Castelsardo:Istoria, mare e connottu in su coro de su nord Sardigna.

Arroccadu supra de una punta aida affaccadu a su tzentru de su Gulfu de s’Asinara, Castelsardo est unu de sos burgos medievales menzus cusservados de sa Sardigna e faghet parte de sos roglios de “Sos burgos prus bellos de Italia”. Sa posissione sua bene ordiminzada, Intre Tattari e Santa Teresa de Gaddura, lu faghet divennere unu puntu ideale pro chie disizat aunire cultura, bistas e connottu beru.

Castelsardo naschet in su 1102 dae sa  potente famiglia ligure de sos Doria. In sos seculos est passadu sutta de su controllu Aragonesu, leande su numene de Castel Aragonese, pro divennere Castelsardo in su seculu XIX.Custa istoria si biet ancora in s’architettura e in s’approntu tzittadinu de su burgu, fattu de murallas,turres e carrelas chi contant seculos de dominatziones e iscambios culturales.

Sa cona de tzittade est su Casteddu de sos Doria, una fortesa medievale cusservada in manera perfetta chi dominat sa bista a inghiriu. Intro de issu accasazzat su Museu de s’intritzu Mediterraneu, dedicadu a s’arte antiga de su tribagliu de sas fribbas naturales, comente juncu e pramma nana.Custu connottu artesanale est bivu ancora a dies de oe e d’est unu de sos elementos prus fortes de s’identidade de sa comunidade locale. S’iscrocca de Castelsardo tenet una costa varia e ammaghiante. Sa localidade de Lu Bagnu, a pagos mintuos dae su tzentru istoricu, est connotta pro sas plajas suas de rena e sas abbas limpias, perfettas pro sas famiglias e pro chie chircat trancuillidade.

Intre sos sitos prus importantes risartat sa Concattedrale de Sant’Antoni Abate, una de sas fraigas religiosas prus de importu. Pagu fora de su tzentru si agattat sa tzelebre Rocca de s’Elefante, una rocca naturale assempiada dae su bentu, chi ammentat sa forma de unu elefante e d’est divennida una de sas conas prus fottograffadas de sa zura.

Castesardo est nodidu pro su connottu suo religiosu, in manera particulare pro Lunissanti, una de sas tzelebrassiones prus ammaghiantes de sa Chida Santa in Sardigna. In su mentres de custu ritu, sos croffarios accucuddados passanta in sas carrelas de su burgu cantande in ladinu, e creande un’aera cadria e carriga de ispiritualidade.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22