Manovra: arribant chentu miliones po sos Comunes sardos. Como si tribagliat supra sa muda de su bilanciu.

Una buccada de aera frisca po sos Comunes sardos e una ispinta de signifficu po tottu s’assentu de sos entes locales. Cun s’approbada de sa finantziaria, su fundu unigu de sos entes locales arribat a 670 miliones de euros a s’annu, unu livellu mai apperricadu prima in s’istoria reghente de sa Regione. De custa summa, casi chentu miliones ant essere destinados a sos comunes, garantinde disponibilidades beras po affortigare sos servitzios supra s’iscrocca e agguantare imbestimentos novos.

Si tratta de s’interventu prus importante de sa Secunda Finantziaria de sa legisladura, approada in tempus po iscansiare un’atteru mese de esercitziu mamentaneu e assigurare unu controllu prus firmu de su patrimoniu. S’accreschimentu de su fundu unicu, permittit a sos entes locales de programmare menzus sas ispesas e de alloire sos pagamentos, binchinde sas difficultades ligadas a su controllu in doighi meses chi aiat abbaccadu disignos e interventos supra s’iscrocca.

Como, s’attentzione de sa Giunta si cuntzentrat supra sa muda de bilanciu po tres annos, cussideradu su coro de sas manovras finantziarias de sa legisladura. Su rimediu diat essere approadu in Giunta intre sa fine de frearzu e sas primas dies de martu, cun s’arrivu in Aula chi si prevedit in beranu. Sa muda at a serbire pro deffinire in manera prus cumpleta cale sunta sas ispesas prus importantes e a garantire continuidade a sas politicas de legisladura.

S’inari chi arribat dae s’accordu cun s’Istadu frimmatu a sa fine de su mese de Nadale at a essere de fundamentu po affortigare sos interventos chi sunt giai partidos e po faghere partire irbirgos novos de isviluppu. Intre sas cosas prus importantes bi est fintzas su possibile finantziamentu de 30 miliones de euros destinados a s’iscalladura de sos aeroportos sardos, un’imbestimentu pensadu po affortigare su rolu de sa Regione in su controllu e isviluppu de su sistema aeroportuale.

S’intentu de sa manovra est craru: garantire firmesa finantziaria a sos entes locales, accreschere s’efficentzia de s’ispesa pubbrica e dare continuidade a sos disignos istrategicos de sa legisladura. Gratzias a custu dinari sos comunes ant a podere preparare menzus sos interventos de fundamentu pro sas  comunidades, dae sa cusservassione de s’iscrocca a su controllu de sos servitzios netzessarios, fintzas a s’accottu a initziativas culturales, sotziasles e accolomicas.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22

Sa Dea Mama: una de sas divinidades prus antigas de sa Sardigna.

Sa Dea Mama est una de sas friguras prus antigas e ammaghiantes de s’istoria de sa Sardigna. Si trattat de una divinidade feminina chi pro sas populassiones de sos tempos antigos mustraiat sa vida, sa naschida e sa saliosidade. Sos archeologos ant acciappidu medas istatueddas chi la mustrant in paritzos sitos de s’isulas, sinzu chi custa frigura teniat unu rolu importante meda in sa religione e sa cultura de sas comunidades antigas. Custos oggettos antigos sunt de mizza e mizza annos faghet, meda prima de sa tzivilidade nuragica.

Sas istatueddas de sa Dea Mama sunt casi semper pitticcas e fattas de terra cotta o in pedra. In casi tottus sas istatuas su corpus femininu est meda evidentziadu, cun tittas, bentre e costazos evidentziados. Custas formas non fuint unu particulare artisticu simple, ma teniant unu signifficu forte meda. Serbiant difattis a mustrare sa capatzidade de sa femina de dare sa vida. Pro sas populassiones antigas sa femina fuit bida comente una frigura sacra pro itte mustraiat sa naschida, sa creschida e s’andare a daenantis de sa comunidade.

In cussu tempus sa vida de sas pessonas fuit ligada a s’istrinta cun sa nadura. Sas comunidades biviant mescamente de laurantza e pesadura e dippendiant de su tottu dae sa saliosidade de sa terra.Si sos campos produiant pagu o si sos animales non proliffigaint, sa vida de sas biddas fuit in perigulu. Po custu motivu, sa saliosidade fuit cussiderada un’elementu de fundamentu e sa Dea Mama mustraiat propriu custa fortza de sa nadura capatze de ingendrare e nudrire sa vida.

Est probabbile chin sas istatueddas benzerent impittadas in su mentres de ritos religiosos o tzerimonias ligadas a sos mamentos prus importantes de sa vida de sa comunidade, comente sa semenadura, su regortu o sa naschida de sos pitzinnos. Pro mesu de custos ritos sas populassiones dimandaiant affianzu, bundantzia de sos regortos e primorosidade po sas biddas.

Sa Dea Mama fuit duncas bida comente una frigura amparadora chi garantiat s’ecchilibriu e su benessere. Intre sos oggettos prus connoschidos bi est sa Dea Mama de Turriga, un’istatuedda in terracotta de su terzu millenniu A.C. Sa frigura est bistada fatta sezzida cun sas manos supra de su bentre, unu gestu chi mustrat in manera crara su tema de sa maternidade e de s’ingendra de sa vida.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22