Unu trettu novu de s’istatale 195: abertura prevedida po s’istiu 2025.

Sa retza de sas carrelas de su mesudie de sa Sardigna est prontu a mezorare gratzias a sos progressos in sos tribaglios de s’istatale 195-bis “Sulcitana Nova”, una de sas operas pius isettadas po minimare su traffigu dae Casteddu a Pula. Unu passu de fundamentu po su crompimentu de s’opera est bistadu segudadu poninde sas traes in su ponte de Cabuterra.

S’abbertura de su trettu novu si prevedit po s’istiu de su 2025, una concruida importante po tottu sos automobilistas chi donzi die passant in sa SS195 e po tottu sos chi tenent buttegas in cussu logu, chi ant a tennere beneffissios dae sos collegamentos pius lestros e balentes.

Como chi s’assentu de sas traes est accabbadu, sos tribaglios si ant a cuncentrare supra sas urtimas cosas chi bi sunt de faghere po rendere su ponte prontu a essere impitadu. Sas prossimas attividades prevedint de faghere sos traversos de cullegamentu, chi sunt essentziales po s’istabilidade e su funtzionamentu de su ponte, e s’arreulu de su pianu de sa carrela, chi at a permittere su coladorzu siguru de sas macchinas.

In d’unu secundu momentu, ant essere fattas sas operas de accabbada po ponnere in sicuresa tottu su trettu, in manera chi tottu remiret sas regulas prevedidas po sa viabilidade. S’intentu est cussu de accabbare tottu intro de s’istiu 2025, faghinde in manera chi si potat abberrere su trettu novu de s’SS195 e apparande a sos autobobilistas unu camminu pius lestru, siguru e efficiente.

Su crompimentu ispettadu dae meda de s’istatale 195 Bis “Sulcitana Nova” est unu passu de fundamentu po sos ispostamentos de su Sud Sardigna. Su trettu novu at a permittere de minimare meda sos tempos de viazzu intre Casteddu e Pula, duos de sos tzentros pius importantes de su logu, in sos cales bi passat donzi die zente meda, turistas e mezzos chi faghent negossiu.

Custa istruttura nova at a battire vantaggios importantes a paritzos campos. Dae una banda, sa sicuresa de sas carrelas at essere mezzorada meda gratzias a unu camminu modernu, disignadu po isseperare su traffigu pesante dae cussu turisticu e de sas tzittades. Dae s’atteru, su campu turisticu e su negossiu locale ant a tennere benefissios dae unu sistema de carrelas pius loddinosu, agilitande s’arrivu de sos visitadores derettu a sas localidades de sa costa de su Sulcis e de su sud-ovest de s’isula.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Perda ‘e Liana: su gigante de rocca de s’Ozzastra intre natura e misteru.

In su coro de s’Ozzastra s’istantariat mannu meda su Perda ‘e Liana, una de sas pedras pius istravanadas de sa Sardigna orientale. Custa rocca, cun sas trempas suas ritzas e ispuntones biccheddados, dominat sa bista a inghiriu, apparande un’ispettaculu unicu de fortza e maestosidade. Su monte est divennidu puntu de arrivu beniaminu de turistas,apperricadores e appassionados de fottograffia de sa nadura, chi addurant ammaghiados
dae sa mannaria de sa perda e dae sa variedade de sas bistas chi si abberint in sos caminos a inghiriu.

Su Perda ‘e Liana est connoschidu no solu po sa mannaria sua, ma fintzas po sa variedade geologica chi lu distinghet: sas roccas carchinarzas, isculpidas dae su bentu e dae su tempus, creant una bista de ammaju chi non si podet creere, cun trempas chi cambiant colore  secundu de sa lughe e sas istagiones. Su monte est attraessadu dae caminos de difficultade divressa, chi permittint de iscumbattare carroppos cuados, puntos de bista chi no si podent creere e cuzones de nadura areste e chi no est misturada.

Addià de sa  grandesa sua naturale, sa rocca custoit fintzas carchi andala de su folclore locale. Intre custas si distinghet sa Gianna de su Diaulu, un’arcu de rocca naturale chi at fattu naschere paristorias locales e contos populares meda connoschidos mescamente in Gairo. Su Perda ‘e Liana est una cona de s’Ozzastra pius bera: unu logu inube sa geologia addobbiat sa bellesa de sa bista, inube su mudore de sos montes e su cantu de su bentu intre sas roccas donant un’esperientzia de cuntattu direttu cun sa natura. Po chie bisitat custa zura, sa rocca no est solu unu puntu de biere, ma unu beru e propriu addobiu cun sa fortza de sa Sardigna agreste, capatze de emossionare e assuprire in donzi cuzone. Un’obrettadore beru de s’Ozzastra, comente benit giamada cun amistantzia dae sos gairesos.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22