Accreschimentu de su Reddidu de Libertade: un’accottu accolomicu affortigadu po sas feminas percossadas dae sa violentzia.

Unu passu addaenantis importante po s’accottu de sas feminas percossadas dae sa violentzia, est bistadu fattu cun s’accreschimentu de su Reddidu de Libertade, chi passat dae 400,00 a 500,00 euros donzi mese po doighi meses. Custu contribbudu est destinadu a sas feminas in cundissiones de pobertade, chi tenzant o no tenzant fizos, chi siant sighidas dae sos tzentros contra sa violentzia, riconnoschidos dae sas Regiones e dae sos servitzios sotziales, po nde favoressere sa mantzipassione accolomica e s’autonomia.

Sa mesura est divennida uffitziale po mesu de unu decretu de su ministru po sa Famiglia, sas Naschidas e sas Pari Occasiones, imparis cun sos ministerios de su Tribagliu e de s’Accolomia. Su decretu, frimmadusu su 2 de Nadale e pubbricadu dae pagu in sa Gazzetta Uffitziale, istabilit puru sa divisione de sos fundos destinados a custu istrumentu de accottu importante.

S’initziativa est posta intro de su “Fundu po su Reddidu de Libertade po sas feminas percossadas dae sa violentzia”, chi prevedit unu finantziamentu totale de 30 miliones de euros, deghe miliones a s’annu dae su 2024 a su 2026. Custos fundos ant essere impittados po garantire unu contribbudu accolomicu a sas feminas chi nde tenet dirittu, affortigande gai sas mesuras de protessione e po azzuare a che torrare a bintrare in sa sotziedade sas chi ant patidu abbusos e abbasattos.

Su Reddidu de Libertade est un’azzudu de fundamentu po sas feminas chisi agattant in cundissiones de difficultade accolomica po aere tentu percossadas in domo o de casta. S’accreschimentu de su contribbudu puntat a apparare unu assulenu accolomicu pius mannu, agilitande su percursu de bessida dae sa violentzia e po fraigare un’indipendentzia nova.

Sa possibilidade de tennere su Redditu de Libertade arrivat po mesu de una dimanda formale chi si podet presentare a sos servitzios sotziales o sos tzentros contra sa violentzia accreditados. Su contribbudu podet essere impittadu po sas ispesas pius importantes comente sa pesone, sas bullettas, comporare benes de prima netzessidade o s’accottu a sa formatzione e su tribagliu, favoressende s’insertu sotziale e de su tribagliu de sas benefissiarias.

S’auguriu est chi custa mesura, imparis cun atteras politicas de accottu e protessione, diant unu contribbudu po creare unu cuntestu sotziale e accolomicu pius incluisivu e siguru po totu sa feminas,offerrinde a issas una possibilidade reale po torrare a partire.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Naschet MyRaee, s’app po che fugliare in manera zusta s’arga elettronica.

Arribat s’applicazione nova gratis pensada po azzuare sos tzittadinos a che fugliare in sa manera zusta s’arga elettronica, unu tema semper pius importante po sa sicuresa de s’ambiente e de s’accolomia tunda. S’app impittat unu sistema de intelligenzia artifiziale po reconnoschere in manera lestra sos medios elettronicos chi si sunt guastados e indittat inube las ponnere a postu o las faghere torrare a bida in sa manera zusta.

Si podet iscarrigare supra App store e Google Play,MyRaee faghe divennere simple e lestru unu attu chi medas bortas benit codiadu ma est de fundamentu. Donzi tzittadinu produede donzi annu una cantidade manna de arga elettronica, ma pius pagu de sa metade che benit fugliada in manera zusta. S’ispartinadura de custos materiales battit arriscos po s’ambiente, commente s’ispatinadura de materiales pesantes, perdidads accolomicas po sa perdida de materias primas e addescat trafficos chi non sunt permittidos.

S’app est pensada po essere cumpresa a sa lestra. Bastat de controllare s’app cun su telefoneddu e su sitema de reconnoschimentu chi biet s’ozettu, comunicande su tzentru pius accanta po l’acconzare o, si no est possibile de l’acconzare, sos logos comunales in sos cales si podent reccollere cun d’una cartina geografica.

In pius de su controllu de sa pratica de s’arga, s’app comunicat informaziones chi serbint a sos tzittadinos, comente garantzia legale e su dirittu de che lu torrare gratis. Est possibile de che torrare chentza ispesa peruna una cosa betza cando si nde comporat una nova o dassare cosas pitticcas in buteegas mannas fintzas chenta comporare nudda.

Myraee azzuat siat s’allonghiamentu de sa vida de sos produttos, cunsizzande de los ponnere appostu, siat de che los fugliare, promovinde sa tutela de s’ambiente e sa sustenibilidade. Una novidade bella meda po chie amat sa tennologia ma fintzas s’ambiente po chircare de lu salvare.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”