Jerru fora de istajone in Sardigna:nie in su Gennargentu e astrau intre sa Chida Santa.

Una torrada a un’irbottu de s’jerru in sas primas dies de beranu at interessadu sa Sardigna cun frittu meda e nibadas novas supra sos montes de su Gennargentu. Pustis de unu fine chida cun astra e nie supra sos milli metros sa bista de sos montes est torrada de colore biancu.

Sas temperaduras sunt minimadas sutta de zero in sas zuras de s’internu mescamente intre sa Chida Santa. Su balore prus bassu bi est bistadu a su Separadorgiu pagu prus in bassu de su pitzu de su Bruncuspina a casi 1.400 metros de artaria inube bi sunt bistados -2 grados. Su frittu at interessadu fintzas su nugoresu e s’Arta Gaddura cun balores intre -1 e 0 grados creande sas cundissiones tipicas de s’jerru mancari siat giai arribadu su tempus de su beranu.

S’ aundada de tempus malu arribat dae su Nord Europa e diat podere battire iscassiddadas novas in sas oras imbenientes in d’una parte manna de s’isula pro parizzas dies. Su tempus istabbile diat devere accumpanzare bona parte de sa Chida Santa mantenninde sas temperaduras bassas mescamente in sas zuras de intro e de sos montes.

Unu mezzoramentu s’isettat solu cun s’arrivu de sa pressione arta chi at a battire cundissiones prus firmas e unu clima prus caldumu. Secundu sas previsiones po sa die de su lunis de Pasca bi diant podere essere temperaduras casi de istiu cun balores chi diant podere passare sos 21-22 grados. Su coladorzu fruscu dae su frittu a su cardu cuffirmat pro un’attera borta sa traccusjosidade de su clima de beranu in Sardigna cun dies chi podent cambiare a sa lestra in pagas oras intre iscenarios de jerru e de istiu imbeniente.

Custu attittidu de temperaduras dimandat un’attentzione particulare mescamente pro chie bivet o si movet in sas zuras de s’internu e de sos montes inube sas cundissiones podent cambiare a sa lestra. Fintaz pro sa laurantza e sas attividades chi si faghent fora de domo sa torrada de su frittu est unu elementu de criticidade in d’unu tempus chi in sa normalidade benit dedicadu a s’arribu de su beranu.

In sas dies imbenientes sa mirada addurat puntada supra su chelu isettande unu mezzoramentu chi potat battire firmesa e temperaduras prus in linia cun s’istajone. Solu tando su beranu si at a podere affirmare  in manera deffinitiva supra tottu s’isula.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22