Una disaura drammatiga est sutzessa in sas abbas de su Mare Ruggiu, in sa zura norti de Marsa Alam in Egitto. Duos turistas italianos, in su mentres de una bessida in mare, sunt bistados attaccados dae unu canisca: unu de issos est mortu po sas fertas graves meda, mentres s’atteru est adduradu fertu e at retzidu luego assistentzia dae parte de sos meigos.

S’abbenimentu at abbolottadu non solu sa comunidade locale, ma fintzas cussa internatzionale,ispertande attentzione particulare supra sa sicuresa de sas attividades turisticas de sa comarca. Pustis de s’accadessidu, sa Procura at fattu partire un’iscruccullu uffitziale po faghere lughe supra sos motivos de sa disgrassia.

Secundu cantu narat su Ministeru de s’Ambiente egizianu, chi in d’unu primu momentu no at dadu notissias supra sa nassionalidade de sos chi sun bistados attaccados, s’attaccu bi est bistadu in d’unu trettu de mare chi est bistadu luego serradu, proibbinde de bintrare in abba. Sas autoridades ant leadu mesuras apprettosas po ponnere in siguresa su logu, disponninde una proibissione po sos chi andant sutta de s’abba, e tottu sas attividades chi si faghent in mare inie.

Su corpus de su turista mortu ch’est bistadu leadu a s’ispidale de Porto Ghalib, inue est a disposissione de su pubbricu ministeru po atteros accertamentos, mentres su turista fertu est bistadu azzudadu in su mattessi logu e pustis ch’est bistadu leadu in d’unu atteru ispidale po sas curas.

Su ministeru de s’Ambiente egizianu at nadu chi at essere nominada una cummissione ispetziale chi at a tribagliare cun su guvernadoradu de su Mare Ruggiu e atteras autoridades chi tenent cumpetentzia. Custa Task force at a tennere su compidu de cumprendere pro ite est sutzessa sa disaura, cumprendere sos motivos de s’attaccu e proponnere solutziones.

Su Mare Ruggiu est dae meda tempus unu logu beniaminu po sos appassionados de snorkeling, po sos chi andant sutta de s’abba e faghent sas vacantzias in su mare. Disauras commente custa, faghent affroscare meda sa zente supra sa sicuresa de sas attividades turisticas e muttint s’attentzione supra su bisonzu de regulare in manera importante s’intrada a sos logos de su mare pius bischidos.

In su tempus passadu, attaccos de caniscos in su Mare Ruggiu, bi nde sunt bistados pagos, ma est giai sutzessu. Sos espertos de su mare evidentziant chi custos abbenimentos podent essere su risurtdau de cambiamentos de su tempus, chi faghent cambiare su traggiu de sos caniscos o chi sunt causados dae cumportamentos iscurrettos de sos omines.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Sa bela manna torrat in Sardigna, s’isula at accasazzare una tappa prima de s’Americas Cup n°38.

Sa bela manna internatzionale est pronta a torrare in Sardigna. S’isula at accasazzare difattis sa prima gara de ammaniada de sa 38° Americas Cup, abbenimentu chi at a finire cun s’assignadura de su premiu in Napoli in su mese de Triulas 2027. Sa Regione at accraradu s’accordu chi at a permittere a sa Sardigna de bintrare pro sa prima borta in s’istoria de sa cumpetissione de sa bela prus de archida a su mundu.

Mancari sos particulares organissativos non siant bistados ancora deffinidos de su tottu, su logu prus probabbile de sa gara est Casteddu. Sa tzittade printzipale sarda est dae annos sa base de sas operassiones de Luna Rossa e est cussideradu unu de sos campos de gara ideales pro sas cundissiones de su bentu, calidade de sas abbas e logos de appozzu, elementos de fundamentu po accasazzare abbenimentos de custu livellu.

Pro sa Sardigna si trattat de una ghirada ispettata po meda tempus. Sas World Series de s’Americas Cup aiant giai iffrisadu s’isula in su tempus passadu, ma chentza mai esecutare. Una prima tentada est de su 2020, cando s’abbenimentu fuit bistadu iscancelladu pro su Covid. Una secunda occasione fuit prevedida po su mese de Santuaini 2023, cun garas in disignu dae su 12 a su 15 de su mese, ma fintzas in cussu casu tottu est bistadu annuddadu  meda tempus prima, intre condierros e tesones intre sa Regione e sos ordiminzadores neozelandesos, chi aiant battidu a sa
tramuda de sas garas in Jedda, in Arabia Saudita.

Sa delusione fuit pustis accreschida cun s’assignadura de sa 38° Americas Cup a Napoli, unu seperu chi aiat addescadu fintzas una dibatta importante de sa politica. Sa preparassione  chi si depet faghere in Sardigna est ora una ispecie de riscattu po s’isula, chi at a podere accasazzare sas primas garas uffitziales de su ciclu novu de sa cumpetissione e torrare a su tzentru de su giru belicu internatzionale.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22