Ant a èssere is ispàtzios de Sa Manifatura de Casteddu (logu de addòbiu e de apartenèntzia, ispàtziu cuncretu de iscàmbios a disponimentu de sa creatividade artìstica, culturale e sientìfica de totu is sardos), a acollire sa segunda editzione de su fèstival Signal Reload, sa rassigna dedicada a sa mùsica eletrònica e a s’isperimentatzione curada e organizada dae s’assòtziu TiConZero, tzentru de produtzione e chirca artìstica multidisciplinare suta de sa diretzione artìstica de Daniele Ledda.

Dae su 20 de mese de ladàmine a su 13 de mese de idas su fèstival, chi ocannu si reconnoschet in su tema “tra sonos e bisiones”, s’at a articulare in oto apuntamentos cun a su tzentru artistas prus che totu sardos, cun sa punna de impreare s’improvisatzione ghiada, sa cumpositzione, s’iscritura e su vìdeu a su servìtziu de sa narratzione.

Tra is artistas protagonistas de sa segunda editzione sa manifestatzione aocannu contat su baterista, percussionista e isperimentadore Alessandro Cau, su progetu dedicadu a sa cumpositzione istantànea Snake Platform, su produtore e cumposidore Carlo Orrù, sa cumposidora Tuna Pase, su progetu Scrondo e Alek Hiddel, progetu nou de su prodotore e mùsicu sardu Dario Licciardi.

«Sa missione de s’Assòtziu TiConZero est basasa subra de is risursas artìsticas e creativas de su territòriu, non comente cramada ocasionale, ma comente manifestatzione de unu laboratòriu permanente – contat su diretore artìsticu Daniele Ledda -, miradu a sa creatzione de una rete acanta is nodos sunt semper ativos in sa produtzione e isperimentatzione.

Sa rete in custu sentidu, pro impreare unu parallelu informàticu, est una rete locale. Unu nodu importante in custa rete est rapresentadu dae sa comunidade acapiada a su dipartimentu de mùsica eletrònica de su Cunservatòriu de Casteddu e de su progetu Snake de cumpositzione istantànea. Su fèstival Signal Reload 2019 “tra sonos e bisiones” si ponet, duncas, comente isvilupu naturale de su traballu de s’annualidade colada e naschet dae s’idea de impreare s’improvisatzione ghiada, sa cumpositzione, s’iscritura, su vìdeu e ddos pònnere a su servìtziu de sa narratzione. Sa narrazione s’isvilupat cun s’istòria de sa cultura umana e de is espressiones suas giai dae is printzìpios de sa tziviltade.

A su fèstival is artistas presentant, gasi, un’istòria issoro, una narratzione belle crara cun sa cale cumpartzint unu percursu umanu e estèticu issoro ».

Signal Reload est realizadu gràtzias a su contributu de sa Regione Autònoma de sa Sardigna, de su Comunu de Casteddu e de sa Fundatzione de Sardigna, cun su patrotzìniu de su Cunservatòriu de Mùsica G. P. da Palestrina de Casteddu.
Totu is apuntamentos sunt a indonu
SU PROGRAMA – Sa segunda editzione de su fèstival Signal Reload at a cumentzare domìniga 20 de mese de ladàmine a is 20.30 cun sa performance de Alessandro Cau, baterista, percussionista, isperimentadore, improvisadore e performer in su palcu de Sa Manifatura pro presentare s’ùrtimu progetu discogràficu suo, s’album “Brenti” prodùidu dae issu, sonadu e arrangiadu, e registradu acanta su Dirty Sound Studio de Legnano. Cau dae annos s’òcupat de didàtica in su mundu de sa bateria e de su ritziclu musicale, faghende addòbios e laboratòrios comente dotzente. In is annos colados at sonadu e collaboradu cun paritzos mùsicos e progetas musicales, comente Erik Truffaz, Gavino Murgia, Javier Girotto, Enzo Favata, Luca Aquino, Shain Moitia (Ex Models), Simon Francis (Ellie Goulding), Geoff Barrow (Portished), Lee Ranaldo (Sonic Youth) e at sonadu in teatros e fèstival in Itàlia, Frantza, Isvìtzera, Ispagna, Bèlgiu, Germània, Norvègia, UK, Tunisia, Etiòpia, Sèrbia e Giapone.

Elettrocavu Luvula-Garteddi, sighint sos tribaglios de Terna: imbestimentu de 50 miliones po mezorare sa retza elettrica.

Sighint sos tribaglios de Terna po fraigare su Elettrocavu novu cun cavu sutta de terra longu 19 kilometros chi at a collegare sas cabinas primarzas de Luvula e Garteddi. S’opera faghet parte de sos interventos po affortigare sa retza elettrica locale e at a permittere de la faghet divennere prus balente e sigura. Pro faghere sos tribaglios, sa sotziedade at imbestidu casi 50 miliones de euros. Su collegamentu novu at a dare sustentamentu elettricu in prus a sa cabina primarza de Garteddi chi oe est collegada a sa retza elettrica natzionale po mesu de unu solu elettrocavu.

Pro cantu pertoccat sos tribaglios, los sunt faghinde in sa carrela provintziale 25 e sos cantieris de su lotto 1 e 2 in su trettu chi andat dae su’iscansada de Luvula fintzas a Garteddi. Sos tribaglios sunt andande a daenantis segundu su programma chi si prevediat. Una prima parte at essere finida intro lampadas 2026 mentres
sa fine de sos tribaglios si prevedit intre sa prima metade de su 2027. In su mentres de sos tribaglios po garantire sa siguresa est bistadu netzessariu istringhere sa carrela faghinde passare sas macchinas cun su traffigu regoladu dae unu semafforu.

A sa congruida de sos tribaglios sa sotziedade at a torrare a faghere s’isfaltu in tottu su trettu de sa carrela interessada dae su cantieri. S’abberu de s’opera est bistada deffinida po mesu de unu caminu de cunfrontu cun sas amministratziones locales. In sos primos mamentos su trassadu de su cavu interradu est bistadu istudiadu imparis cun sos entes interessados cun s’intentu de minimare cantu prus est possibile problemas po s’iscrocca e s’ambiente e rispettare sas esigentzias de sas attividades de sa laurantza. S’elletrocavu novu at a passare mescamente accanta a atteras operas chi giai esistint comente carrelas istatales e provintziales minimande sas intromissiones cun sas zuras de majore balore naduralisticu e de bista de sa zura.

Custu interventu est unu passu importante po affortigare sa retza elettrica de s’iscrocca cun beneffissios isettados po sa continuidade de su servitziu e prus siguresa in su faghere arribare prus energia po sas comunidades locales.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22