Sàbadu coladu, in ocasione de su solstìtziu de s’istade, amus bisitadu una pariga de ispiàgias a curtzu de Casteddu.

Semus andados a bìdere is bellos colores de su mare tra Cuartu Sant’Aleni, Maracalagonis e Sìnnia. Bellos logos de a veras. Gente meda at acudidu a si gosare s’abba lìmpida e s’ùrtimu sole de beranu.

Tzertu su bentu maistru at artziadu unu pagu de undas, ma non fiat forte meda. Antzis sa friscura at rechèdidu meda, bidu fintzas su sole forte e lughente.

Is plajas fiant prenas de turistas, chi ant rispetadu su tretu de seguresa, allegros e in cumpangia de familiares e amigos. Is paracos e abbamanos fiant postos a distàntzia sena chi s’istorbarent s’unu cun s’àteru.

Ph: Roberto Anedda

Unu rimèdiu perfetu pro si pasare a pustis de su perìodu de acorru – pro more de su COVID-19 – chi totus ant bìvidu finas a pagu tempus a oe.

Podimus nàrrere chi sa gente siat essende de prus in giru, e custa est una noa bona meda pro s’istajone turìstica. Pro ite ocannu, forsis ant a mancare medas istràngios, e s’ispera est chi is sardos nd’ant a pòdere aprofitare pro biagiare in s’Ìsula issoro. Pro connòschere logos ispantosos meda, diat a bastare andare pagu a largu de sa tzitade prus manna de sa Sardigna.

Semus alleghende de Cala Reina, un’arenile in su sartu de Cuartu Sant’Aleni, unu logu a prus pagu de trinta chilòmetros de Casteddu. Pro ddoe lòmpere semus colados dae s’istrada chi s’agatat a pustis su Poetu, sa SS 125 betza.

Ph: Roberto Anedda

Un’àtera ispiàgia chi mèritat una bisita, semper in su sartu de Curtu, est cussa de Mari Pintau – nomenada gasi pro more de su colore de su mare – e pagu prus a in antis de Cala Reina.

A pustis de un’àtera pariga de chilòmetros de istrada, pro arribare a custu logu, tocat a fàghere a pee, un’àndala isterrada.

Ph: Roberto Anedda

A sighire, sa Turre de is Isteddos – Maracalagonis – amus a cussigiare de bisitare sa plaja Genna de su Mari, cun is areniles lìmpidos e lughentes che s’oru.

Ph: Roberto Anedda

Pro chie at a bòlere chircare galu àteros logos bellos, at a bastare andare pagu prus a largu: sighire s’istrada istatale conca a Solanas – Sìnnia -.

Est coladu prus pagu de unu mese, dae cando tzilleris e is ristorantes ant pòdidu torra abèrrere. Custu coa de chida, a de note, semus passados a bisitare is carreras prus travigadas in su tzentru de Casteddu.

Custa iscuta de tempus est importante meda pro cumentzare a cumprèndere su cumportamentu de sa gente a pustis de s’apretu de su COVID-19, ma mescamente pro bìdere si s’economia tzitadina est torrende•si a istantargiare.

Tzertu is contos s’ant a fàghere in is meses chi benint, pro ite est galu a coitu pro bìdere comente sunt andende de a veras is cosas.

Pustis is primas chidas dae timòria, immoe paret chi sa gente siat essende de prus in giru e s’est acostumada a is règulas contra su coronavirus. Nois, sa note colada, amus bidu is caminos de sa “passillada” de is casteddajos, cun gente meda.

Ph: Roberto Anedda

Is tzilleris fiant prenos de clientes – cun is mesas in foras chi rispetaiant su tretu de seguresa – bufende allegros in cumpangia. Is ristorantes, chi ant dèpidu istòddere is postos pro more de is règulas noas contra sa pesta, imbetzes, fiant prus bòidos. Ma s’intendet puru sa mancàntzia de is turistas istàngios.

Naramus chi, a bellu a bellu, sa situatzione in tzitade paret chi siat torrende a sa normalidade.

A ogna contu tocat semper a abarrare abbistos contra custa pesta de su coronavirus. Pro cussu, cando serbit, est pretzisu a si pònnere sa mascaredda pro amparare sa salude personale. Medas is giòvanos ispensados chi amus addobiadu chi non la portaiant. Custa est s’ùnica crìtica chi podimus fàghere.

Però, su de bìdere torra sa tzitade animada dae sa gente, nos a prenadu su coro de ispera pro su tempus benidore. Unu sinnale importante meda pro s’economia de sa Sardigna, pro ite galu non s’ischit comente at a èssere s’istajone turìstica a pustis de s’abertura a is ispostamentos in Itàlia e in Europa.