Jannik Sinner torrat a iscriere s’istoria de su tennis italianu e de su mundu. Cun d’una prestassione perfetta, s’italianu at triunfadu in sa finale de sos Austrialian Open 2025, derrottande su tedescu Alexander Zverev in solu tres set cun su punteggiu de 6-3, 7-6, 6-3.

Cun custa binta, Sinner conchistat su terzu titulu suo de Slam e si cunfirmat su numeru unu chentza chistione in su tennis, bintrande in sos pius importantes campiones chi sunt capatzes de mantennere unu poderiu chi ischitzat in sas garas pius mannas.

Sinner, chi si presentaiat a s’urtima gara de Melbourne inube aiat perdidu solu duos set, no at dassadu iscampu a Zverev. Su tedescu, chi fit chircande su primu Slam suo, est bistadu abbuttinadu dae sa fortesa e sa cuncentrazione de su color’e aera, chi non li at cuntzedidu nemancu una boccia break in tottu sa partida. Sa partida est durada pius pagu de duas oras e barantachimbe minutos, in su mentres de sa cale Sinner at mustradu unu tennis lughente e cun sa mente chi non si podiat binchere.

Zverev, chi comente si est potidu biere fit iscorazadu e binchidu, no at potidu faghere atteru chi tzelebrare s’avversariu suo. “Ses troppu forte, su beru numeru unu,” at nadu su tedescu a sa fine de sa gara. Unu gestu de isportividade manna abberu chi Sinner at torradu in presse andande a consolare su ribale, mustrande un’attera borta sa classe sua fintzas fora de su campu.

Cun custa vittoria, Jannik Sinner cunfirmat su poderiu assoludu suo in sas garas Slam supra su cimentu, arrivande a sa tzifra impressionante de 21 binchidas una fattu de s’attera in custa classe. At binchidu 87 de sos urtimos 98 set chi at fattu e at binchidu 37 de sas urtimas 38 garas chi at giogadu, affortigande sa posissione sua de leader chentza discussione de su rogliu.

“ Seu cuntentu meda de comente appo guvernadu sa gara,” at cummentadu Sinner. “Cando so sutta de pressione, resesso a agattare sa cuntzentrzione mia e a giogare su menzus tennis meu. Su team meu est una parte de fundamentu de custu sutzessu, e dedigo custa binchida a sa famiglia mia e a chie tribagliat cun mene donzi die.”

A solu 23 annos, Jannik Sinner at giai arrogadu paritzos record e paret chi siat destinadu a dominare sa bista de su tennis mondiale po atteros meda annos. Cun su bis in Melbourne, chi si azzunghet a su triunfu a sos US Open 2024, su color’e aera est fraigande un’eredidade chi lu bettat in mesu de sos pius mannos de semper.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22