Nainggolan arrestadu in Belgio po traffigu de droga: scruccullas suora sa criminalidade organizada.

Radja Nainggolan, ex giogadore de sa Nazionale de su Belgio e dragomannu in serie A cun su Casteddu,sa Roma e s’Inter, est bistadu arrestadu in Belgio cun s’accusa de traffigu internatzionale de droga. Sa nova, cunfirmada dae sa procura de Bruxelles, at iscuttinadu su mundu de su fubbalu.

S’arrestu est sutzessu po un’operassione manna contra sa criminalidade organizada. Custu manzanu, sas autoridades de su Belgio ant fattu casi trinta compudos intre Anversa e Bruxelles, cuncentrandesi supra unu traffigu presumidu de cocaina fatta arribare dae s’America Ladina po mesu de su portu de Anversa e fadada a che la mandare in tottu s’Europa. Nainggolan, secundu cantu narant in cussu logu, est interrogadu in procura.

Adizu pagas dies faghet, su giogadore aiat fattu faeddare de issu po unu goal sinzadu derettu dae s’angolu de su campu, in su mentres de s’esordiu cun su Lokeren-Temse, isquadra de sa Serie B belga cun sa cale aiat frimmadu dae pagu tempus pustis de essere adduradu isligadu po parizzos meses. Sa nova de s’arrestu suo est arrivada chentza chi niunu si l’ispetterat: l’ispettaiant a sos allenamentos, e s’assentzia sua at in d’unu primu tempus affuscadu s’istaff, fintzas a cando sa cunfirma uffitziale dae parte de sas autoridades at fattu lughe supra sa muda.

Sa procura federale at deffinidu s’arrestu de Nainggola parte de un’iscrucculla pius manna supra sa criminalidade organizada, chentza peroe dare atteras novas, evidentziande su rispettu de su presumu de innocentzia. Frigura diffitzile intro e fora de su campu, Nainggolan est bistadu unu de sos giogadores de su tzentru campu pius appretziados in Europa, ma puru unu de sos pius chistionados po problemas personales.

Pustis de aere dassadu su fubbalu de livellu artu e aere acciappidu un’opportunidade nova cun su Lokeren-Temse, custu abbenimentu arriscat de ponnere fine a sa carriera sua e de cumpromittere s’immagine sua. Tottu custu est destinadu a faghere faeddare meda, no solu pro itte su giogadore est famadu meda, ma fintzas po su ligamene cu su traffigu de droga, unu tema chi affuscat semper de pius sas autoridades de su Belgio.

Atteras novas si isettant in su tempus benidore, in su mentres chi sas scruccullas sighint a andare a daenanti.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Masainas,disgarriga abbusiva e tribagliadores chena cuntrattu in d’una ditta de massajos: denuntziadu un’impresariu.

Una disgarriga abbusiva, tribagliadores chena cuntrattu e fura de currente. Est cantu ant iscopertu sos carabbineris in su mentres de compudos in d’una ditta de massajos de Masainas. S’operassione st bistada fatta cun s’accottu de paritzas setziones e s’azzudu de unu elicotteru de Elmas, chi at boladu supra sa zura in su
mentres de sos controllos. Controllos chi sunt bistados ordiminzados po abberguare su rispettu de sas lezez ambientales, de su tribagliu e de sa siguresa in sas dittas de s’iscrocca.

Sos controllos si sunt cuncentrados supra sos terrinos de una sotziedade de massajos de un’omine de 53 annos. In su mentres de sos controllos, sos carabbineris ant incumintzadu a controllare istrutturas, impiantos e attividades presentes in sa zura. In su mentres de sos atzertamentos est bessidu a pizu chi s’omine impittaiat sa retza elettrica chentz cuntrattu. Sa ditta fuit collegata a sa currente chena autorizzassione, impittandela chena la pagare. Pro custu motivu est partida fintzas s’accusa de furtu aggravadu de currente.

Sighinde cun sos controllos, sos carabbineris ant acciappidu fintzas unu motocoltivadore furadu, chi fuit de propriedade de un’atteru imprendidore de sa zura chi nde aiat denuntziadu su furtu. Est iscattada fintzas sa denuntzia po ricettassione. Sa zura de sa laurantza si presentaiat in cundissiones malas. Secundu canto ant cunfirmadu sos militares, una parte de sos terrinos fuit bistada revertida in d’una disgarriga manna chena autorisassione. Intro de sa zura sunt bistados acciappidos arreffudos ispetziales e cosas perigulosas po s’ambiente.

A s’omine sunt bistadas cuntestadas paritzas macchiscias: controllu illetzidu de arrefudos, disgarriga abbusiva, de aere brusiadu illetzitamente arrefudos, iscarrigos de fauda chena autorissassione e de aere fattu autodemolizione chena nde tennere s’autorissassione. In su mentres de sos controllos est bessidu a pizu fintzas un’atteru probblema, ligadu a sa defensa de sos tribagliadores. Intro de sos amparos de sa ditta sunt bistados acciappidos duos tribagliadores chena cuntrattu.

A s’accabbu de s’operassione tottu sa zura est bistada secuestrada po prevensione, imparis a sos materiales e mezzos acciappidos in su mentre de sos controllos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22