Tattari-Terranoa, isfaltu novu po 12 kilometros intre Ardara e Othieri.

Passu novu in daenanti po sa modernitzassione de sa carrela istatale 729 ”Tattari-Terranoa”, unu de sos asses de sas bias de fundamentu po sa mobbilidade de su norti de sa Sardigna. S’Anas at finidu sos attos po torrare a faghere s’isfaltu in d’unu trettu de 12 kilometros, in su derettu de Terranoa.

Est un’attu postu intre sa fase de accabbu de sa parte 2 de su trassadu novu a battoro passazzos, unu de sos pius isettados dae sos automobilistas e carradores chi donzi die passant in custa carrela de fundamentu po sos collegamentos. Sos tribaglios sunt bistados fattos no solu po s’isfaltu, ca su chi est bistadu postu est avantzadu meda, ma fintzas po sos sinzales orizontales deffinitivos, chi serbint po garantire una ghia pius sigura.

Isettande su connottu accreschimentu de su trafficu de sas macchinas insu mese de austu, ligadu a s’istiu e s’arrivu de sos turistas, Anas at frimmadu tottu sos cantieris e suspesu sos tribaglios in sa derettura de Tattari, po evitare abbraccamentos e problemas a sa circulassione. Sos interventos a cuss’ala ant torrare a incumintzare in su mese de cabudanne, cun s’intentu de accabbare fintzas su secundu fronte prima de s’accabbu de s’annu.

Su lotto 2, giai abbertu de su tottu a su trafficu dae su 2024, como si presentat comente modernu e funtzionale, chi permittit unu mezzoru importante de su tempus chi bi cheret po l’ attraessare e minimare s’arriscu de disgrassias.

Po faghere custa parte de s’istrada, s’imbestida totale at binchidu sos 70 miliones de euros, fundos chi sunt postos intro de su pianu pius mannu de potentziamentu de sa SS729, unu disignu padriu e agudissiosu chi in sos urtimos annos at revertidu in manera deffinitiva sos collegamentos intre su norti-ovest e su norti-est de sa Sardigna.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Casteddu in difficultade: terza derrotta una fattu de s’attera e sa Cremonese si accurtziat.

Su Casteddu est bivinde unu mamentu complicadu meda.S’isquadra at perdidu po sa terza borta una fattu de s’attera e como sa classifica faghet un’attera borta frea. Sas atteras isquadras chi battagliant pro si salvare sunt recuberande puntos, e su vantazu de sos ruju e blau si est minimande semper de prus.

Su peus nuntzu est arrivadu dae Parma, inube sa Cremonese at binchidu.Cun custu risurtadu est arribada a solu tres puntos dae su Casteddu. Custu cheret narrere chi sa battalla po addurare in sa categoria est abberta de su tottu.

Sos numeros de sas urtimas partidas sunt negativos meda. In sas urtimas sette partidas, su Casteddu at leadu solu duos puntos. At perdidu chimbe bortas e pareggiadu duas. Est unu de sos peus risurtados intre sas isquadras chi chircant de si salvare. Eppuru, pagu tempus faghet, sa situsassione pariat divreassa meda: tres binchidas una fattu de s’attera aiant fattu isperare in d’unu finale de istajione prus tranchillu. Pustis de cussu mamentu positivu,peroe, s’isquadra si est frimmada. Fintzas sa sotziedade aiat leadu detzisiones pensande chi su peus esseret passadu, comente sa bendita de Luperto propriu a sa Cremonese, chi como est una cuncurrente diretta.

Sa classifica est ancora intzerta. Fintzas atteras isquadras si podent accostare o binchere su Casteddu. Sa Fiorentina diat podere andare a daenantis, mentres su Lecce podet tennere sos mattessi puntos. Tottu at a dipendere dae sos risurtados de sas partidas imbenientes prima de sa frimmada. Su mese de Aprile at essere importante meda. Su Casteddu at a deppere accomettare su Sassuolo in domo sua e pustis at a giogare in domo contra sa Cremonese. Sunt duas partidas de fundamentu pro cumprendere comente at andare a si accabbare s’istajone.

S’isquadra at a torrare a si allenare martis in Assemini, ma bi ant  essere medas ausentzias. Carchi giogadore est impignadu cun sa natzionale sua, comente Caprile e Palestra cun s’Italia. Fintzas Kilicsoy e Obert non bi ant a essere, gai comente Sulemana e fortzis Litetas, chi no est a su menzus. Unu nuntzu bonu arribat dae Borrelli, chi est recuberande e diat podere giogare dae s’incumintzu de sa prossima partida. Sa torrada sua est importante, pro itte su Casteddu at sinzadu pagu in sas urtimas partidas.

Como su Casteddu non podet prus isbagliare. Serbit una reatzione lestra pro evitare de finire in mesu de sos aggios. Sas partidas imbenientes ant a essere detzisivas pro si salvare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22