a acontèssere cras a sas 15.35 (ora italiana). Pagos minutos acanta s’atuale cumandante de s’Iss Oleg Artemyev at a cunsignare, comente traditzione, sa “crae” de s’istatzione a s’astronàuta italiana, paris a unu tubeddu de cuntzentradu de tomata. AstroSamantha at a èssere sa de chimbe astronàutas europeos a tènnere custa càrriga e su segundu italianu, a pustis de Luca Parmitano in su 2019. Sos àteros europeos a tènnere su cumandu sunt istados Frank De Winne, Alexander Gerst, e Thomas Pesquet.

 “Progetto finanziato con l’Avviso Pubblico IMPRENTAS annualità 2021-2022″

“Su Nenniri”, s’antigu connottu sardu chi abbisat sa Pasca.

Cun s’arribu de sa Pasca, in biddas meda de sa Sardigna torrat unu de sos connottos prus antigos e ammaghiantes de s’isula:”su Nenniri”. Si tratta de chimizones de ranu o atteros semenes creschidos a s’iscuru, chi affigurant sa torrada a bida e s’isperantzia, ligados a sos ritos de sa Chida Santa. S’ammanitzu incuminzat parizzas dies prima de Pasca, sos semenes benint postos a brotare in bottos pitticcos, a s’ispissu prattos o canisteddos,cuzigados e attesu dae sa lughe. In custa manera creschent fines,craros e delicados, leande unu colore giallu chisinathu tipicu meda.

Sa forma insoro chidrina e s’aera casi de “sufferentzia” crischiant comente iscromba su sacriffitziu e sa morte de Cristus. In su mentres de sa Chida Santa,”is nenniris” che benint leados in cresia e impittados pro adornare sas tumbas, sos artares pro su Giovia Santu. In carchi bidda benint postos cun contivizu particulare impare a frores,qandelas e pannos, creande bistas simples ma prenas de signifficu.Est unu zestu chi aunit fede e connottu populare, chi andat dae ingendra a ingendra.

In comunidades meda, mescamente in sas biddas prus pitticcas, s’ammaniada de sos nenniri est fintzas unu mamentu de cundivisione.A s’ispissu sunt sas feminas e sos bezzos a si nde occupare, impare cun zovanos, chi gai imparant su balore de custos ritos antigos. Custu connottu tenet raighinas attesu meda, mancari ligadas fintzas a ritos de sa laurantza prima de Cristu, chi tzelebraiant su cursu de sa natura e sa torrada a bida pustis de s’jerru.Cun su tempus, custos signifficos si sunt intritzados cun sa religione cristiana, dande vida a una cosa chi oe mustrat impare morte e torrada a bida.

“Su nenniri” non est solu unu elementu de decoradura, ma unu signu fungudu de sa cultura sarda. In d’unu mundu chi cambiat a sa lestra, custos connottos sighint a bivere gratzias a sa memoria de sas comunidades e a su disizu de no perdere sas raighinas insoro.Cun sa Pasca chi est accanta, cussos chimizones divennint gai unu nuntzu simple ma forte:pustis de donzi tempus buggiu, sa vida agatta semper sa manera de torrare a naschere.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22