Su comune de Tattari, cundennato po abbusu de cuntrattos a accabbu: repacamentu a 22 tribagliadores assuntos intre sos annos 80 e su 2011.

Su comune de Tattari est bistadu cundennadu po aere cuncordadu cuntrattos chentza balidos motivos, cun cunsenguentzias de obbricu de repacare 22 tribagliadores assuntos intre sos annos Ottanta e su 2011. Custos tribagliadores funt bistados impittados cun cuntrattos a accabbu po protzettos divressos finantziados dae sa Regione Sardigna, ma sa zustissia at istabilidu chi cussos cuntrattos funt illezittimos.

Sas sententzias de sa Corte de Appellu de Tattari bogadas a fora in su 2023 e 2024, sunt bistadas cunfirmadas dae sa Corte de Cassazione, chi at reffudadu sos ricursos presentados dae su comune. Sos zuighes ant reconnoschidu chi sos cuntrattos a accabbu, impittados po funtziones firmas e de continuidade de s’ente locale, funt privas de zustifigassione balida siat in sa forma chi in sa sustantzia. Po custu motivu, su comune at a teppere dare a sos 22 tribagliadores fintzas a 12 meses de indennidade, po una summa totale de casi 654.000 euros, incluidinde sas ispesas de zustissia.

Sas rechestas chi ant fattu sos tribagliadores de revertire sos cuntrattos a accabbu in cuntrattos a tempus no deffinidu sunt bistadas reffudadas. Bell’e gai, sos zuighes ant evidentziadu chi s’impittu de sos cuntrattos a accabbu no fuit zustifigadu dae resones tennicas, organizzativas, produttivas o de cambiu a tempus, comente prevedint sas regulas natzionales e comunidarias.

Intre sos tribagliadores bi sunt fintzas friguras cun cuntrattos a cambiu fattos po annos, comente zardineris, ghiadores e atteros rolos cun funtziones chi diant devere essere frimmas e chi sighint semper in s’amministrazione pubbrica. Sa sententzia evidentziat chi s’impittu de cuntrattos a accabbu in cussos casos est unu abbusu, bidu chi sos incarrigos chi faghiant no recoint in sas eccessiones chi prevedit sa leze.

Su pronuntziamentu est unu signale de importu supra su currettu controllu de sas calidades umanas in sos entes pubbricos.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Tesones in su Gulfu Persico, arriscant sas bendidas sardas in sos Paisos de sa zura.

Sas tesones intre s’Iran e atteros paisos de su Gulfu podent tennere effettos fintzas supra s’accolomia de sa Sardigna. Su problema no est solu po su pretziu de s’energia ma fintzas pro sas bendidas de sas dittas sardas in forastigu. Un’istudiu de Confindustria Sardigna narat chi una parte importante de su negossiu cun custos Paisos diat podere minimare.

In sos urtimos annos sos Istados chi sunt in su Gulfu Persico sunt divennidos unu de sos mercados printzipales pro sa dittas de s’isula, pustis de sos Istados Unidos e s’Ispagna. Una parte importante de sas mertzes sardas bendidas in forastigu finint propriu in cussa zura e sa parte prus manna est de produttos divressos dae su petroliu. Custu mustrat cantu su Gulfu siat unu mercadu importante pro s’accolomia regionale. Sa parte de produttos sardos pro custos Paisos est meda prus arta in cunfrontu a sa media italiana, cunfirmande chi s’isula est prus esposta de atteras regiones a sas difficultades de su negossiu in cussa zura.

Intre sos clientes printzipales bi sunt Arabia Saudita e Bahrein, sighidos dae Emirati Arabi Uniti. Fintzas su Qatar addurat unu mercadu de signifficu pro medas dittas sardas. Intre sos campos prus interessados bi sunt cussu de sa produssione industriale e cussu chimicu, chi in sos urtimos annosa ant bendidu una parte manna de sos produttos insoro in sos Paisos de su Gulfu. Unu rolu importante lu tenent fintzas sas dittas chi produent macchinarios e cussas chi tribagliant sa pedra.

Si sas tesones de sa zura diant deppere accreschere e faghere divennere prus diffitzile su negossiu, una parte de custa bendidas si diat podere minimare cun cosseguentzias pro divressas dittas de s’isula. Sas difficultades in sa colada de sas naves o problemas intre sos Istados de sa zura diant podere abbaccare su trafficu de sas mertzes e faghere divennere prus diffitziles sos negossios. Pro medas dittas sardas, custos mercados sunt divennidos in su tempus unu puntu de relata importante. Una minimada de sas bendidas diat podere duncas gravare supra sos risurtados de sas dittas e tennere effettos fintzas supra s’occupassione e sos imbestimentos.

Pro custu sa situassione in su Gulfu benit sighida cun attentzione meda fintzas in Sardigna. S’accreschimentu de sa crisi diat podere difattis influentzare non solu sos pretzios de s’energia ma fintzas sos appitzigos de sos negossios fraigados in sos annos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22