Unu camionista chi fiat ghiende un’autocarru s’est intesu male e est istadu sarvadu dae sos agentes de sa politzia de Istadu chi si nche sunt acatados in tempus firmede su TIR.

Est capitadu eris cando sos agentes de su cummissariadu de Ostuni fiant colende in s’istrada s’istatale 379, de torrada de sa proas pro sa Festa de sa Politzia. In deretura ant notadu chi in mesu caminu bi fiat sùgiu, prenu de ogetos chi podiant provocare intzidentes. Bida sa situatzione de perìgulu, si sunt postos a su tzentru de sa carregiada, faghende abrandare su passu a sos veìculos chi fiant lompende.

Difatis pagu a pustis ant bidu  un’autoarticuladu chi protzediat a esses. In deretura sos agentes ant sighidu su mezu a pee e sunt resèssidos a lu sighire. Cun non pagas dificultades unu de issos est resèssidu a abèrrere sa portiera de sa màchina manna, acanta bi fiat s’autista isvènnidu. S’agente est intradu in sa gabina e est resèssidu a nde pesare su  su pee de s’autista dae s’atzeleradore, a nde istudare su veìculu e a tirare su frenamanu.

Una bia firmadu su mesu sos politzotos ant fatu sas primas manovras de prontu sucursu e ant praticadu a s’autista unu masàgiu cardìacu chi l’at sarbadu sa vida. S’òmine difatis torradu a respirare. In deretura est arribbada s’ambulantza chi lat leadu a s’ispidale Perrino de Brìndisi.

Unu gestu custu dignu de unu film de atzione! Duncas, gràtzias a s’interventu de sos politzotos s’òmine est istadu sarbadu. Sa noa at fatu su giru de totu sos giornales e televisiones. Unu gestu eròicu chi seguramente at a èssere reconnotu fintzas dae sos superiores de su politzoto. Una noa bella meda chi a pagas dies dae sa Festa de sa Politzia torrat a pònnere s’atzentu subra s’importàntzia de su presìdiu de su territòriu dae banda de sas fortzas de s’òrdine, chi sunt semper a servìtziu de sa gente.

 “Progetto finanziato con l’Avviso Pubblico IMPRENTAS annualità 2021-2022”

Energia, creschet s’ispesa pro impresas e famìllias sardas

Sas impresas e sas famìllias sardas sunt sighende a fàghere sos contos cun una depressione energètica chi, nointames de sos primos signales de rallentamentu, paret ancora resistente meda.

Su pesu de sas bulletas abarrat artu meda e nch’est ancora a tesu sa normalidade de sos prètzios de in anti de sa crisi. S’energia abarrat unu de sos fatores chi pesant de prus subra de sa solididade econòmica de sa Sardigna, cunditzionende non sa cumpetitividade de sas aziendas ebbia, ma finas sa calidade de sa vida de sa gente.

Sas impresas piticas e medianas de s’ìsula ant tentu un’ispesa in prus de 77 milliones de èuros (prus o mancu) causada dae s’energia incarida. Unu nùmeru importante chi ponet frenos a sas intradas, ponet barrancos a sos investimentos e bortas meda non permitit sa pianificatzione de sa crèschida. Finas pro sas famìllias sardas sa situatzione abarrat dificultosa. Sos prètzios pro s’impreu de s’elètricu e de su gas in paragone a su 2021sunt prus artos de su 42,3%.

Su cunfrontu cun situatziones europeas prus o mancu che pare ponet in evidèntzia comente a sas impresas sardas piticas e medianas lis tocat de parare fronte a una diferèntzia cumpetitiva carculada in 14 milliones de èuros. S’energia duncas est est una de sas isfidas prus importantes pro s’isvilupu econòmicu de s’ìsula. A minimare su càrrigu fiscale in sas bulletas, faghende finas interventos mirados pro fàghere crèschere sa resa energètica e s’auto-produtzione, podet dare un’agiudu pro chi su benidore de sas impresas e de sas famìllias sardas si potzat suportare mègius.

Su de passare a fontes rinnovàbiles e su de megiorare sos consumos sunt trastes primàrios pro minimare sa dipendèntzia dae sos mercados de fora e pro trasformare s’ispesa pro s’energia in una possibilidade de crèschida, cumpetitividade e annoamentu. In una situatzione econòmica globale pagu segura, a moderare s’ispesa energètica est indispensàbile pro dare istabilidade a sas aziendas, pro agiuare sa gente e pro s’isvilupu sostenìbile de sa Sardigna intrea.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”