Sa Cursa de sos Iscurtzos, in prus de èssere una rievocatzione istòricu-religiosa ammajadora de sa defensa de s’istàtua de su Santu contra un’invasione de sos Moros, est pro sos abitantes de Crabas un’importante momentu de fide e de identidade comunitària. Pro su 2022, sa cùrsa, insertada a s’internu de sa festa in orore de Santu Sarbadore est organizada dae su Comunu de Crabas cun s’amparu de s’Assessoradu regionale a su Turismu, de Sardigna Turismu, de su Comitadu organizadore San Salvatore 2022, de s’Assòtziu Is Curridoris, de s’Assòtziu Santu Srabadoeddu e de s’Assòtziu Entes Locales pro s’Ispetàculu.

Unos 800 fideles iscurtzos, cun su bestire biancu, a pustis de sa missa de sas 6 de su mangianu tzelebrada dae s’Archipìscamu de Aristanis Roberto Carboni, ant mòvidu dae sa Crèsia de Santa Maria Assunta conca a Tharros pro sa partèntzia. Una bia cugugiada su pòrciu chi amparat su bultu, totus abetant sa boghe de “tziu Antoni Obinu”, unu de sos betzos de sa cursa: “Baxi in nòmini ‘e Deus!”. S’emotzione, a pustis de duos annos de pàusa est istada meda, medas sos chi si sunt cummòvidos, siat intre sos curridoris siat intre sos numerosos ispetadores chi finas dae mangianeddu ant cumintzadu a ocupare ogni tretu lìberu fatu sos caminos de sa biddigedda.

Intre sos curridoris fintzas su sìndigu Andrea Abis. “Amus isetadu meda e s’aspetativa est creschida durante sos duos annos de fìrmu. Sa grandu partetzipatzione a s’eventu evidèntziat pro ite sa festa de Santu Salbatore est a  beru una grandu festa de pòpulu acantu totus agiudant” at afirmadu a s’arribu a Santu Sarbadore.

S’est acumpridu duncas su ritu de sa Cursa de sos Iscurtzos de Crabas, eventu religiosu e de costùmene chi durat dae duos sèculos e chi in sos ùrtimos annos fiat istadu firmadu dae sa pandemia.

In custu vìdeu amus a bìdere sas imàgines de sa partèntzia, cun sos 800 “curridoris” chi ant tragadu a pees iscurtzos s’istàtua de Santu sArbadore dae crèsia de Santa Maria Assunta de Crabas cara a su santuàriu de Santu Sarbadore.

 “Progetto finanziato con l’Avviso Pubblico IMPRENTAS annualità 2021-2022″

Portu Turres, torrat pustis de 8 annos sa protzessione de su connottu e sa benedissione de su mare.

Pustis de un’interrussione durada otto annos, torrat in Portu Turres unu de sos momenstos pius intesos e figurativu de sa Festha Manna: sa protzessione de s’usantzia cun sa tzerimonia de sa benedissione de su mare. Un’affussione cara meda a sa comunidade locale, chi in su tempus
at mustradu unu ligonzu forte intre fide, istoria e identidade de s’iscrocca.

S’abbenimentu religiosu at essere lunis 9 de lampadas, in occasione de su lunis de Pasca Intecosta, candi finit sa missa de su Pontificale. A dare su nuntzu uffitziale est bistadu munsignore Sarbadore Masia, vicariu de sa basiliga de santu Bainzu, chi at comunicadu cun galabera sa torrada de custu ritu cumone.

Sa protzessione at a partire dae sa millenaria basiliga romanica, at a rugrare prata Marconi e carrela Tattari, sighinde in su cursu Vittorio Emanuele fintzas a arrivare a su portu tzivicu, accanta a sa turre Aragonese. Est propriu innoghe chi si at a tennere su momentu conclusivu, cun sa benedissione de su mare, un’attu carrigu de signifficu chi aunit s’ispiritualidade de sa terra cun cussa de su mare, elementos de fundamentu po sa vida e s’istoria de Portu Turres. Sa tzerimonia, suspesa dae su 2017, est dae sempre sa concruida de sa festa religiosa, chi finit cun su cambiu de sas craes intre sos sindicos de Tattari e Portu Turres. Cust’attu, chi si faghet in daenanti de s’artare de sa basiliga, affortigat su sensu de coperatzione e appartennentzia intre sas duas comunidades, rennovande unu connottu chi affundat sas raighinas in sos seculos.

Addìa su balore religiosu, sa torrada de sa protzessione est fintzas unu signale de isperantzia po una comunidade chi, mancari siat ancora attraessande difficultades po more de sa decadentzia industriale, sighit a chircare carrelas novas po s’incomintzua novu e s’isviluppu. Sa cundivisione de custos momentos tottu paris est un’occasione po affortigare sos ligonzos sotziales e abbaidare a su tempus benidore cun cunfiantza mazore.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22