Sardigna: sa porfia de s’ispartinadura iscolastica intre numeros e opportunidades.

S’ispartinadura iscolastica in Sardigna est unu de sos problemas prus criticos in sa bista educativa italiana, cun tassos de disamparu chi sunt prus artos de sa media natzionale e tenent unu corpu derettu supra su tempus benidore sotziale e accolomicu de sos zovanos isolanos. Secundu sos urtimos datos de su 2023, sa regione tenet unu tassu nde ispartidura iscolastica anticipadu de su 17,3% intre sos zovanos de 18-24 annos, chi est una de sas prus artas in Italia imparis a sa Sitzilia, contra de una media natzionale de su 10,5%.

Custu cheret narrere chi casi unu istudente supra ses dassat sos istudios prima de leare su titulu superiore, cun cusseghentzias chi si podent biere supra sas occasiones de tribagliu e de creschida personale. Sos motivos printzipales incluidint difficultades in s’arricchimentu de sas cumpetentzia de base, in manera particulare in su cumprendere sa limba italiana, e cunditziones socio accolomicas chi podent impedire su percursu educativu.

Mancari sos numeros chi affuscant, carchi signale de mezzoramentu bessit a campu supra s’ispartidura “cuada”,cussa de sos istudiantes chi finint su primu tziclu chentza cumpetentzias bonas, cun sa Sardigna intre sas regiones chi ant tentu una minimada de signifficu secundu s’appitzicu Invalsi 2023. Su fenomenu est in prus aggravadu dae cosas de accottu comente sa crisi de sas naschidas e sa minimada de sa populatzione iscolastica, chi faghent divennere prus chidrinos sos caminos educativos.

Accomettare s’ispartidura iscolastica dimandat un’impignu chi andet addia interventos puntuales, cun politicas de accotzu a sa didattica, intregatzione prus manna intre iscola, familia e comunidade locale e caminos informativos chi potant rispondere a sas esigentzias de sos zovanos e de su mercadu de su tribagliu. Carchi provintzia est incumintzande a isperimentare pattos educativos e disignos novos po cumbattare s’ispartidura e favoressere s’incluisione, ma addurat de fundamentu un’impignu cordinadu de istitutziones, iscolas e realidade de assotzios.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

“Su Nenniri”, s’antigu connottu sardu chi abbisat sa Pasca.

Cun s’arribu de sa Pasca, in biddas meda de sa Sardigna torrat unu de sos connottos prus antigos e ammaghiantes de s’isula:”su Nenniri”. Si tratta de chimizones de ranu o atteros semenes creschidos a s’iscuru, chi affigurant sa torrada a bida e s’isperantzia, ligados a sos ritos de sa Chida Santa. S’ammanitzu incuminzat parizzas dies prima de Pasca, sos semenes benint postos a brotare in bottos pitticcos, a s’ispissu prattos o canisteddos,cuzigados e attesu dae sa lughe. In custa manera creschent fines,craros e delicados, leande unu colore giallu chisinathu tipicu meda.

Sa forma insoro chidrina e s’aera casi de “sufferentzia” crischiant comente iscromba su sacriffitziu e sa morte de Cristus. In su mentres de sa Chida Santa,”is nenniris” che benint leados in cresia e impittados pro adornare sas tumbas, sos artares pro su Giovia Santu. In carchi bidda benint postos cun contivizu particulare impare a frores,qandelas e pannos, creande bistas simples ma prenas de signifficu.Est unu zestu chi aunit fede e connottu populare, chi andat dae ingendra a ingendra.

In comunidades meda, mescamente in sas biddas prus pitticcas, s’ammaniada de sos nenniri est fintzas unu mamentu de cundivisione.A s’ispissu sunt sas feminas e sos bezzos a si nde occupare, impare cun zovanos, chi gai imparant su balore de custos ritos antigos. Custu connottu tenet raighinas attesu meda, mancari ligadas fintzas a ritos de sa laurantza prima de Cristu, chi tzelebraiant su cursu de sa natura e sa torrada a bida pustis de s’jerru.Cun su tempus, custos signifficos si sunt intritzados cun sa religione cristiana, dande vida a una cosa chi oe mustrat impare morte e torrada a bida.

“Su nenniri” non est solu unu elementu de decoradura, ma unu signu fungudu de sa cultura sarda. In d’unu mundu chi cambiat a sa lestra, custos connottos sighint a bivere gratzias a sa memoria de sas comunidades e a su disizu de no perdere sas raighinas insoro.Cun sa Pasca chi est accanta, cussos chimizones divennint gai unu nuntzu simple ma forte:pustis de donzi tempus buggiu, sa vida agatta semper sa manera de torrare a naschere.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22