Sa Sardigna si relatat in Milano cun d’una mustra supra sos nuragicos.

Sa Regione Sardigna si presentat in Milano comente ambasciadora de s’identidade propria pius bertera, tzelebrande s’incuminzu de unu biazu istravanadu intre su tempus e sas raighinas de s’antiga tzivilidade sua. Dae su 7 a s’11 de frearzu, su logu Factory NoLo, chi si acciappat accanta a sa pratta Loreto, at accasazzare sa mustra esperenziale “Nuragica”, un’abbenimentu unicu presentadu dae s’assessoradu a su Turismu, De sos Maistros e de su Negossiu.

S’intentu de s’initziativa est cussu de faghere connoschere una Sardigna divressa e chi assuprit, comente narant sos organizadores, andande pius a daenanti de sa figura conica de sas plajas tzelebres suas. Sa mustra puntat a ponnere in lughe unu patrimoniu istoricu, culturale e archeologicu de balore mannu meda, chi mustrat un’attera cara de s’isula, pius pagu connoschida ma atterettantu ammaghiante.

“Nuragica” est una mustra-abbenimentu de s’identidade e multimediale chi at tentu sutzessu meda in paritzas partes, in mesu de sas cales bi sunt: Terranoa, Tattari, Barumini e Nugoro e su Museu Natzionale de Napoli. Dae su 2021, si est revertida in d’una esperientzia firma in Casteddu, inube at conchistadu su pubbricu e est divennida una de sas primas deghe esperientzias de sos museos in Italia po Tripadvisor.

Sa mustra proponnet un’esperientzia chi affundat e aunit emossione e connoschentzia. Po mesu de desaogos fideles, sos bisitadores ant a podere connoschere sa simana de sa tzivilitade nuragica, una de sas pius antigas e prenas de misteriu de su Mediterraneu. S’esposissione est fatta de deghe iscenas chi che leant a s’iscoperta de turres nuragicas, buttegas de maistros,cresias e tumbas de sos zigantes. Su caminu finit cun s’addobiu cun sos tzelebres Zigantes de Mont’e Prama.

“Nuragica” no est solu una mustra, ma unu biazu intre su tempus e su connottu chi ant formadu s’identidade de s’isula. S’initziativa punnat a faghere connoschere a unu pubbricu mannu meda sa ricchesa e sa cumplessidade de sa Sardigna,dande unu contribbudu po balorizzare unu patrimoniu unicu a su mundu. Un’occasione chi non si podet perdere po iscoperrere s’anima pius bera de sa Sardigna, chi si preparat a affadare Milano cun s’istoria sua e s’ammaju chentza tempus suo.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22