Su presidente emerito Giorgio Napolitano est istadu sutapostu a un’interventu chirùrgicu programadu a sa matza, in s’ispidale romanu Spallanzani, giutu cun tècnica mininvasiva. Su presidente (at a acumprire 97 annos in làmpadas) est ricoveradu in terapia intensiva.

S’interventu est istadu esecutadu dae s’iscuadra de su professore Giuseppe Maria Ettorre, at naradu cun una nota su matessi nosocòmiu. “S’interventu, giutu cun tècnica mininvasiva, est resèssidu – si leghet in su comunicadu – A su presente su malàidu est ricoveradu in sa terapia intensiva de s’Inmi Spallanzani. Su presidente est s’ischidadu cun cuadru clìnicu istatzionàriu. Sa prògnosi abarrat riservada”.

Su professore Ettorre est unu de sos màssimos espertos in su campu de sa chirurgia oncològica, de cudda epatobiliare e de sos trapiantos de fìgadu. Napolitano, at naradu su chirurgu, “istat bene e at superadu s’operatzione. Sas cunditziones suas sunt cumpatìbiles cun sas de unu malàidu de s’edade sua”.

Est su segundu interventu pro Napolitano. Su 24 de abrile de su 2018, difatis, noe dies a pustis de àere faeddadu cun su presidente Mattarella a su Quirinale pro sas consultatziones a pustis de sas eletziones, su senadore a vida est istadu ricoveradu in s’ispidale San Camillo de Roma pro unu malore e at subidu unu interventu a s’aorta, esecutadu dae su professore Francesco Musumeci. Fiat istadu dimìtidu su 22 maju.

Su 16 de santugaine sutzessivu fiat  in Àula a ascurtare su primu ministru Giuseppe Conte pro sas comunicatziones in bista de su Cussìgiu Europeu e sa presidente Casellati l’aiat saludadu in manera afetuosa sutaliniende sa passione “istitutzionale sua”. Fintzas in sas consultatziones giutas dae su capu de s’Istadu pro sa nàschida de sos guvernos Conte II, in su 2019, e Draghi, in su 2021, si puru in manera telefònica, Mattarella at intesu su cussìgiu de su predetzessore suo.

A Napolitano sunt arribbados, diretamente e a traessu de sas retes sotziales, sos augùrios de esponentes polìticos e de sos tzitadinos.

 “Progetto finanziato con l’Avviso Pubblico IMPRENTAS annualità 2021-2022”

Sa Dea Mama: una de sas divinidades prus antigas de sa Sardigna.

Sa Dea Mama est una de sas friguras prus antigas e ammaghiantes de s’istoria de sa Sardigna. Si trattat de una divinidade feminina chi pro sas populassiones de sos tempos antigos mustraiat sa vida, sa naschida e sa saliosidade. Sos archeologos ant acciappidu medas istatueddas chi la mustrant in paritzos sitos de s’isulas, sinzu chi custa frigura teniat unu rolu importante meda in sa religione e sa cultura de sas comunidades antigas. Custos oggettos antigos sunt de mizza e mizza annos faghet, meda prima de sa tzivilidade nuragica.

Sas istatueddas de sa Dea Mama sunt casi semper pitticcas e fattas de terra cotta o in pedra. In casi tottus sas istatuas su corpus femininu est meda evidentziadu, cun tittas, bentre e costazos evidentziados. Custas formas non fuint unu particulare artisticu simple, ma teniant unu signifficu forte meda. Serbiant difattis a mustrare sa capatzidade de sa femina de dare sa vida. Pro sas populassiones antigas sa femina fuit bida comente una frigura sacra pro itte mustraiat sa naschida, sa creschida e s’andare a daenantis de sa comunidade.

In cussu tempus sa vida de sas pessonas fuit ligada a s’istrinta cun sa nadura. Sas comunidades biviant mescamente de laurantza e pesadura e dippendiant de su tottu dae sa saliosidade de sa terra.Si sos campos produiant pagu o si sos animales non proliffigaint, sa vida de sas biddas fuit in perigulu. Po custu motivu, sa saliosidade fuit cussiderada un’elementu de fundamentu e sa Dea Mama mustraiat propriu custa fortza de sa nadura capatze de ingendrare e nudrire sa vida.

Est probabbile chin sas istatueddas benzerent impittadas in su mentres de ritos religiosos o tzerimonias ligadas a sos mamentos prus importantes de sa vida de sa comunidade, comente sa semenadura, su regortu o sa naschida de sos pitzinnos. Pro mesu de custos ritos sas populassiones dimandaiant affianzu, bundantzia de sos regortos e primorosidade po sas biddas.

Sa Dea Mama fuit duncas bida comente una frigura amparadora chi garantiat s’ecchilibriu e su benessere. Intre sos oggettos prus connoschidos bi est sa Dea Mama de Turriga, un’istatuedda in terracotta de su terzu millenniu A.C. Sa frigura est bistada fatta sezzida cun sas manos supra de su bentre, unu gestu chi mustrat in manera crara su tema de sa maternidade e de s’ingendra de sa vida.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22