Fiat istadu una de sas ùrtimas isculturas in màrmaru cumpletadas dae su grandu artista italianu Antonio Canova in antis de sa morte sua in su 1822 e rafigurat a Maria Maddalena in lutu. Binti annos a oe fiat istada bèndida in un’asta de istàtuas de giardinu ma reghentes istùdios ant riveladu chi s’iscultura acuistada pro 5.200 isterlinas de una còpia inglesa pro decorare su parcu de sa villa issoro est in realidade un’òperamastra pèrdida de Canova: a annuntziare s’iscoperta istòrica est sa domo de astas inglesa Christiès, chi at a pònnere in bèndida sa “Maddalena giacente” de su mastru de su Neoclassitzismu su 7 de trìulas in Londra cun un’istima de partèntzia de 5-8 milliones de isterlinas (6-9,5 milliones de èuros).

In s’annu chi si tzèlebrat sos duos sèculos dae s’iscumparta de Canova, s’iscultura in màrmaru biancu at a èssere esposta in sas sedes de Christès de Londra su 19 e 20 de martzu, e posca a New York (8-13 de abrile), Hong Kong (27 de maju-1 de làmpadas) e at a abarrare in fines  tres chidas in Londra in su mese de làmpadas.

In sos ùrtimos 100 annos sa paternidade sua fiat istada ismentigada e pro totu custu  tempus non si fiat ischidu in ue s’agataret s’istàtua – custa etzetzionale iscultura de Maria Maddalena in istadu de èstasi fiat istadu cummissionada in su 1819 dae Lord Liverpool, primu ministru inglesu (1812-1827). S’istàtua fiat istada posca bèndida a s’asta e acuistada dae Lord Ward e in un’àtera asta fiat colada a Sir Herbert Smith, unu produtore de tapetes e dae tando s’atributzione a Canova si fiat pèrdida. In una sutzessiva bèndida a s’asta in su 1938 fiat istada descrita in manera simple comente una “figura clàssica”. Fiat colada posca a sa colletzionista Violet van der Elst, sena s’autografia de Canova, e in su 1959 fiat istada acuistada dae unu mercante de arte. In su 2002, semper sena atributzione, fiat istadu bèndida in un’asta de istàtuas, in ue fiat istada comporada dae sos atuales propietàrios.

 “Progetto finanziato con l’Avviso Pubblico IMPRENTAS annualità 2021-2022”

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22