Torrat su tempus malu in Sardigna.

Un’avisu de cunditziones meteorològicas cuntràrias pro nie e astra in Sardigna est istadu trasmìtidu dae sa Protetzione tzivile regionale.

Dae mesudie de domìniga su 5 de mese de idas e finas a is 12 de lunis su 6 de mese de idas- si leghet in su comunicadu – est prevìdida “una perrturbatzione manna chi andat dae s’Àrticu a su Nord Àfrica, interessende totu s’Europa.

S’undulatzione prus otzidentale de s’istrutura at a cumintzare dae notesta cara a meridione, veiculende subra de sa Sardigna àera frita e intzipida de umidade”.

Segundu is previsiones de s’ufìtziu mèteo de s’Aereonàutica militare de Dèximu Mannu, ” in Sardigna at a torrare a niare dae sa serada de domìniga 5 e in sa die de lunis 6, semper in sa parte otzidentale, a cumentzare dae is 500 metros subra de su livellu de su mare. Ddoe at a àere fintzas un’abasciamentu mannu de is temperaduras, chi ant a calare peri de 10 grados e comente si siat no ant a èssere superiores a is 8-10 grados in pranura”.

Sa Protetzione Tzivile invitat at a sa “prudèntzia màssima a chie s’agatat a sa ghia de un’automòbile o de unu motoveìculu. In prus racumandat de evitare de colare suta is sutapassos, sende chi si diant pòdere allagare fintzas a sa lestra. Est pretzisu moderare sa velotzidade pro more de sa reduida de sa visibilidade e de s’asfaltu liscinosu pro s’abba, chi abbasciant su tretu de frenada de is veìculos. Fàghere una pàsida in una pratzita o in logu seguru durante is fases prus intensas de s’eventu”.

Duncas at a tocare a bardianare mescamente in is zonas de monte, ma non solu bidu fintzas s’abbassiada repentina de sas temperaduras.

De seguru custa undada noa de tempusmaliu at a creare problemàticas noas a su cumpartu agrìculu, cun medas imprendidores giai postos in ghenugros dae is niadas de sa chida colada.

A dolu mannu custu atòngiu, a pustis de su calore meda, est divènnodu fritu meda, proinosu e caraterizadu dae niadas bundantes. Cun bulletas de energia elètrica e de is àteras castas de riscaldamentu chi sighint a aumentare.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Abbiza massima po arrischiu de fogos in sa Sardigna orientale:irrattadu su bullinu ruggiu.

Sa Protetzione Tzivile regionale at bogadu a fora unu novu e affuscaante bullettinu po s’arrischiu de fogos artziande su livellu de abbiza a su codice ruggiu, chi indittat periculosidade manna. Sos logos pius interessados sunt Casteddu e tottu su sud-est de s’isula, giai corpadas sas dies passadas, in manera particulare dae su fogu mannu chi  at devastadu sa zura de Villasimius su 28 de triulas. Ma s’allarme non si firmat a su sud: casi tottu sa parte orientale de sa Sardigna est cunsiderada a arrischiu massimu, escluidinde unu trettu limitadu de sa costa nugoresa.

Su bullinu ruggiu cumprendet puru s’Arta Gaddura, e fintzas localidades turisticas comente Costa Paradiso e Isola Rossa, logos chi sunta meda punnados in s’istiu. A rendere su quadru meda pius criticu est su bentu mannu chi podet arribare a sos 40 km/h, e chi podet aumentare sa die de dominiga. Bentu siccu e temperaduras artas creant unu mix periculosu, chi favoressint s’allughidura e sa lestra diffusione de sos fogos.

Sa situatzione meteo chi si ispettat est capatze de allughere fogos cun d’una intensidade de su fogu e una lestresa de diffusione medas artas chi, si mancat s’interventu lestru, podent in lestresa fuere a su controllu, fintzas cun s’impittu de sos aereos de sa regione e de s’istadu. In su mentres su Corpu Forestale regionale est giai impignadu in su campu: sunt faghinde un’interventu in sa zura de Belvì, in provintza de Nugoro, inube su fogu at corpadu sa localidade de Pitzu ‘e Pranu. Sas operassiones de istudamentu bient a s’opera puru un’elicottero, cosa chi testimonzat sa difficultade de sas cunditziones de oe. S’incumandat sa massima prudentzia.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22