S’Itàlia corpida in prenu dae su tziclone mediterràneu Blas.

A pustis de èssere istadas corpidas Calàbria e Sitzìlia, su tempus malu s’est iscostiadu conca a Ligùria, Toscana, Salento e Sardigna.

In s’Ìsula un’òmine de 81 annos at pèrdidu sa vida, leadu dae unu riu de abba e ludu a pustis de èssere essidu dae sa màchina sua a Porto Pino, in su Sulcis.

Sa vetura est istada agatada a presu de sa provintziale 73 chi giai dae is primas oras de su mangianu non si ddoe podiat tzirculare. Is vìgiles de su fogu sunt abarrados medas oras chirchende su betzu, chi a su cumentzu fiat istadu decraradu ispèrdidu. Solu a merie a tardu, su corpus suo est istadu individuadu dae s’iscuadra de sucurridores, formadu dae vìgiles de su fogu, carabineris, Protetzione Tzivile e Corpus Forestale.

Su corpus de sa vìtima fiat istadu leadu dae s’abba a largu meda dae su logu in ue si fiant pèrdidos is rastros, una zona a probe de su polìgonu militare de Capo Teulada.

Pro fortuna sunt istados totus agatados is cassadores ispèrdidos, chi no aiant bòlidu rinuntziare a una die de cassa mancari s’avisu de tempus malu. Is bator òmines sunt istados sarbados in Sarrocu.

S’atentzione però est arta in totu s’Ìsula, in ue is abbas de oe ant superadu de meda is 100 mm, isciaddende de meda is mèdias istajonales de ognasantu, chi a su sòlitu sunt prus a mancu de 68 mm.

In s’ora in Casteddu sa viabilidade tzitadina est istada blocada a su totu cun is caminos de unos cantos bighinados chi si sunt trasformadas in rios calados, cun magasinos e domos allegadas, sistema ìdricu ruinadu e muros crollados.

Discumbènios e allagamentos fintzas in su Salento e in Ligùria, in ue s’avisu de perigulosidade grogu fiat istadu perlongadu finas a su sero.

Blas no at risparmiadu nemmancu Toscana: in Pisa unu raju at corpidu sa fatzada de sa procura causende dannos a sa fatzada de màrmuri.

E immoe si contant is primos disacatos in is sartos: segundu Coldiretti custa undada noa de tempus malu tra Sardigna e s’Itàlia est giai costada 2 milliardos de èuros. Ma in is dies imbenientes is disacatos ant a èssere peri de prus.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

S’edissione numeru 7 de su premiu chi si tenet donzi duos annos “Lagu Omodeo”, ordimizzada cun berbore e passione dae su Comune de Sorradile(OR), non est solu un’ abbenimentu, ma una testimonia sigura de su geniu e de sa dedissione de sas personalidades sardas chi ant lutzigadu in su mundu.

Custu istravanadu addobiu, chi si faghet donzi duos annos, si annodditat po sa missione sua de tzelebrare e onorare cussos chi ant giuttu in artu sa bandela de sos 4 moros passande sas fronteras natzionales. S’edissione de custannu est unu addobiu de contos tipu e contribbudos de valore mannu po isparghere sa cultura sarda in su mundu.

In mesu de sas istellas chi brillant supra su palchittu de custa bogada a campu, bi est nu navigatore Andrea Mura, s’atza e s’ostinassione de su cale ant trasformadu su giru sou po mare,de sa terra in d’una paristoria de sos tempos modernos. A costazzu de issu, s’attrice prena de talentu Lia Careddu, chi cun s’accisu sou at incantadu su pubbricu de tottu su mundu, giughinde cun issa sos colores e sas tradissiones de s’amada Sardigna sua.

E puru Maria Grazia Zedda, una manager dedicada a s’incluisione sotziale, s’impignu ischittu de sa cale, at apprettadu s’accottu e sa diversidade in donzi zura de sa terra. E po finire sa giornalista Giuseppina Testoni, su tribagliu de sa cale in su contare istorias beras e prenas de signifficu, at passadu sos limides de sa natzione, bogande a fora retumbu e cunsideros.

Ma in mesu de sos abbenimentos pius importantes de cusra edissione, brillat su donu a Gigi Riva, una cona de s’isport e unu bragosu ambasciadore de sa Sardigna in su mundu. Sa contzessione de una targa po l’ammentare in memoria sua, a costazzos de sa maestosa pedra molina, est un’attu de riconnoschentzia dae parte de sa comunidade de Sorradile, chi tzelebrat su contribbudu istravanadu sou, po battire gloria a sa terra sua de issida.

In custa visione de eccellentzia e orgogliu de s’identidade, su premiu chi benit dadu donzi duos annos “Lagu Omodeo” sighit a brillare commente unu faru chi ispirat sas ingendras de oe e de su tempus benidore, tzelebrande s’eredidade de cussos chi ant pesadu sa grandesa de sa Sardigna in su mundu. Donzi edissione est una capitatzione chi drinnit a sa ricchesa culturale e a s’istravanadu determinu de unu populu chi at ischidu dassare un’imprenta chi non si podet iscancellare supra s’iscena mondiale.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22