Carrasegare de Mamujada: intre istoria, ritos e caratzas de milli annos.

Su Carrasegare de Mamujada est una de sas bogadas a campu de su folklore prus antigas e ammaghiantes de sa Sardigna. Si faghet in sa bidda de Mamujada, in su coro de sa Barbagia, in provincia de Nugoro,  est unu patrimoniu culturale de importantzia istravanada po totta s’isula.

Sas bessidas de sa festa arribant dae su tempus passadu e, secundu sos medas istudios antropologicos, diant podere bennere dae ritos precristianos ligados a su mundu agro-pastorale. Su carrasegare, difattis, paret annantu a sos tziclos de sa natura, a sa saliosidade de sa terra e a sos rituales antigos de sacrifiziu. In su cursu de sos seculos su connottu si est intritzadu cun elementos cristianos, chentza peroe perdere su carattere forte arcaicu e simbolicu suo.

Primos attores assoludos sunt sas caratzas de sos Mamuthones e de sos Issohadores. Sos Mamuthones bestint peddes de erveghes nieddas e pesantes e una caratza de linna dae sa cara severa, casi dolorosa. Supra sas palas giughent una cantidade manna de marratzos, su pesu de sas cales podet binchere sos 30 kilos. Su passu insoro est lentu, cadentziadu, accumpanzadu dae su sonu fungudu e ritmicu de sos marratzos chi guvernant sa protzessione po sas carrelas de sa bidda. Commente dae connottu isfilant in numeru de doighi, unu elementu chi a s’ispissu benit cunsideradu comente riferimentu a sos meses de s’annu.

Accanta a issos si movent sos Issohadores, chi si connoschent po su bestire prus craru e coloradu: zanchetta rubja, camisa e pantalones biancos,berritta colore e’ moru e una cora intrinzada giammada “soha”. Su rolu insoro est attivu e issinzante: ghiant su corteu e, in su mentres de s’isfilada, bettant sa corda intre sa zente po  “acciappare” sos ispettadores comente auguriu. Essere acciappados cun sa corda est cunssideradu dae su connottu comente suspentu de fortuna e abbonidade.

Su calendariu de su carrasegare cuminzat giai a metade de bennarzu, in occasione de sa festa de sant’Antoni Abate, cando in sa bidda benint azzesos fogos rituales mannos meda e sas caratzas faghent sa prima bessida pubbrica insoro. Sas tzelebrassiones sighint in sas chidas imbenientes fintzas a Martis Lardajolu, mamentu chi sinzat su culiminzu de sa festa, cando su tzentru istoricu de Mamujada si prenat de bisitadores, sonos e ballos de su connottu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22